ཚིག་གི་ལམ་སྣ་ཚོགས་བརྗོད་པས་ཀྱང་སེམས་ཅན་རྣམས་ཀྱི་དོན་བྱེད་དོ། །རིགས་ཀྱི་བུ་ཁོ་བོས་ནི་བྱང་ཆུབ་སེམས་དཔའི་སྤྱོད་པ་ཐམས་ཅད་དུ་འགྲོ་བ་ཐམས་ཅད་ཀྱི་རྗེས་སུ་སོང་བ་འདི་ཤེས་པར་ཟད་ན། ཁོ་བོས་བྱང་ཆུབ་སེམས་དཔའ་འགྲོ་བ་ཐམས་ཅད་དང་། མཉམ་པའི་ལུས་དང་ལྡན་པ་བདག་དང་། སེམས་ཅན་གྱི་ལུས་སུ་ཐ་མི་དད་པའི་ཏིང་ངེ་འཛིན་ཐོབ་པ། འཕྲུལ་བའི་འཁོར་ལོ་རྒྱ་ཆེན་པོས་སྲིད་པའི་ལམ་གྱི་རྒྱུད་ཐམས་ཅད་དུ་ཁྱབ་པ། འཇིག་རྟེན་གྱི་སྐྱེ་བ་ཐམས་ཅད་རང་གི་ལུས་ལ་རྗེས་སུ་སྤྱོད་པ། འགྲོ་བ་ཐམས་ཅད་ཀྱིས་ལྟ་ན་དགའ་ཞིང་ཡིད་དུ་འོང་བའི་སྤྲུལ་པའི་འཁོར་ལོ་ལ་བརྩོན་པ། འགྲོ་བ་ཐམས་ཅད་ཀྱི་རིགས་དང་རྒྱུད་དང་ཚེར་སྐྱེ་བ་རབ་ཏུ་སྟོན་པ། བསྐལ་པ་ཐམས་ཅད་དུ་གནས་པ་ལ་ཐོགས་པ་མེད་པའི་སྨོན་ལམ་གྱི་འཁོར་ལོ་དང་ལྡན་པ། མིག་འཕྲུལ་ལྟ་བུའི་སྤྱོད་པ་རྣམ་པར་ཕྱེ་བའི་སྣང་བ་རབ་ཏུ་ཐོབ་པ། འགྲོ་བ་ཐམས་ཅད་ཀྱི་དོན་བྱེད་ཀྱང་། གོས་པ་མེད་པར་གནས་པ་ལ་བརྩོན་པ། དུས་གསུམ་གྱི་འགྲོ་བའི་དབྱིངས་མཉམ་པ་ཉིད་ཁོང་དུ་ཆུད་པ། ཡེ་ཤེས་ཀྱི་དབྱིངས་བདག་མེད་པ་དང་ལྡན་པས། སྣང་བར་བྱས་པའི་སྙིང་རྗེ་ཆེན་པོ་མཐའ་ཡས་པའི་སྙིང་པོ་དང་ལྡན་པ། འགྲོ་བ་ཐམས་ཅད་ཀྱི་དགེ་བའི་རྩ་བ་ཡོངས་སུ་བསྐྱེད་པ་ལ་མངོན་པར་བརྩོན་པ། དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་ཡུལ་ཁམས་ཆེན་པོ་ཞེས་བྱ་བ་ཡོད་དེ། དེ་ན་སྤོས་འཚོང་གི་ཚོང་དཔོན་ལོངས་སྤྱོད་ཨུཏ་པ་ལ་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཀུན་ཏུ་རྒྱུ་ཐམས་ཅད་དུ་འགྲོ་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཀུན་ཏུ་རྒྱུ་ཐམས་ཅད་དུ་འགྲོ་བ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། ཀུན་ཏུ་རྒྱུ་ཐམས་ཅད་དུ་འགྲོ་བའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ལུས་དང་སྲོག་ལ་ནི་མི་ལྟ། སྲིད་པའི་ལོངས་སྤྱོད་དང་ཡོངས་ས་ཟིན་པ་དང་། ཉེ་བར་བླངས་པ་ལ་མངོན་པར་ཆགས་པའི་གནས་ཐམས་ཅད་ལ་ནི་མི་ལྟ་སེམས་ཅན་གྱི་ཡུལ་གྱི་དགའ་བ་ཐམས་ཅད་ལ་ནི་མི་ལྟ།