།རེག་བྱ་ལ་དམིགས་ནས་དེ་བཞིན་གཤེགས་པའི་ཕྱག་དང་ཞབས་འཇམ་ཞིང་གཞོན་པ་ཐོབ་པར་བྱ་བར་སེམས་གནས་སོ། །ཆོས་ལ་དམིགས་ནས་དེ་བཞིན་གཤེགས་པའི་སེམས་ངེས་པར་སེམས་པ་ཐོབ་པར་བྱ་བར་སེམས་གནས་སོ། །སྦྱིན་པ་ལ་དམིགས་ནས་མཚན་དང་དཔེ་བྱད་བཟང་པོ་ཐོབ་པར་བྱ་བར་སེམས་གནས་སོ། །ཚུལ་ཁྲིམས་ལ་དམིགས་ནས་སངས་རྒྱས་ཀྱི་ཞིང་ཡོངས་སུ་དག་པར་བྱ་བར་སེམས་གནས་སོ། །བཟོད་པ་ལ་དམིགས་ནས་ཚངས་པའི་སྒྲ་དབྱངས་དང་གསེར་གྱི་མདོག་ཏུ་འདུག་པའི་པགས་པ་ཐོབ་པར་བྱ་བར་སེམས་གནས་སོ། །བརྩོན་འགྲུས་ལ་དམིགས་ནས་སེམས་ཅན་ཐམས་ཅད་བསྒྲལ་བར་སེམས་གནས་སོ། །བསམ་གཏན་ལ་དམིགས་ནས་མངོན་པར་ཤེས་པ་བསྐྱེད་པར་སེམས་གནས་སོ། །ཤེས་རབ་ལ་དམིགས་ནས་སེམས་ཅན་ཐམས་ཅད་ཀྱི་ལྟ་བ་དང་། ཉོན་མོངས་པའི་ཀུན་ནས་ཉོན་མོངས་པ་རྒྱུན་བཅད་པར་སེམས་གནས་སོ། །བྱམས་པ་ལ་དམིགས་ནས་སེམས་ཅན་ཐམས་ཅད་ལ་ཁོང་ཁྲོ་བའི་སེམས་མེད་པར་བྱ་བར་སེམས་གནས་སོ། །སྙིང་རྗེ་ལ་དམིགས་ནས་དམ་པའི་ཆོས་ཡོངས་སུ་གཟུང་བར་སེམས་གནས་སོ། །དགའ་བ་ལ་དམིགས་ནས་ཆོས་བསྟན་པ་ལ་མཆོག་ཏུ་དགའ་བར་བྱ་བར་སེམས་གནས་སོ། །བཏང་སྙོམས་ལ་དམིགས་ནས་སེམས་ཅན་རྗེས་སུ་ཆགས་པ་དང་། ཁོང་ཁྲོ་བ་སྤང་བ་ལ་སྦྱར་བར་སེམས་གནས་སོ། །བསྡུ་བའི་དངོས་པོ་ལ་དམིགས་ནས་སེམས་ཅན་ཡོངས་སུ་སྨིན་པར་བྱ་བར་སེམས་གནས་སོ། །སེར་སྣའི་སྐྱོན་ལ་དམིགས་ནས་བདོག་པ་ཐམས་ཅད་ཡོངས་སུ་གཏང་བར་སེམས་གནས་སོ། །འཆལ་པའི་ཚུལ་ཁྲིམས་ཀྱི་སྐྱོན་ལ་དམིགས་ནས་ཚུལ་ཁྲིམས་རྣམ་པར་དག་པར་བྱ་བར་སེམས་གནས་སོ། །གནོད་སེམས་ཀྱི་སྐྱོན་ལ་དམིགས་ནས་བཟོད་པའི་སྟོབས་དང་། དེས་པ་ལ་སེམས་གནས་སོ། །ལེ་ལོའི་སྐྱོན་ལ་དམིགས་ནས་དེ་བཞིན་གཤེགས་པའི་སྟོབས་ཡོངས་སུ་བསྒྲུབ་པར་སེམས་གནས་སོ། །གཡེང་བའི་སྐྱོན་ལ་དམིགས་ནས་དེ་བཞིན་གཤེགས་པའི་བསམ་གཏན་ཐོབ་པར་བྱ་བར་སེམས་གནས་སོ། །འཆལ་པའི་ཤེས་རབ་ཀྱི་སྐྱོན་ལ་དམིགས་ནས་ཆགས་པ་མེད་པའི་ཡེ་ཤེས་རབ་ཏུ་རྫོགས་པར་བྱ་བར་སེམས་གནས་སོ། །