།ཁྱད་པར་གཏེར་གཞུང་འགའ་ཞིག་ལས་ཅོག་རོ་ཀླུའི་རྒྱལ་མཚན་གྱི་སྤྲུལ་པའི་ཟློས་གར་དུ་བཤད་པ་ཁྲི་ཆེན་སངས་རྒྱས་བསྟན་པ་ནི། ལེགས་བྱས་ཀྱི་མཐུ་རྒྱ་ཆེན་པོས་འགྲན་དུ་མེད་པའི་དབང་བརྙེས་པར་གྱུར་ཏེ་གདན་སར་བཞུགས་ཁྲིར་ཕེབས་ནས་བདེ་བར་གཤེགས་པའི་བསྟན་པ་རིས་སུ་མ་ཆད་པ་ལ་མཆོད་པ་དང་བསྙེན་བཀུར་བ་དང་། གཙུག་ལག་ཁང་དང་འདུས་པའི་སྡེ་མང་པོའི་ཉམས་གསོ་གསར་སྤེལ་སོགས་དང་། རྒྱལ་ཁམས་ལ་བྱམས་པས་གཟིགས་པའི་བཀའ་ཁྲིམས་དྲང་པོས་ཕན་བདེར་མཛད་པ་སོགས་ལུགས་གཉིས་ཀྱི་སྲོལ་བཟང་པོས་མངའ་རིས་ཐམས་ཅད་དཀར་པོར་བསྒྱུར་བར་མཛད། འདིའི་ཡུམ་མི་གཅིག་པའི་གཅེན་པོ་དཔོན་ཨུ་རྒྱན་བཀྲ་ཤིས་སྲས་ས་སྐྱོང་བླ་མ་བསོད་ནམས་ཕུན་ཚོགས་ཀྱིས་དེའི་རྗེས་སུ་ཁྲི་བསྐྱངས་ཏེ། དེ་ནི་ཐུགས་སྒམ་ཞིང་ངང་རིང་བ། དཀྱེལ་ཆེ་བ་སོགས་ཡ་རབས་ཀྱི་སྐྱེས་བུའི་ཡོན་ཏན་དང་ལྡན་པ་ཞིག་གོ། །དེའི་མཆེད་ཡར་གྱུར་པ་དཔོན་དབང་ཆེན་མགོན་པོའི་སྲས་མིའི་དབང་པོ་བསྟན་པ་ཚེ་རིང་ནི་ད་ལྟ་བཞུགས་ཁྲིར་ཕེབས་ནས་སྲིད་སྐྱོང་བཞིན་པ་ཡིན་ཏེ། འདི་ནི་རྣམ་དཀར་གྱི་བྱ་བ་རྒྱ་ཆེན་པོ་འདི་འགྲུབ་པའི་བདག་རྐྱེན་དངོས་སོ། །གསུམ་པ་བདག་རྐྱེན་བྱེད་པ་པོ་དེའི་ཡོན་ཏན་རང་ཉིད་ཀྱིས་ཇི་ལྟར་མཐོང་བ་བཞིན་ངོ་བསྟོད་མེད་པར་བརྗོད་ན། ཚེ་རབས་མང་པོར་ལེགས་བྱས་རྒྱ་མཚོ་མངོན་པར་འདུ་བྱས་པའི་མཐུས་ཆུང་ངུ་ནས་དགེ་བའི་ངང་ཚུལ་ཅན། བླ་མ་དང་རྒན་རབས་སོགས་ཞེ་སར་འོས་པ་རྣམས་ལ་སྲི་ཞུ་ཆེ་བ། གསང་སྔགས་གསར་རྙིང་གི་ཡི་དམ་མང་པོའི་བསྐྱེད་རྫོགས་ཀྱི་ཉམས་ལེན་ཐུན་གྲངས་སུ་བཅད་པའི་བཟླས་བརྗོད་དང་ཞལ་འདོན་སོགས་ཀྱི་བརྩོན་པ་མི་བཤོལ་བ།སྟོབས་ཆེན་པོས་ངང་གིས་འཇུག་པ་ཞིག་སྟེ་བསྐལ་བཟང་སངས་རྒྱས་སྟོང་གི་སྐུ་བརྙན་སོ་སོའི་ཡབ་ཡུམ་སྲས་རིམ་གྲོ་པ་སོགས་འཁོར་དང་བཅས་པ་རི་མོར་བྲིས་པའི་ཞལ་ཐང་གྲངས་མང་ཞིང་སྤུས་ལེགས་པ་དང་། །རྒྱལ་བའི་བཀའ་འགྱུར་རོ་ཅོག་རིན་པོ་ཆེ་ལས་བཞེངས་པ་སོགས་མཐའ་ཡས་ཤིང་སྲིད་སྐྱོང་གི་གོས་ཆེན་པོར་བཞུགས་པ་ནའང་།