རང་གི་ལུས་ཀྱང་དེ་དག་ལ་བྱིན་གྱིས་བརླབས་ཏེ། དེ་ནི་ཡོངས་སུ་སྨིན་པར་བྱ་བ་དང་། གདུལ་བའི་སྦྱོར་བ་རྒྱུན་མི་འཆད་པའི་ཕྱིར་རོ། །ཤར་ཕྱོགས་ནས་ཇི་ལྟར་འོངས་པ་དེ་བཞིན་དུ་ལྷོ་ཕྱོགས་དང་ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་ནས་ཀྱང་དེ་བཞིན་ཏེ། རིགས་ཀྱི་བུ་ངས་ནི་བྱང་ཆུབ་སེམས་དཔའི་རྣམ་པར་ཐར་བའི་སྒོ་ཀུན་ཏུ་འགྲོ་བ་ཞེས་བྱ་བ་འདི་ཤེས་པར་ཟད་ན། ངས་བྱང་ཆུབ་སེམས་དཔའ་ཕྱོགས་ཀུན་ཏུ་མངོན་པར་གཞོལ་བ། ཐ་མི་དད་པའི་ཡེ་ཤེས་ཀྱི་ཡུལ་དང་ལྡན་པ། ཆོས་ཀྱི་དབྱིངས་ཐམས་ཅད་དུ་ལུས་རྣམ་པར་བཀོད་པ། སེམས་ཅན་ཐམས་ཅད་ཀྱི་བསམ་པ་དང་། མོས་པ་ཇི་ལྟ་བ་བཞིན་དུ་མཐུན་པར་སྤྱོད་པ། ཞིང་ཐམས་ཅད་ལུས་ཀྱིས་རྒྱས་པར་འགེངས་པ། ཆོས་ཐམས་ཅད་ཀྱི་རྒྱུད་ཀྱི་རྗེས་སུ་སོང་བ། དུས་གསུམ་གྱི་རྒྱུད་མཉམ་པ་ཉིད་དུ་གྱུར་པ། ཆོས་ཕྱོགས་ཀྱི་རྒྱུད་དང་མཉམ་པ་ཉིད་དུ་གྱུར་པའི་ལུས་དང་ལྡན་པ། འགྲོ་བའི་རྒྱུད་ཐམས་ཅད་དུ་རྣམ་པར་སྣང་བ། དེ་བཞིན་གཤེགས་པའི་རྒྱུད་ཐམས་ཅད་ལ་རྣམ་པར་རྟོག་པ་མེད་པ། ཆགས་པ་མེད་པའི་རྒྱུད་ཐམས་ཅད་ཁོང་དུ་ཆུད་པ། གནས་མེད་པའི་རྒྱུད་ལ་རབ་ཏུ་གནས་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་གྲོང་ཁྱེར་སྒོ་དང་ལྡན་པ་ཞེས་བྱ་བ་ཡོད་དེ། དེ་ན་ལྷ་ལྷ་ཆེན་པོ་ཞེས་བྱ་བ་འདུག་གིས་དེའི་གན་དུ་སོང་ལ། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་བྱང་ཆུབ་སེམས་དཔའ་གཞན་དུ་མི་འགྲོ་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། བྱང་ཆུབ་སེམས་དཔའ་གཞན་དུ་མི་འགྲོ་བ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། བྱང་ཆུབ་སེམས་དཔའ་གཞན་དུ་མི་འགྲོ་བའི་དྲུང་ནས་སོང་ངོ་།