།ཕུང་པོའི་གཤེད་མས་གཙེས་པ་རྣམས་ལ་མྱ་ངན་ལས་འདས་པའི་གྲོང་ཁྱེར་བསྟན་པར་འདོད་པའོ། །ཁམས་ཀྱི་སྦྲུལ་གྱིས་ཀུན་ནས་འཁོར་བ་རྣམས་ལ་འཕགས་པའི་ལམ་གྱིས་འབྱུང་བ་བསྟན་པར་འདོད་པའོ། །སྐྱེ་མཆེད་ཀྱི་གྲོང་སྟོང་པ་ན་གནས་པ་རྣམས་ལ་ཤེས་རབ་ཀྱི་སྣང་བས་གདོན་པར་འདོད་པའོ། །མུ་སྟེགས་ངན་པ་ལ་ཞུགས་པའི་སེམས་ཅན་རྣམས་ཡང་དག་པའི་མུ་སྟེགས་སུ་གཟུད་པར་འདོད་པའོ། །བཤེས་གཉེན་མ་ཡིན་པའི་ལག་ཏུ་ལྟུང་བ་རྣམས་ལ་ཡང་དག་པའི་དགེ་བའི་བཤེས་གཉེན་བསྟན་པར་འདོད་པའོ། །བྱིས་པའི་ཆོས་ཀྱི་སྤྱོད་ཡུལ་ལ་མངོན་པར་མོས་པ་རྣམས་འཕགས་པའི་ཆོས་ལ་རབ་ཏུ་དགོད་པར་འདོད་པའོ། །འཁོར་བའི་ཁྱིམ་ལ་མངོན་པར་དགའ་བ་རྣམས་གྱེན་དུ་བསྐྱོད་དེ་ཐམས་ཅད་མཁྱེན་པའི་ཕོ་བྲང་དུ་གཟུད་པར་འདོད་པའོ། །རིགས་ཀྱི་བུ་དག་དེ་ལྟར་སྐྱེས་བུ་དམ་པ་འདི་ནི་སེམས་ཅན་ཡོངས་སུ་བསྐྱོབ་པའི་བློ་གྲོས་དེ་ལྟ་བུས་བྱང་ཆུབ་ཏུ་སེམས་བསྐྱེད་པ་རྣམ་པར་དག་པར་བྱ་བ་ཡོངས་སུ་བཙལ་བ་ལ་རྒྱུན་མི་འཆད་པའོ། །ཐེག་པ་ཆེན་པོ་ཡོངས་སུ་བསྒྲུབ་པའི་ཕྱིར་ཡོངས་སུ་སྐྱོ་བ་མེད་པའོ། །ཆོས་ཀྱི་སྤྲིན་ཐམས་ཅད་ལས་འཐུང་བས་མི་ངོམས་པའོ། །ཚོགས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་རྟག་ཏུ་བརྩོན་པའོ། །ཆོས་ཀྱི་སྒོ་ཐམས་ཅད་ཡོངས་སུ་སྦྱང་བའི་ཕྱིར་མི་གཏོང་བ་ལ་བརྩོན་པའོ། །བྱང་ཆུབ་སེམས་དཔའི་སྤྱོད་པ་ཐམས་ཅད་སྤྱད་པའི་ཕྱིར་བརྩོན་འགྲུས་མི་གཏོང་བའོ། །སྨོན་ལམ་ཐམས་ཅད་མངོན་པར་བསྒྲུབ་པའི་ཕྱིར་མི་ལྡོག་པའི་སྦྱོར་བ་དང་ལྡན་པའོ། །དགེ་བའི་བཤེས་གཉེན་ཐམས་ཅད་མཐོང་བར་བྱ་བས་མི་ངོམས་པའོ། །དགེ་བའི་བཤེས་གཉེན་ཐམས་ཅད་བསྙེན་བཀུར་བས་ལུས་ལ་དུབ་པར་འགྱུར་བ་མེད་པའོ། །དགེ་བའི་བཤེས་གཉེན་ཐམས་ཅད་གདམས་ངག་དང་རྗེས་སུ་བསྟན་པ་ལ་མཐུན་པར་འཛིན་པ་སྟེ། རིགས་ཀྱི་བུ་དག་སེམས་ཅན་གྱི་འཇིག་རྟེན་ན་སེམས་ཅན་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་འདེབས་པ་དེ་ལྟ་བུའི་སེམས་ཅན་དཀོན་ནོ། །དེ་བས་ཀྱང་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ཏེ།