སྤོས་སྣ་ཚོགས་ཀྱིས་དྲི་ཞིམ་པོར་བྱས་པའི་ཆ་ཡན་ལག་བརྒྱད་དང་ལྡན་པའི་ཆར་གྱི་རྒྱུན་ཕྲ་མོ་འབབ་པར་མཐོང་ངོ་། །རིན་པོ་ཆེ་བཻ་ཌཱུརྱའི་ཕྲེང་བའི་དྲ་བ་དེ་དག་ལས་ཀྱང་། མར་མྱེའི་ཕྲེང་བ་རབ་ཏུ་འབར་བ་མང་པོ་མཐོང་བར་གྱུར་ཏོ། །རིན་པོ་ཆེའི་གདུགས་དེ་དག་ཀྱང་རྒྱན་དང་། ལྷབ་ལྷུབ་ཐམས་ཅད་ཀྱིས་མཛེས་པར་བརྒྱན་ཏེ། རིན་པོ་ཆེའི་དྲིལ་དང་། དྲིལ་བུ་གཡེར་ཁའི་དྲ་བ་དང་། དར་གྱི་ལྡ་ལྡི་དང་། ཆུན་པོ་དང་། རིན་པོ་ཆེའི་ཤར་བུ་དང་། ནོར་བུ་རིན་པོ་ཆེ་སྣ་ཚོགས་ཀྱིས་སྒོ་ངས་ཡོངས་སུ་བརྒྱན་པའི་སྙིང་པོ་དང་ལྡན་པ་མཐོང་ངོ་། །རྫིང་དེ་དག་ནས་ཀྱང་། རིན་པོ་ཆེའི་མེ་ཏོག་པད་མོ་དང་། ཨུཏ་པལ་དང་། ཀུ་མ་ད་དང་། བུན་ད་རི་ཀ་གྲངས་མེད་པ་མངོན་པར་འཐོན་པར་མཐོང་སྟེ། ལ་ལ་ནི་མཐོ་གང་འཁོར་བ་ཙམ། ལ་ལ་ནི་འདོམ་གང་འཁོར་བ་ཙམ། ལ་ལ་ནི་ཤིང་རྟའི་འཁོར་ལོ་ཙམ་སྟེ། དེ་དག་ལ་ཡང་གཟུགས་སྣ་ཚོགས་ཀྱི་རྒྱན་མང་པོ་འཁོད་པར་མཐོང་སྟེ། འདི་ལྟར་བུད་མེད་ཀྱི་གཟུགས་དང་། སྐྱེས་པའི་གཟུགས་དང་། ཁྱེའུའི་གཟུགས་དང་། བུ་མོའི་གཟུགས་དང་། བརྒྱ་བྱིན་གྱི་གཟུགས་དང་། ཚངས་པའི་གཟུགས་དང་། འཇིག་རྟེན་གྱི་མགོན་པོའི་གཟུགས་དང་། ལྷ་དང་ཀླུ་དང་། གནོད་སྦྱིན་དང་དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོའི་གཟུགས་དང་། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་གཟུགས་དང་། འགྲོ་བ་ཐམས་ཅད་ཀྱི་གཟུགས་ཀྱི་དབྱིབས་སུ་འདུག་པའི་ལུས་ཁ་དོག་སྣ་ཚོགས་རྣམ་པ་དུ་མ་དང་ལྡན་པ་མང་པོ་ཐལ་མོ་སྦྱར་ཏེ། ལུས་འདུད་ཅིང་། ཕྱག་འཚལ་བར་འཁོད་པར་མཐོང་ངོ་། །དེ་བཞིན་གཤེགས་པའི་སྐུ་གཟུགས། མྱི་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ་སྐྱིལ་མོ་ཀྲུང་དུ་བཅས་ཏེ་བཞུགས་པ་དག་ཀྱང་མཐོང་ངོ་། །ས་ཆེན་པོའི་གཞི་བཻ་ཌཱུརྱ་ལས་གྲུབ་པ། མྱིག་མངས་རིས་སུ་འདུག་པའི་མྱིག་མངས་རིས་རེ་རེ་ནས་ཀྱང་གཟུགས་བརྙན་རྣམ་པར་དམྱིགས་པ་བསམ་གྱིས་མི་ཁྱབ་པ་མང་པོ་མཐོང་བར་གྱུར་ཏེ།