བྱང་ཆུབ་སེམས་དཔའ་གཞན་དུ་མི་འགྲོ་བའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་བྱང་ཆུབ་སེམས་དཔའི་སྤྱོད་པ་རྒྱ་ཆེན་པོའི་རྗེས་སུ་སོང་བའི་སེམས་དང་ལྡན་པ། བྱང་ཆུབ་སེམས་དཔའ་གཞན་དུ་མི་འགྲོ་བའི་ཡེ་ཤེས་ཀྱི་སྤྱོད་ཡུལ་འདོད་པའི་ངང་ཚུལ་ཅན་མངོན་པར་ཤེས་པ་ཆེན་པོ་མངོན་པར་བསྒྲུབ་པའི་ཡུལ་ལ་ཡོན་ཏན་གྱི་ཁྱད་པར་དུ་ལྟ་བ། བརྩོན་འགྲུས་བརྟན་པའི་གོ་ཆ་རབ་ཏུ་དགའ་བའི་ཁྱད་པར་ཐོབ་པ། བསམ་གྱིས་མི་ཁྱབ་པའི་རྣམ་པར་ཐར་པས་རྣམ་པར་རྩེ་བའི་རྗེས་སུ་སོང་བའི་བསམ་པ་དང་ལྡན་པ་དེ་བྱང་ཆུབ་སེམས་དཔའི་ཡོན་ཏན་གྱི་ས་ལ་ནི་ནན་ཏན་དུ་བྱེད། ཏིང་ངེ་འཛིན་གྱི་ས་ལ་ནི་རྣམ་པར་དཔྱོད། གཟུངས་ཀྱིས་ལ་ནི་རབ་ཏུ་གནས་པར་བྱེད། སྨོན་ལམ་གྱི་ས་ལ་ནི་འཇུག་པར་བྱེད། སོ་སོ་ཡང་དག་པར་རིག་པའི་ས་ལ་ནི་རྗེས་སུ་སློབ། སྟོབས་ཀྱིས་ལ་ནི་ཡོངས་སུ་བསྒྲུབ་ཅིང་མཐར་གྱིས་གྲོང་ཁྱེར་སྒོ་དང་ལྡན་པ་གང་ན་བ་དེར་སོང་སྟེ། ལྷ་ལྷ་ཆེན་པོ་ཀུན་དུ་དྲིས་པ་དང་། དེ་ལ་འགྲོ་བ་མང་པོས་བསྟན་པ། རིགས་ཀྱི་བུ་འདེ་རེ། ལྷ་ལྷ་ཆེན་པོ་གྲོང་ཁྱེར་གྱི་ལམ་གྱི་བཞི་མདོ་ན་བདག་ཉིད་ཤིན་ཏུ་ཆེ་བས་སེམས་ཅན་རྣམས་ལ་ཆོས་སྟོན་ཅིང་འདུག་གོ །དེ་ནས་ཚོང་དཔོན་གྱི་བུ་ནོར་བཟངས་ལྷ་ལྷ་ཆེན་པོ་གང་ན་བ་དེར་སོང་སྟེ། ལྷ་ལྷ་ཆེན་པོའི་རྐང་པ་གཉིས་ལ་སྤྱི་བོས་ཕྱག་འཚལ་ནས། མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ་ཞེས་བདག་གིས་ཐོས་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་འཕགས་པས་བདག་ལ་བཤད་དུ་གསོལ། །དེ་ནས་ལྷ་ལྷ་ཆེན་པོས་ལག་པ་བཞི་ཕྱོགས་བཞིར་བརྐྱང་སྟེ། རྒྱ་མཚོ་ཆེན་པོ་བཞི་ལས་ཤིན་ཏུ་མྱུར་བའི་ཤུགས་ཀྱིས་ཆུ་བླངས་ཏེ། བདག་གིས་གདོང་བཀྲུས་ནས་ཚོང་དཔོན་གྱི་བུ་ནོར་བཟངས་ལ་གསེར་གྱི་མེ་ཏོག་གིས་གཏོར་ཏེ་འདི་སྐད་ཅེས་སྨྲས་སོ།