སྤོས་ཀྱི་འོད་ཀྱི་སྤྲིན་གྱི་རྒྱན་དང་། སྤོས་ཀྱི་སྣང་བ་དྲི་མ་མྱེད་པའི་སྤྲིན་གྱི་རྒྱན་དང་། སྤོས་ཐམས་ཅད་ཀྱི་སྤྲིན་གྱི་ཆར་རབ་ཏུ་འབབ་པའི་རྒྱན་བྱིན་གྱིས་རློབ་སྟེ། རིགས་ཀྱི་བུ་ཁོ་བོས་ནི་སེམས་ཅན་ཐམས་ཅད་ཡོངས་སུ་ཚིམ་པར་བྱེད་པ་དང་། སྒོ་ཐམས་ཅད་ནས་སངས་རྒྱས་བལྟ་ཞིང་མཆོད་པ་དང་། བསྙེན་བཀུར་བའི་སྤོས་ཀྱི་གཟུགས་ཀྱི་ཆོས་ཀྱི་སྒོ་འདི་ཤེས་པར་ཟད་ན། ཁོ་བོས་བྱང་ཆུབ་སེམས་དཔའ་སྨན་གྱི་རྒྱལ་པོ་ལྟ་བུར་གྱུར་པ། བལྟ་ན་དོན་ཡོད་པ། འགྲོགས་ན་དོན་ཡོད་པ། རྗེས་སུ་དྲན་ན་དོན་ཡོད་པ། བརྟུལ་ཞུགས་རྗེས་སུ་བྱས་ན་དོན་ཡོད་པ། མྱིང་ཐོས་ན་དོན་ཡོད་པ། མཐོང་པ་ཙམ་གྱིས་སེམས་ཅན་ཐམས་ཅད་ཀྱི་ཉོན་མོངས་པ་ཞི་བར་འགྱུར་བ། མཐོང་བ་ཙམ་གྱིས་སེམས་ཅན་རྣམས་ངན་སོང་གི་རྒྱུད་ལས་ལྡོག་པར་འགྱུར་བ། མཐོང་པ་ཙམ་གྱིས་སེམས་ཅན་ཐམས་ཅད་སངས་རྒྱས་ཀྱི་ཆོས་ལ་སྐབས་ཕྱེ་བ་ཐོབ་པར་གྱུར་པ། མཐོང་བ་ཙམ་གྱིས་སེམས་ཅན་རྣམས་ཀྱི་སྡུག་བསྔལ་གྱི་ཕུང་པོ་ཐམས་ཅད་ཞི་བར་འགྱུར་བ་མཐོང་ཙམ་གྱིས་སེམས་ཅན་ཐམས་ཅད་འཇིགས་པ་དང་། འཁོར་བའི་ལམ་གྱི་རྒྱུད་ཐམས་ཅད་ཀྱི་འཇིགས་པ་དང་བྲལ་བར་འགྱུར་བ་མཐོང་བ་ཙམ་གྱིས་སེམས་ཅན་རྣམས་ཐམས་ཅད་མཁྱེན་པའི་ཕྱོགས་ལ་རྟེན་པར་འགྱུར་བའི་ཕྱིར་མྱི་འཇིགས་པ་ཐོབ་པར་འགྱུར་བ། མཐོང་བ་ཙམ་གྱིས་སེམས་ཅན་རྣམས་རྒ་ཤིའི་གྲོག་པོ་དང་གཡང་སར་མི་ལྟུང་བ། མཐོང་བ་ཙམ་གྱིས་སེམས་ཅན་རྣམས་ཆོས་ཀྱི་དབྱིངས་མཉམ་པ་ཉིད་ལ་གནས་པས་མྱ་ངན་ལས་འདས་པའི་བདེ་བ་འཐོབ་པར་འགྱུར་བ་དེ་དག་གི་སྤྱོད་པ་ཤེས་པའམ་ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་གྲོང་ཁྱེར་ཏ་ལའི་རྒྱལ་མཚན་ཞེས་བྱ་བ་ཡོད་དེ། དེ་ན་རྒྱལ་པོ་མེ་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས། ཚོང་དཔོན་སྤོས་འཚོང་ཀུན་ཏུ་བལྟ་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ།