།འདི་ནི་འགྲོ་རྒྱུད་ཀུན་གྱི་བདེ་བ་སྟོབས། །འདི་ནི་སྲིད་པ་ཀུན་གྱི་ཞགས་པ་འཐུབ། །སྲིད་པའི་འགྲོ་རྒྱུད་ཐམས་ཅད་སེལ་བར་འགྱུར། །ལྟ་བ་དོགས་པ་རྣམ་པར་འབྱེད་པར་འགྱུར། །སྲིད་པའི་འཁྲི་ཤིང་དྲ་བ་གཅོད་པར་འགྱུར། །ཆགས་པའི་འདོད་ཆགས་ཉེ་བར་སྦྱོང་བར་འགྱུར། །སྲིད་གསུམ་ལམ་ཡང་ཡོངས་སུ་སྟོན་པར་འགྱུར། །འདི་ནི་འཇིག་རྟེན་མགོན་དང་སྐྱབས་ཡིན་ཏེ། །འདི་ནི་འགྲོ་བ་ཀུན་ལ་འོད་བྱེད་པའོ། །རྣམ་པ་ཀུན་ཏུ་སྲིད་པ་སེལ་ལ་མཁས། །ས་གསུམ་ཀུན་གྱི་འདྲེན་པར་འདི་འགྱུར་རོ། །ཉོན་མོངས་གཉིད་ལོག་འགྲོ་བ་སད་པར་བྱེད། །འདོད་པའི་འདམ་ལས་མཁས་པ་འདི་སྒྲོལ་ཏེ། །འདུ་ཤེས་ཆགས་ལས་ཡོངས་སུ་འདི་ཡང་འགྲེལ། །བཅིངས་པ་ཀུན་ལས་ཐར་བར་བྱེད་པར་འགྱུར། །ཆོས་དབྱིངས་གཞི་ཡི་བྱེ་བྲག་སྣང་བར་བྱེད། །འཇིག་རྟེན་ཁམས་ཀྱི་བྱེ་བྲག་སྦྱོང་བར་འགྱུར། །ཆོས་ཀུན་གཞི་ཡི་བྱེ་བྲག་ཕ་རོལ་ཕྱིན། །ནོར་བཟངས་ཁྱོད་ནི་དགའ་བ་སྐྱེད་པར་འགྱུར། །མཁས་པ་ཁྱོད་ཀྱི་སྦྱོར་བའི་ཚུལ་དག་དང་། །དག་ཅིང་ཁྱོད་ལ་སྨད་པ་མེད་ཚུལ་དང་། །ཁྱོད་ཀྱི་བསམ་པའི་ཡོན་ཏན་ལྡན་ཚུལ་ལས། །བསམ་པ་ཐམས་ཅད་ཡོངས་སུ་རྫོགས་པར་འགྱུར། །ཁྱོད་ཀྱི་བདག་ཉིད་དགེ་བར་བྱས་ཚུལ་གྱིས། །རིང་པོར་མི་ཐོགས་སངས་རྒྱས་ཀུན་མཐོང་འགྱུར། །རིང་པོར་མི་ཐོགས་ཞིང་རྣམས་ཀུན་འགྲོར་འགྱུར། །ཆོས་ཀུན་རིང་པོར་མི་ཐོགས་ཤེས་པར་འགྱུར། །ཞིང་རྣམས་རྒྱ་མཚོ་རྣམ་པར་སྦྱོང་བར་འགྱུར། །སེམས་ཅན་རྒྱ་མཚོ་རྣམ་པར་འགྲེལ་བར་འགྱུར། །སྤྱོད་པ་རྒྱ་མཚོ་ཡོངས་སུ་རྫོགས་པར་འགྱུར། །ཁྱོད་ཀྱི་ཡོན་ཏན་རྒྱ་མཚོ་དེ་འདྲའོ། །ཁྱོད་ཀྱི་མོས་པའི་དཀྱིལ་འཁོར་ཚུལ་ལས་ན། །ཁྱོད་ནི་ཡོན་ཏན་རྣམས་ཀྱི་སྣོད་དུ་འགྱུར། །ཁྱོད་ནི་དགེ་བ་ཡང་དག་འབྱུང་གནས་འགྱུར། །ཁྱོད་ནི་རྒྱལ་བའི་སྲས་དང་མཉམ་པར་འགྱུར། །ཁྱོད་ཀྱི་སྨོན་ལམ་དཀྱིལ་འཁོར་ཚུལ་ལས་ན། །ཁྱོད་ཀྱིས་བདུད་ཀྱི་དཀྱིལ་འཁོར་ཕམ་པར་བྱས། །ཁྱོད་ཀྱིས་ལས་ཀྱི་དཀྱིལ་འཁོར་རྣམ་པར་སྦྱངས།