ཕྱི་མོ་ཇི་ལྟར་བསགས་ཤིང་དག་པར་བགྱིས་པའི་ཚུལ་དང་། བཞེངས་ཚུལ་དངོས་སོ། །དང་པོ་ནི། སྤྱིར་བསྐལ་པ་ཆེན་པོ་བཟང་པོ་འདི་ལ་ཆགས་པའི་དུས་དང་། གནས་པའི་དུས་དང་། འཇིག་པའི་དུས་དང་གསུམ་གནས་པའི་བསྐལ་པ་དེ་ལའང་ཡ་ཐོག་རིང་མོ་དང་།མ་ཐོག་རིང་མོ་དང་། བར་གྱི་ཁུག་པ་བཅོ་བརྒྱད་དུ་གྲགས་པ་སྟེ་བར་བསྐལ་ཉི་ཤུ་ཡོད་པ་ལས། ཡ་ཐོག་རིང་མོའི་གཤམ་གྱི་དུས་ཏེ། དེའང་ཐུབ་པའི་བསྟན་པ་ལུང་གི་དུས་ཀྱི་ལྔ་བརྒྱ་བ་ཕྲག་གསུམ་ལས་དཀྱིལ་སྨད་ཙམ་དུ་ཕྱིན་པ་བདག་ཅག་གི་སྟོན་པ་རྣམ་འདྲེན་བཞི་བ་ཤཱཀྱའི་དབང་པོ་ས་དེ་ཉིད་ཞིང་འདིའི་ངོ་སྐལ་གྱི་སྤྲུལ་པའི་སྣང་བརྙན་ཉེ་བར་བསྟན་ནས་ད་ལྟའི་བར་གྱི་འདས་ལོའི་ཚུལ་ལ་མཁས་པ་དག་གིས་དཔྱད་པས་བཞེད་པ་མི་མཐུན་པ་མང་དུ་བྱུང་བ་ལས། དེང་སང་ཡོངས་སུ་གྲགས་པ་པད་དཀར་ཞལ་ལུང་པའི་ལུགས་ཀྱིས་སྟོན་པ་དྲག་པོ་ལྕགས་སྤྲེལ་ས་ག་ཟླ་བའི་ཚེས་བདུན་ཟླ་སྐར་རྒྱལ་གྱི་དུས་སུ་སྐུ་བལྟམ་པ་ནས། བགྲང་བྱ་ཉིས་སྟོང་དང་དྲུག་བརྒྱ་བརྒྱད་ཅུ་རྩ་དགུ་འདས་ཤིང་། རྒྱལ་བ་ཤིང་རྟ་ས་ག་ཟླ་བའི་བཅོ་ལྔ་ལ་མངོན་པར་རྫོགས་པར་སངས་རྒྱས་ནས། ལོ་དེའི་ཆུ་སྟོད་ཅན་གྱི་ཚེས་བཞིར་ལྔ་སྡེ་ལ་ཆོས་ཀྱི་འཁོར་ལོ་བསྐོར་ནས་ཉིས་སྟོང་དྲུག་བརྒྱ་ལྔ་བཅུ་རྩ་ལྔ་འདས་པ། དེ་བཞིན་དུ་ལྕགས་འབྲུག་ནག་ཉ་ས་ག་ཟླ་བའི་ཚེས་བཅོ་ལྔའི་གུང་ཐུན་ལ་དགོངས་པ་ཞི་དབྱིངས་སུ་མནལ་བའི་ཚུལ་བསྟན་ནས་ཉིས་སྟོང་དྲུག་བརྒྱ་དགུ་འདས་ཤིང་། ཆོས་རྗེ་ས་སྐྱ་པའི་ལུགས་ཀྱིས་སྟོན་པ་རྣམ་འབྱུང་ས་འབྲུག་ལ་སྐུ་བལྟམ་ཞིང་། ཐམས་ཅད་འདུལ་ས་ཕག་ལོར་གཤེགས་ནས་སུམ་སྟོང་བརྒྱད་བརྒྱ་དྲུག་ཅུ་རྩ་གཅིག་འདས་པ། ཁ་ཆེ་པཎ་ཆེན་ཤཱཀྱ་ཤྲཱིའི་ལུགས་ཀྱིས་མེ་མོ་སྦྲུལ་ལ་སྐུ་བལྟམ་ཞིང་མེ་བྱི་ལོར་གཤེགས་ནས་ཉིས་སྟོང་ཉིས་བརྒྱ་བདུན་ཅུ་དོན་གཅིག་འདས་པ། ཇོ་བོ་རྗེ་དཔལ་ལྡན་ཨ་ཏི་ཤའི་བཞེད་པས་ཤིང་མོ་གླང་ལ་སྐུ་བལྟམ་ཞིང་ཤིང་སྤྲེལ་ལ་གཤེགས་པའི་ཚུལ་བསྟན་ནས་སུམ་སྟོང་བརྒྱད་བརྒྱ་དྲུག་ཅུ་རྩ་བཞི་འདས་པ། སྟོབས་ཀྱི་འཁོར་ལོས་སྒྱུར་བ་གནམ་སྐོས་གོང་མ་ཆེན་པོ་གཡུང་ཅིན་གསེར་ཁྲིར་ཕེབས་ནས་ཉག་མ་བདུན་ཐལ་བ།