ལ་ལར་ནི་ཡི་གེར་འདྲི་བ་དང་། ལ་ལར་ནི་དྲི་བ་ཡོངས་སུ་འདྲི་བ་དང་། ལ་ལར་ནི་ཕུང་པོ་གསུམ་པའི་བཤགས་པ་དང་། ཡོངས་སུ་བསྔོ་བ་ལ་བརྩོན་པ་དང་། ལ་ལར་ནི་སྨོན་ལམ་མངོན་པར་སྒྲུབ་པ་བྱེད་པ་མཐོང་ངོ་། །ཀ་བ་དེ་དག་ལས་ཀྱང་རིན་པོ་ཆེའི་རྒྱལ་པོ་ཐམས་ཅད་ཀྱི་འོད་ཀྱི་དྲ་བ་མང་པོ་འབྱུང་བ་མཐོང་སྟེ། ལ་ལ་ལས་ནི་ཁ་དོག་སྔོན་པོ་དང་། ལ་ལ་ལས་ནི་ཁ་དོག་སེར་པོ་དང་། ལ་ལ་ལས་ནི་ཁ་དོག་དམར་པོ་དང་། ལ་ལ་ལས་ནི་ཁ་དོག་དཀར་པོ་དང་། ལ་ལ་ལས་ནི་ཤེལ་གྱི་ཁ་དོག་དང་། ལ་ལ་ལས་ནི་གསེར་གྱི་ཁ་དོག་དང་། ལ་ལ་ལས་ནི་ཨིན་དྲ་ནཱི་ལའི་ཁ་དོག་དང་། ལ་ལ་ལས་ནི་འཇའི་ཁ་དོག་དང་། ལ་ལ་ལས་ནི་འཛམ་བུ་ཆུ་ཀླུང་གི་གསེར་གྱི་ཁ་དོག་དང་། ལ་ལས་ནི་འོད་ཐམས་ཅད་དུ་སྣང་བའི་ཁ་དོག་དང་། ལུས་དང་སེམས་ཀྱི་བདེ་བསྐྱེད་པ་བལྟ་ན་མཆོག་ཏུ་མཛེས་པ་མཐོང་བར་གྱུར་ཏོ། །འཛམ་བུ་ཆུ་ཀླུང་གི་གསེར་གྱི་ཆུ་ཤིང་གི་ཀ་བ་དེ་དག་དང་། རིན་པོ་ཆེ་ཐམས་ཅད་ཀྱི་གཟུགས་དེ་དག་ཀྱང་ལག་ནས་མེ་ཏོག་གི་སྤྲིན་མངོན་པར་སྤྱོད་པར་མཐོང་སྟེ། ལག་ནས་ཕྲེང་བའི་ལྡ་ལྡི་དང་། ལག་ནས་གོས་དང་། ལག་ནས་གདུགས་དང་། རྒྱལ་མཚན་དང་། བ་དན་དང་། ལག་ནས་སྤོས་དང་། བདུག་སྤོས་དང་། བྱུག་པ་དང་། ལག་ནས་ནོར་བུ་རིན་པོ་ཆེའི་དྲ་བ་དང་། ལག་ནས་རིན་པོ་ཆེ་སྣ་ཚོགས་དང་། གསེར་གྱི་ལྕག་ཕོད་སྣ་ཚོགས་དང་། ལག་ནས་མུ་ཏིག་སྣ་ཚོགས་ཀྱི་སེ་མོ་དོ་དང་། ལག་ནས་རིན་པོ་ཆེ་སྣ་ཚོགས་ཀྱི་སེ་མོ་དོ་མངོན་པར་སྦྱོང་བ་དང་། ལག་ན་རྒྱན་ཐམས་ཅད་ཐོགས་པར་མཐོང་ངོ་། །ལ་ལ་ནི་གཙུག་གི་རིན་པོ་ཆེ་དང་། ཅོད་པན་གྱིས་འདུད་ཅིང་མྱིག་མྱི་འགེབས་པར་བལྟ་བ་དང་། ཐལ་མོ་སྦྱར་ཞིང་ཕྱག་འཚལ་བར་མཐོང་ངོ་། །མུ་ཏིག་གི་ཕྲེང་བ་དེ་དག་ལས་ཀྱང་། སྤོས་སྣ་ཚོགས་ཀྱིས་དྲི་ཞིམ་པོར་བྱས་པའི་ཆ་ཡན་ལག་བརྒྱད་དང་ལྡན་པའི་ཆར་གྱི་རྒྱུན་ཕྲ་མོ་འབབ་པར་མཐོང་ངོ་།