སྒྲིབ་པའི་སྒོ་གླེགས་གཞོམ་པ་དང་། སྒྲིབ་པའི་རི་རྣམ་པར་གཏོར་བ་དང་། སྲེད་པའི་དྲ་བ་ནས་གདོན་པ་དང་། མ་རིག་པའི་ཀུན་ཏུ་སྦྱོར་བ་ལས་དབྱེ་བ་དང་། སྲིད་པའི་ཆུ་བོ་ལས་བསྒྲལ་བ་དང་། གཡོ་དང་སྒྱུ་སྤང་བ་དང་སེམས་ཀྱི་རྙོག་པ་གདང་བ་དང་། ཐེ་ཚོམ་དང་ཡིད་གཉིས་དང་ནེམ་ནུར་བསྩལ་བ་དང་། མི་ཤེས་པའི་ཆུ་བོ་ཆེན་པོ་ལས་བསྒྲལ་བ་དང་། འཁོར་བའི་སྐྱོན་ཐམས་ཅད་རྣམ་པར་སྨད་པའི་ཕྱིར་རབ་ཏུ་ཞུགས་པའོ། །རིགས་ཀྱི་བུ་སྐྱེས་བུ་དམ་པ་འདི་ནི་སེམས་ཅན་རྣམས་ཆུ་བོ་བཞི་ལས་ཡོངས་སུ་བསྒྲལ་བའི་ཕྱིར་ཆོས་ཀྱི་གྲུ་ཆེན་པོ་ཡང་དག་པར་བཤམ་པར་འདོད་པའོ། །ལྟ་བའི་འདམ་དུ་བྱིང་བ་རྣམས་ཆོས་ཀྱི་རྐང་སྟེགས་ཆེན་པོ་དགོད་པར་འདོད་པའོ། །གཏི་མུག་གི་མུན་པར་འཐོམས་པ་རྣམས་ལ་ཡེ་ཤེས་ཀྱི་སྣང་བ་དབྱུང་བར་འདོད་པའོ། །འཁོར་བའི་མྱ་ངམ་དུ་འཁྱམས་པ་རྣམས་ལ་འཕགས་པའི་ལམ་བསྟན་པར་འདོད་པའོ། །ཉོན་མོངས་པའི་ནད་ཆེན་པོས་གཟིར་བ་རྣམས་ལ་ཆོས་ཀྱི་སྨན་སྦྱིན་པར་འདོད་པའོ། །སྐྱེ་བ་དང་རྒ་བ་དང་འཆི་བས་གཙེས་པ་རྣམས་ལ་འཆི་བ་མེད་པའི་དབྱིངས་སྦྱིན་པར་འདོད་པའོ། །མེ་གསུམ་རབ་ཏུ་འབར་བ་རྣམས་ལ་ཞི་གནས་ཀྱི་ཆུས་རབ་ཏུ་ཞི་བར་བྱ་བར་འདོད་པའོ། །མྱ་ངན་དང་སྨྲེ་སྔགས་འདོན་པ་དང་ཡིད་མི་བདེ་བ་དང་འཁྲུག་པས་གདུངས་པ་རྣམས་ལ་དབུགས་ཕྱིན་པ་ཆེན་པོ་སྦྱིན་པར་འདོད་པའོ། །སྲིད་པའི་བཙོན་རས་འཁོར་བ་རྣམས་ལ་ཡེ་ཤེས་ཀྱི་མཚོན་ཆ་སྦྱིན་པར་འདོད་པའོ། །ལྟ་བའི་བཅིངས་པས་གླགས་པ་རྣམས་ལ་ཤེས་རབ་ཀྱི་མཚོན་ཆས་བསྡུད་པར་འདོད་པའོ། །ཁམས་གསུམ་གྱི་གྲོང་ཁྱེར་གྱི་འཁོར་བ་རྣམས་ལ་ཐར་བའི་སྒོ་བསྟན་པར་འདོད་པའོ། །ཕྱོགས་མི་བདེ་བར་མངོན་པར་གཞོལ་བ་རྣམས་ལ་བདེ་བའི་ཕྱོགས་བསྟན་པར་འདོད་པའོ། །ཉོན་མོངས་པའི་ཆོམ་པོས་གཙེས་པ་རྣམས་ལ་དབུགས་ཕྱིན་པ་ཆེན་པོ་སྦྱིན་པར་འདོད་པའོ། །ངན་སོང་གི་གཡང་སས་འཇིགས་ཤིང་སྐྲག་པ་རྣམས་ལ་འཇུ་སའི་ལག་པ་བརྐྱང་བར་འདོད་པའོ། །ཕུང་པོའི་གཤེད་མས་གཙེས་པ་རྣམས་ལ་མྱ་ངན་ལས་འདས་པའི་གྲོང་ཁྱེར་བསྟན་པར་འདོད་པའོ།