ཚོང་དཔོན་སྤོས་འཚོང་ཀུན་ཏུ་བལྟ་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཚོང་དཔོན་སྤོས་འཚོང་ཀུན་ཏུ་བལྟ་བ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། ཚོང་དཔོན་སྤོས་འཚོང་ཀུན་ཏུ་བལྟ་བའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་དགེ་བའི་བཤེས་གཉེན་གཅིག་ནས་གཅིག་ཏུ་བརྒྱུད་པ་དེ་དག་རྗེས་སུ་དྲན་པར་བྱེད་ཅིང་། དགེ་བའི་བཤེས་གཉེན་གྱི་གདམས་ངག་གི་སྒོ་དེ་དག་རྗེས་སུ་དྲན་པར་བྱ་བ་དང་། བདག་ནི་དགེ་བའི་བཤེས་གཉེན་གྱིས་ཡོངས་སུ་བཟུང་ངོ་། །ཞེས་རང་གི་སེམས་ཡོངས་སུ་ཚིམ་པར་བྱ་བ་དང་། བདག་ནི་དགེ་བའི་བཤེས་གཉེན་གྱིས་ཡོངས་སུ་བསྲུངས་པས། ང་ནི་བླ་ན་མྱེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པར་ཡང་མྱི་འགྱུར་རོ། །སྙམ་དུ་རྣམ་པར་སེམས་ཤིང་། སེམས་དགའ་བ་ནི་རབ་ཏུ་ཐོབ། སེམས་དང་བ་དང་སེམས་རབ་ཏུ་དགའ་བ་དང་། སེམས་རངས་པ་དང་། སེམས་མགུ་བ་དང་། སེམས་མོས་པ་དང་། སེམས་ཀྱི་ཤུགས་དང་། སེམས་རྣམ་པར་ཞི་བ་དང་། སེམས་རྒྱ་ཆེན་པོ་དང་། སེམས་ཀྱི་རྒྱན་དང་། སེམས་ལ་ཐོགས་པ་མྱེད་པ་དང་སེམས་ལ་སྒྲིབ་པ་མྱེད་པ་དང་། སེམས་རྣམ་པར་ཕྱེ་བ་དང་། སེམས་ཡང་དག་པར་གཞོལ་བ་དང་། སེམས་ཀྱི་དབང་དང་། སེམས་དབང་སྒྱུར་བ་དང་། སེམས་ཀྱི་ཆོས་ཁོང་དུ་ཆུད་པ་དང་། སེམས་ཀྱིས་ཞིང་རྒྱས་བར་དགང་བ་དང་། སེམས་སངས་རྒྱས་མཐོང་བས་བརྒྱན་པ་དང་། སེམས་སྟོབས་བཅུའི་ཡིད་ལ་བྱ་བ་དང་མི་འབྲལ་བའང་ཐོབ་ནས། དེ་མཐར་ཀྱིས་ལྗོངས་ནས་ལྗོངས་དང་། གྲོང་ནས་གྲོང་དང་། ཡུལ་ནས་ཡུལ་དུ་ཚོལ་ཞིང་གྲོང་ཁྱེར་ཏ་ལའི་རྒྱལ་མཚན་གང་ན་བ་དེར་ཕྱིན་ཏེ། རྒྱལ་པོ་མེ་གང་ན་བཞུགས་ཞེས་དྲིས་ན། དེ་ལ་འགྲོ་བ་གཞན་དག་གིས་འདི་སྐད་དུ་བསྟན་ཏེ། རིགས་ཀྱི་བུ་འདེ་རེ་རྒྱལ་པོ་མེ་ནི་རྒྱལ་པོའི་དོན་བསྒྲུབ་པའི་ཕྱིར་སེང་གེའི་གདན་ལ་བཞུགས་ཤིང་། རྒྱལ་པོའི་ཕྲིན་ལས་མཛད་དོ། །ཁམས་རབ་ཏུ་སྐྱོང་ངོ་། །ཆད་པས་གཅད་པར་འོས་པ་ནི་ཆད་པས་གཅོད་དོ། བྱ་དགས་སྡུད་པར་འོས་པ་ནི་བྱ་དགས་སྡུད་དོ། གཡོན་ཡོད་པ་རྣམས་ལ་ནི་གྱོད་རྨེད་དོ།