།ཁྱོད་ཀྱིས་ལས་ཀྱི་དཀྱིལ་འཁོར་རྣམ་པར་སྦྱངས། །ཉོན་མོངས་དཀྱིལ་འཁོར་ཁྱོད་ཀྱིས་དག་པར་བྱས། །ཡེ་ཤེས་རྒྱུད་ནི་རྣམ་པར་སྦྱོང་བར་འགྱུར། །ཆོས་ཀྱི་རྒྱུད་ནི་རབ་ཏུ་བརྗོད་པར་འགྱུར། །ལས་དང་ཉོན་མོངས་སྡུག་བསྔལ་འཁྲུལ་འཁོར་རྒྱུད། །རིང་པོར་མི་ཐོགས་རྣམ་པར་ཟློག་པར་འགྱུར། །འཇིག་རྟེན་འཁོར་ལོ་སྲིད་པའི་འཁོར་ལོ་རྟེན། །ཤུ་བའི་ལམ་རྒྱུད་ལྔ་ཡི་འཁོར་ལོར་རྨོངས། །འགྲོ་ཀུན་སྡུག་བསྔལ་འཁོར་ལོ་གཅོད་པ་ཡི། །ཆོས་ཀྱི་འཁོར་ལོ་དམ་པ་བསྐོར་བར་འགྱུར། །སངས་རྒྱས་རིགས་ནི་རྗེས་སུ་འཛིན་པར་འགྱུར། །ཆོས་ཀྱི་རིགས་ནི་ཡོངས་སུ་སྦྱོང་བར་འགྱུར། །དགེ་འདུན་རིགས་ནི་ཡོངས་སུ་བསྡུད་པར་འགྱུར། །རིན་ཆེན་འབྱུང་བའི་འབྱུང་གནས་ཁྱོད་འགྱུར་རོ། །སྲེད་པའི་དྲ་བ་རྣམ་པར་ཟློག་པར་འགྱུར། །ལྟ་བའི་དྲ་བ་ཐིབས་པོ་དེ་བཞིན་ཏེ། །འགྲོ་བའི་སྡུག་བསྔལ་དྲ་བ་འགྲེལ་པར་འགྱུར། །སྨོན་ལམ་དྲ་བ་དེ་འདྲ་ཁྱོད་ཀྱིས་སྦྱངས། །སེམས་ཅན་ཁམས་ནི་ཡོངས་སུ་སྨིན་བྱེད་འགྱུར། །འཇིག་རྟེན་ཁམས་ནི་ཡོངས་སུ་སྦྱོང་བར་འགྱུར། །ཡེ་ཤེས་ཁམས་ནི་ཤིན་ཏུ་དག་བྱེད་འགྱུར། །ཁྱོད་ཀྱི་བསམ་པའི་ཁམས་ནི་དེ་འདྲའོ། །ནོར་བཟངས་དགའ་བ་འཕེལ་བར་བྱེད་པ་ཁྱོད། །སེམས་ཅན་ཀུན་ལ་ཕན་བདེ་དགའ་བྱེད་འགྱུར། །བྱང་ཆུབ་སེམས་དཔའ་རིགས་རྒྱུད་དགའ་བྱེད་ཅིང་། །སངས་རྒྱས་ཐམས་ཅད་སྨོན་ལམ་དགའ་བྱེད་འགྱུར། །སེམས་ཅན་ཀུན་གྱི་འགྲོ་བའི་གནས་སྟོན་པ། །ཞིང་རྣམས་ཐམས་ཅད་གཟུགས་བརྙན་སྣང་སྟོན་པ། །ཆོས་རྣམས་ཐམས་ཅད་སྣང་བ་རབ་སྟོན་པའི། །ལྟ་ན་བཟང་བའི་རྒྱལ་བར་ཁྱོད་འགྱུར་རོ། །ཆོས་དབྱིངས་སྣང་བར་བྱེད་པའི་འོད་ལྡན་པ། །སེམས་ཅན་ཁམས་རྣམས་བདེ་བྱེད་འོད་ལྡན་པ། །ངན་སོང་ཐམས་ཅད་ཞི་བྱེད་འོད་ལྡན་པའི། །སྲིད་གསུམ་སྡུག་བསྔལ་ཞི་བར་བྱེད་པར་འགྱུར། །མཐོ་རིས་ལམ་ནི་ཉེ་བར་སྟོན་པར་འགྱུར། །སངས་རྒྱས་ལམ་ནི་འགྲོ་ལ་འབྱེད་པར་འགྱུར། །ཐར་བའི་ལམ་དུ་འགྲོ་བ་ཁྲིད་པར་འགྱུར། །དེ་འདྲའི་ལམ་ནི་ཁྱོད་ཀྱིས་རྣམ་པར་སྦྱངས།