སྟོབས་ཀྱི་འཁོར་ལོས་སྒྱུར་བ་གནམ་སྐོས་གོང་མ་ཆེན་པོ་གཡུང་ཅིན་གསེར་ཁྲིར་ཕེབས་ནས་ཉག་མ་བདུན་ཐལ་བ། མིའི་དབང་པོ་འདི་ཉིད་དགུང་ལོ་ལྔ་བཅུ་རྩ་གཉིས་སུ་ཕེབས་པ། བདེ་མཆོག་སྟོད་འགྲེལ་ལྟར་ན་སཽ་མྱ་ཞེས་པ་ཞི་བར་གྲགས་ཤིང་། ཤར་ཕྱོགས་ཏོང་ཀུའི་རྒྱལ་ཁམས་སུ་གྱི་ཡེའུར་བོད་པ་ས་མོ་བྱའི་ལོ་སྨེ་ཕྲེང་དང་པོ་འབྱུང་བ་སུམ་ལྡན་ཕུར་བུ་ཀླུང་དུ་ཞུགས་པའི་དུས། དེ་ལའང་ཉི་མ་ལྷོར་བསྒྲོད་པ་དང་བྱང་དུ་བསྒྲོད་པའི་དུས་གཉིས་ཡོད་པ་ལས་སྔ་མ།པའི་ཡོན་ཏན་དང་ལྡན་པ་སྟོན་ཀའི་དུས། དགུན་དང་དཔྱིད་དང་དབྱར་དང་དབྱར་ཐུང་དང་དབྱར་རིང་པོ་སྟེ་དུས་ལྔ་ལས་ཕྱི་མ། ཟླ་བ་བཅུ་གཉིས་ལས་ཧོར་ལུགས་ཀྱི་ཟླ་བ་བདུན་པར་གྲགས་པ། ཏོང་ཀུའི་རྒྱལ་ཁམས་པའི་ལུགས་ཀྱིས་སྟོན་ར་བ་སྤྲེའུའི་ཟླ་བ། འཕགས་པའི་ཡུལ་དུ་ཤྲབཎར་གྲགས་པ་རྒྱུ་སྐར་གྲོ་བཞིན་གྱིས་ཉ་བའི་དཀར་ཕྱོགས། གང་བ་གཉིས་པའི་ཚེས། རེས་གཟའ་མཛའ་ལྷའི་གྲོགས་པོའི་འཛུམ་མདངས་རྒྱུ་སྐར་གྱི་ལྷ་མོ་ཨ་ནུ་རཱ་དྷཱའི་བཞིན་གྱི་པདྨོར་འཕོས་པ། འཆི་མེད་གྲུབ་པའི་སྦྱོར་བ།དུས་འཁོར་བའི་ལུགས་ཀྱི་དབྱངས་ཨོ། གསལ་བྱེད་ཕོ། འབྱུང་བ་ཆུ། འདོད་ཡོན་གཟུགས། དབྱངས་འཆར་བའི་ལུགས་ཀྱི་དབྱངས་ཨེ། གསལ་བྱེད་ར། འབྱུང་བ་རླུང་། འདོད་ཡོན་རེག་བྱ་སོགས་འཆར་བའི་དུས་ཕུན་སུམ་ཚོགས་པ་ལ། ས་སྐྱོང་ཆེན་པོས་ཐོག་མ་མེད་པའི་དུས་ནས་བསགས་པའི་ལེགས་བྱས་ཀྱི་མཐུ་རྒྱ་ཆེན་པོ་བརྟས་པ་ལས་སླར་ཡང་ལེགས་བྱས་ཀྱི་ལམ་རྒྱ་ཆེན་པོ་འདི་ལྟ་བུ་བསྒྲུབ་པ་ལ་སྤྲོ་བ་ཆེན་པོ་ཟླ་བ་མཐོང་བའི་རྒྱ་མཚོ་བཞིན་དུ་འཕེལ་བར་གྱུར་ཏེ། རྒྱ་ཆེན་པོའི་གནས་འདི་ལྟ་བུ་ལ་སྤྱོད་མི་ནུས་སོ་སྙམ་པའི་ཞུམ་པ་དང་། གནས་འདི་ཚེགས་ཀྱིས་སྤྱད་པ་གཞན་གྱིས་བསྒྲུབ་མི་ནུས་པས་བདག་ཉིད་ཁོ་ན་མཆོག་ཡིན་གྱི་གཞན་དག་ནི་སྦྲང་བུ་ལྟ་བུའོ་སྙམ་པའི་ཁེངས་པ་དང་། འདི་ལྟ་བུ་སྤྱད་པར་འོས་པ་ཡིན་མོད་ཀྱི་འོན་ཀྱང་རྒྱུ་འདི་ལས་མཛོད་དང་བང་བ་རྣམས་ཧ་ཅང་འབྲི་བར་འགྱུར་རོ་སྙམ་པའི་སེར་སྣ་ལ་སོགས་པ་རིང་དུ་སྤངས་ནས།