བཟླས་པ་དུང་ཕྱུར་གྲུབ་པའི་ཚེ་ལྔགས་ཐོག་ཏུ་ལྕགས་ཀྱི་རིལ་བུ་རང་རྡོལ་དུ་བྱུང་བ་སོགས་གྲུབ་པའི་མཚན་མ་བརྙེས། དེའི་མཆེད་ཡ་རྒྱལ་འཕེལ་ལ་སྲས་གསུམ་བྱུང་བའི་སྡེ་དགེ་ཀུན་དགའ་རིན་ཆེན་ནི་ལྷུན་གྲུབ་སྟེང་གི་བླ་བྲང་གི་ལྷ་ཁང་བཞེངས་པ་སོགས་སྐུ་བསོད་རྒྱས་པའི་འགོ་ཚུགས། བསྙེན་བསྒྲུབ་གནང་བའི་ཚེ་གཟིམས་ཁང་ཐམས་ཅད་མེའི་ཕུང་པོར་གྱུར་པ་ཐམས་ཅད་ཀྱིས་མངོན་སུམ་དུ་མཐོང་བ་བྱུང་། དེའི་གཅུང་དབོན་ནམ་མཁའ་དང་རྡོ་རྗེ་ལྷུན་གྲུབ་གཉིས་བྱུང་བའི་ཕྱི་མ་ལས་ཉེ་བར་བརྒྱུད་དེ་ད་ལྟ་བླ་མ་བཀྲ་ཤིས་རྒྱ་མཚོ་སོགས་བཞུགས་པ་འདིའི་བར་རོ། །སྔ་མའི་སྲས་ལྷུན་ཐུབ། དེ་ལ་སྲས་དྲུག་བྱུང་བའི་དང་པོ་ནི་རིག་འཛིན་རྒོད་ལྡེམ་ཅན་གྱི་སྤྲུལ་པའི་ཟློས་གར་དུ་གྲགས་པ་གྲུབ་ཐོབ་ཀུན་དགའ་རྒྱ་མཚོ་སྟེ། འདིས་གསང་སྔགས་གསར་རྙིང་སྤྱི་དང་། ཁྱད་པར་དུ་སྔགས་རྙིང་མའི་ཆོས་ཀྱིས་གྲུབ་པའི་མཚན་མ་བརྙེས། ལྐོག་གྱུར་གྱི་གནས་ལུགས་སྟོན་པ་དང་། སྣང་བ་བདེན་མེད་དུ་གཟིགས་པས་སྲ་མཁྲེགས་ཀྱི་རྡོ་བ་འདམ་ལྟར་རྫི་བ་དང་། འབྱུང་པོ་གདུག་པ་ཅན་མང་པོ་འདུལ་བ་སོགས་ངོ་མཚར་གྱི་མཛད་པ་སྣ་ཚོགས་ཞིག་བསྟན་པར་གྲགས། གསུམ་པ་བླ་མ་དམ་ཆོས་ལྷུན་གྲུབ་བམ། བྱམས་པ་ཕུན་ཚོགས་ཅེས་པ་དེས་སྔོན་གྱི་བསོད་ནམས་ཀྱི་ལས་ཤུགས་ཆེས་ཆེར་བདོ་བས་ཆབ་སྲིད་སྐྱོང་བའི་བྱ་བ་གཙོ་བོར་མཛད་ཅིང་། རིས་མེད་ཀྱི་ཆོས་སྡེ་མང་པོའི་བདག་པོར་གྱུར། ལྔ་བ་བླ་མ་ལྷ་སྲུང་ཐུགས་དམ་འབའ་ཞིག་ལ་བརྩོན་པར་མཛད། དྲུག་པ་བླ་མ་ཀརྨ་བསམ་འགྲུབ་ཀརྨ་ཀཾ་ཚང་གི་གྲུབ་མཐའ་འཛིན་པ་ཞིག་སྟེ་དབོན་པོ་སྟོད་དུ་བཞུགས། སྲས་གཉིས་པ་དང་བཞི་བ་གཞིས་ཀར་བཞུགས་པའི་སྔ་མ་དབོན་ཀླུ་འཕེལ་གྱི་སྲས་རྣམས་ལས། དཔོན་ཆེན་ཀུན་དགའ་ཕུན་ཚོགས་ཀྱིས་ས་སྐྱོང་དམ་པ་བྱམས་པ་ཕུན་ཚོགས་སྐུ་གཤེགས་ནས་གདན་སའི་ཁྲིར་ཕེབས་ཏེ། ལུགས་གཉིས་ཀྱི་སྲོལ་བཟང་པོ་བསྐྱངས་བར་མཛད་དོ། །ཁྱད་པར་གཏེར་གཞུང་འགའ་ཞིག་ལས་ཅོག་རོ་ཀླུའི་རྒྱལ་མཚན་གྱི་སྤྲུལ་པའི་ཟློས་གར་དུ་བཤད་པ་ཁྲི་ཆེན་སངས་རྒྱས་བསྟན་པ་ནི།