ཆོས་ཀྱི་ཐེག་ལ་བདག་ཀྱང་བསྐྱོན་དུ་གསོལ། །ས་ཆེན་བཞི་ཡི་སྟོབས་ཀྱི་སྟོབས་ལྡན་པ། །སྙིང་རྗེའི་མཐུ་དང་ཤུགས་ཀྱིས་ཁུར་ཁྱེར་ཞིང་། །ཡེ་ཤེས་ལོ་ཏོག་འགྲོ་བ་ཉེར་འཚོ་བའི། །ཐེག་པའི་མཆོག་ལ་བདག་ཀྱང་བསྐྱོན་དུ་གསོལ། །ཉི་མ་ལྟ་བུར་འགྲོ་བ་ཉེར་འཚོ་ཞིང་། །བསྡུ་བ་རབ་ཡངས་འཁོར་གྱི་དཀྱིལ་འཁོར་ཅན། །གཟུངས་ཀྱི་སྟོབས་མཆོག་དག་པའི་འོད་བཟང་བའི། །ཡེ་ཤེས་ཉི་མ་བདག་ལ་བསྟན་ཏུ་གསོལ། །བསྐལ་པ་མང་པོ་དུ་མར་རབ་བསླབས་པས། རྒྱུ་ཡི་ཚུལ་དང་སུ་ཀུན་མཁས་གྱུར་པ། །གང་གིས་འདུས་བྱས་གྲོང་ཁྱེར་གཞོམ་འགྱུར་བའི། །ཤེས་བརྟན་རྡོ་རྗེ་འཕགས་པས་བདག་ལ་སྩལ་དུ་གསོལ། །སངས་རྒྱས་ལེགས་ཀུན་བསླབ་པ་ཕུན་སུམ་གྱིས། །ཡེ་ཤེས་རྒྱ་མཚོ་ཡངས་པ་གང་ཞིག་ལ། །ཚད་མེད་རྒྱ་མཚོའི་བློ་མང་བསླབ་གྱུར་པས། །དེ་ལེགས་ཅི་འདྲ་འཕགས་པས་བཀའ་སྩལ་གསོལ། །གང་ན་ཡང་དག་སྤྱན་མངའ་ཁྱོད་བཞུགས་ཤིང་། །ཡེ་ཤེས་རྒྱལ་པོའི་ཅོད་པན་ལེགས་བརྒྱན་ཏེ། །ཆོས་ཀྱི་དབུ་ཐོད་དམ་པས་དབུ་བཅིངས་པའི། །ཆོས་ཀྱི་རྒྱལ་པོའི་ཕོ་བྲང་བདག་ཀྱང་སྟོན། དེ་ནས་འཇམ་དཔལ་གཞོན་ནུར་གྱུར་པས་གླང་པོའི་ལྟ་སྟངས་ཀྱིས་བལྟས་ཏེ། ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་དེ་ལྟར་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དགེ་བའི་བཤེས་གཉེན་གྱི་རྗེས་སུ་འབྲང་ཞིང་བྱང་ཆུབ་སེམས་དཔའི་ལམ་ཡོངས་སུ་རྫོགས་པར་བྱ་བར་འདོད་དེ། བྱང་ཆུབ་སེམས་དཔའི་སྤྱོད་པ་ཡོངས་སུ་དྲི་བར་བསམ་པ་ལེགས་སོ་ལེགས་སོ། །རིགས་ཀྱི་བུ་འདི་ལྟ་སྟེ། དགེ་བའི་བཤེས་གཉེན་རྣམས་ལ་བསྙེན་ཅིང་བསྟེན་པ་དང་། རིམ་གྲོར་བྱ་བ་འདི་ནི་ཐམས་ཅད་མཁྱེན་པ་ཉིད་ཡོངས་སུ་གྲུབ་པར་འགྱུར་བའི་གཞི་ཡིན་ཏེ་འདི་ནི་མཐུན་པའི་རྒྱུ་ཡིན་གྱིས། རིགས་ཀྱི་བུ་དེ་བས་ན་ཁྱོད་ཀྱིས་དགེ་བའི་བཤེས་བསྙེན་བཀུར་བས་ཡོངས་སུ་མ་སྐྱོ་བར་གྱིས་ཤིག