དཔལ་སྣར་ཐང་གི་གཙུག་ལག་ཁང་གི་མདོ་མང་རྣམས་ཀྱི་མཆོག་ཏུ་གྱུར་པ་མཁན་པོ་ཆེན་པོ་མཆིམས་ཀྱི་ཐུགས་དམ་མདོ་མང་གསེར་གཞུང་མ་དང་། ཕྱུག་རྒྱལ་མ་དང་། དགོན་གསར་མ་ལ་སོགས་པ་རྣམས་དང་། གཞན་ཡང་བླ་མ་གྲུ་སྤང་རྩ་བའི་ཐུགས་དམ་མདོ་མང་འཛམ་གླིང་རྒྱན་དང་། ཤོག་ཆུང་གི་གཙུག་ལག་ཁང་གི་མདོ་མང་དྲུག་ཅུ་རྩ་གཉིས་དུ་མ་དང་། སྤུན་གསུམ་གྱི་གཙུག་ལག་ཁང་གི་མདོ་མང་དང་། ཞ་ལུ་གསེར་ཁང་གི་གཙུག་ལག་ཁང་གི་མདོ་མང་གཞི་མ་དང་། སྨོན་ད་རྡོ་ཞེས་གྲགས་པ་ལ་སོགས་པ་མདོ་སྣ་མང་ཞིང་གོ་རིམ་ལེགས་པ་རྣམས་དང་བསྟུན་པ་དང་། ཤེར་ཕྱོགས་འབུམ་ལ། བཙན་པོ་ཁྲི་སྲོང་ལྡེའུ་བཙན་གྱི་སྐུ་རིང་ལ་རེག་ཟིག་སྔོ་དམར་སོགས་འབུམ་ཚར་དྲུག་ཙམ་ཡོད་པར་གྲགས་ཤིང་། དེ་ལས་མཆེད་པའི་ཁྲི་ལྡེ་སྲོང་བཙན་གྱི་དུས་སུ་བཞེངས་པའི་བླ་འབུམ་ཆེན་མོ་ཁྲི་གཙུག་གི་བླ་འབུམ་སྐྱ་བོ། མཇིང་ཡོན་གྱི་སྡུག་འབུམ། གཙང་མིའི་བྱེ་འབུམ། རལ་པ་ཅན་གྱི་དྲུག་འབུམ། གནམ་སྡེ་ལྷའི་ཞལ་དམར་ཅན། དར་མའི་ཤོག་སེར་ཅན་སོགས་དང་། འབངས་ཀྱིས་བཞེངས་པའི་འབུམ་ཚར་བཅུ་དགུ་སོགས་དང་། དེ་དག་རྣམས་ལས་མཆེད་པ་ཤིན་ཏུ་མང་བར་བཞུགས་པའི་རྒྱུན་ལས་བར་སྐབས་སུ་མ་ཉམས་མ་བསླད་པའི་ཕྱི་མོ་རྣམས་ལ་དབུས་པ་བློ་གསལ་དང་། ལོ་ཙཱ་བ་བསོད་ནམས་འོད་ཟེར་དང་། རྒྱང་རོ་བྱང་ཆུབ་འབུམ་སོགས་མཁས་པ་མང་པོས་སྒོ་བསྟུན་ཏེ་དག་པར་གཏན་ལ་ཕབ་པ་དང་།གསང་སྔགས་རྒྱུད་འབུམ་གྱི་མ་ཕྱིའང་བླ་མ་རྗེ་བཙུན་ཆེན་པོ་གྲགས་པ་རྒྱལ་མཚན་གྱི་ཞལ་སྔ་ནས་དང་། བླ་མ་ཆེན་པོ་ཆོས་ཀྱི་རྒྱལ་པོས་མཛད་པའི་རྒྱུད་ཀྱི་དཀར་ཆག་དང་། སློབ་དཔོན་ཆེན་པོ་རིག་པའི་རལ་གྲིས་མཛད་པའི་རྒྱུད་ཀྱི་དཀར་ཆག་རྒྱུད་འབུམ་རྒྱན་གྱི་མེ་ཏོག་སོགས་ལ་བརྟེན་ནས་གདན་ས་ཆེན་པོ་དཔལ་ས་སྐྱའི་རྒྱུད་འབུམ་དང་། ཤཱཀྱའི་དགེ་སློང་རྡོ་རྗེ་འཛིན་པ་ཆེན་པོ་གསེར་སྡིངས་པས་ཞུས་དག་གོ་རིམ་མཛད་ནས། དགེ་བའི་བཤེས་གཉེན་སྐྱེ་མེད་སྟོན་ཤེས་བཞེངས་པའི་རྒྱུད་འབུམ་དང་། དཔལ་ཐར་པ་གླིང་གི་གཙུག་ལག་ཁང་གི་དགེ་བཤེས་འདར་ཕྱར་གྱིས་བཞེངས་པའི་རྒྱུད་འབུམ་དང་།