མཐུན་པའི་ལུས་ཀྱི་ཆུ་ཞེང་དང་དབྱིབས་མངོན་པར་བསྒྲུབས་ཤིང་། ཆོས་སྟོན་ཀྱང་། སེམས་ཅན་དེ་དག་གིས་དེ་སུས་བསྟན་པ་དང་། དེ་ག་ལས་འོངས་པ་མི་ཤེས་ཏེ། གཞན་དུ་ན་ཐོས་ནས་མ་ནོར་བར་ནན་ཏན་དུ་བྱེད་པ་ནི་མེད་པའང་མ་ཡིན་ནོ། །གཞན་ཡང་རིགས་ཀྱི་བུ་འཛམ་བུའི་གླིང་འདི་ན། ཞགས་པ་འཐུབ་པ་ལྟ་བ་རྣམ་པ་སྣ་ཚོགས་ལ་མངོན་པར་ཞེན་པ། དགུ་བཅུ་རྩ་དྲུག་འཁོད་པ་དེ་དག་ཐམས་ཅད་ཀྱི་ནང་དུ་ཡང་སེམས་ཅན་ལྟ་བའི་རྣམ་པ་སྣ་ཚོགས་ལ་ཆགས་པ་རྣམས་ཡོངས་སུ་སྨིན་པར་བྱ་བའི་ཕྱིར་ཐམས་ཅད་དང་མཐུན་པར་གནས་ཏེ། རིགས་ཀྱི་བུ་ཅི་ལྟར་ཁོ་བོ་གྲོང་ཁྱེར་དགའ་བ་འཛིན་པ་འདི་ན་སེམས་ཅན་གྱི་དོན་བྱེད་ཅིང་འདུག་པ་དེ་བཞིན་དུ་འཛམ་བུའི་གླིང་གི་གྲོང་དང་། གྲོང་ཁྱེར་དང་། ལྗོངས་དང་། ཡུལ་དང་། ཁམས་དང་། རྒྱལ་པོའི་ཕོང་བྲང་འཁོར་ཐམས་ཅད་ན་ཡང་སེམས་ཅན་གྱི་དོན་བྱེད་དོ། །འཛམ་བུའི་གླིང་ན་ཇི་ལྟ་བ་དེ་བཞིན་དུ་གླིང་བཞི་པའི་འཇིག་རྟེན་གྱི་ཁམས་ཐམས་ཅད་དང་། དེ་བཞིན་དུ་སྟོང་དང་སྟོང་གཉིས་པ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དང་། དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་སེམས་ཅན་གྱི་རྟེན་དུ་བྱ་བ་ཐམས་ཅད་དང་། སེམས་ཅན་གྱི་གནས་སུ་བྱ་བ་ཐམས་ཅད་དང་། སེམས་ཅན་གྱི་གཞིར་བྱ་བ་ཐམས་ཅད་དང་། སེམས་ཅན་གྱི་ཁམས་སུ་བྱ་བའི་མིང་དུ་གཏོགས་པ་ཐམས་ཅད་དང་། སེམས་ཅན་ཡོངས་སུ་རྒྱུ་བ་ཐམས་ཅད་དང་། སེམས་ཅན་ཡོངས་སུ་འདུ་བ་ཐམས་ཅད་དང་། སེམས་ཅན་རྒྱ་མཚོ་ན་གནས་པ་ཐམས་ཅད་དང་། སེམས་ཅན་གྱི་རྒྱུད་གནས་པ་ཐམས་ཅད་དང་། སེམས་ཅན་གྱི་ཕྱོགས་སུ་བྱ་བ་ཐམས་ཅད་དང་། སེམས་ཅན་གྱི་ཕྱོགས་མཚམས་སུ་བྱ་བ་ཐམས་ཅད་དང་། སེམས་ཅན་སྤྱོད་པའི་གནས་ཐམས་ཅད་དུ་འང་། ཐབས་སྣ་ཚོགས་དང་། ཚུལ་སྣ་ཚོགས་དང་། སྒོ་སྣ་ཚོགས་དང་། རིགས་པ་སྣ་ཚོགས་དང་། འཕྲད་པ་སྣ་ཚོགས་དང་། ཐབས་ཀྱི་ཚུལ་སྣ་ཚོགས་དང་། བྱ་བ་སྣ་ཚོགས་ཀྱིས་སེམས་ཅན་རྣམས་ཀྱི་དོན་བྱེད་དོ། །གཟུགས་དང་ཁ་དོག་སྣ་ཚོགས་ཡོངས་སུ་བསྟན་ཅིང་མོས་པར་བྱ་བ་དང་། ཚིག་གི་ལམ་སྣ་ཚོགས་བརྗོད་པས་ཀྱང་སེམས་ཅན་རྣམས་ཀྱི་དོན་བྱེད་དོ།