སྨོན་པ་མེད་པའི་དམིགས་པ་ཡང་རྣམ་པར་མཐོང་ལ་ཁམས་གསུམ་པའི་དམིགས་པ་ལ་ཡང་མི་སྨོད་དོ། །ཤེས་རབ་དང་ཐབས་ལས་ངེས་པར་བྱུང་བ་དེ་ནི་དམིགས་པ་ཐམས་ཅད་ལ་ཡང་དབང་བྱེད་པར་འགྱུར་ཏེ་དེ་མི་སྡུག་པ་ལ་དམིགས་ནས་དེ་བཞིན་གཤེགས་པའི་སྐུ་སྡུག་པ་ལ་སེམས་གནས་སོ། །མི་རྟག་པ་ལ་དམིགས་ནས་འཁོར་བ་ལ་སེམས་ཡོངས་སུ་མི་སྐྱོ་བ་ཉིད་དུ་སེམས་གནས་སོ། །སྡུག་བསྔལ་ལ་དམིགས་ནས་སེམས་ཅན་ཐམས་ཅད་མྱ་ངན་ལས་འདས་པ་བདེ་བ་ལ་དགོད་པར་སེམས་གནས་སོ། །བདག་མེད་པ་ལ་དམིགས་ནས། སེམས་ཅན་ཐམས་ཅད་ལ་སྙིང་རྗེ་ཆེན་པོའི་སེམས་གནས་སོ། །འདོད་ཆགས་ལ་དམིགས་ནས་སེམས་ཅན་འདོད་ཆགས་ལ་སྤྱོད་པ་རྣམས་ལ་མི་སྡུག་པའི་སྨན་ཆེན་པོ་ཡང་དག་པར་བསྟན་པར་སེམས་གནས་སོ། །ཞེ་སྡང་ལ་དམིགས་ནས་སེམས་ཅན་ཞེ་སྡང་ལ་སྤྱོད་པ་རྣམས་ལ་བྱམས་པ་ཆེན་པོའི་སྨན་ཆེན་པོ་ཡང་དག་པར་བསྟན་པར་སེམས་གནས་སོ། །གཏི་མུག་ལ་དམིགས་ནས་སེམས་ཅན་གཏི་མུག་ལ་སྤྱོད་པ་རྣམས་ལ་རྟེན་ཅིང་འབྲེལ་པར་འབྱུང་བའི་སྨན་ཆེན་པོ་ཡང་དག་པར་བསྟན་པར་སེམས་གནས་སོ། །ཆ་མཉམ་པ་ལ་དམིགས་ནས་སེམས་ཅན་ཆ་མཉམ་པ་ལ་སྤྱོད་པ་རྣམས་ལ་མི་རྟག་པའི་འདུ་ཤེས་ཀྱི་སྨན་ཆེན་པོ་ཡང་དག་པར་བསྟན་པར་སེམས་གནས་སོ། །འདོད་ཆགས་དང་བྲལ་བ་ལ་དམིགས་ནས་ཉན་ཐོས་སུ་འདུལ་བར་སེམས་གནས་སོ། །ཞེ་སྡང་དང་བྲལ་བ་ལ་དམིགས་ནས་རང་སངས་རྒྱས་སུ་འདུལ་བར་སེམས་གནས་སོ། །གཏི་མུག་དང་བྲལ་བ་ལ་དམིགས་ནས་བྱང་ཆུབ་སེམས་དཔར་འདུལ་བར་སེམས་གནས་སོ། །གཟུགས་ལ་དམིགས་ནས་དེ་བཞིན་གཤེགས་པའི་གཟུགས་ཐོབ་པར་བྱ་བར་སེམས་གནས་སོ། །སྒྲ་ལ་དམིགས་ནས་དེ་བཞིན་གཤེགས་པའི་སྒྲ་དབྱངས་ཐོབ་པར་བྱ་བར་སེམས་གནས་སོ། །དྲི་ལ་དམིགས་ནས་དེ་བཞིན་གཤེགས་པའི་ཚུལ་ཁྲིམས་ཀྱི་དྲི་བསུང་ཐོབ་པར་བྱ་བར་སེམས་གནས་སོ། །རོ་ལ་དམིགས་ནས་དེ་བཞིན་གཤེགས་པའི་སྐྱེས་བུ་ཆེན་པོའི་མཚན་རོ་བྲོ་བའི་མཆོག་ཐོབ་པར་བྱ་བར་སེམས་གནས་སོ། །རེག་བྱ་ལ་དམིགས་ནས་དེ་བཞིན་གཤེགས་པའི་ཕྱག་དང་ཞབས་འཇམ་ཞིང་གཞོན་པ་ཐོབ་པར་བྱ་བར་སེམས་གནས་སོ།