བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་བརྗོད་ཅིང་དེ་བཞིན་གཤེགས་པའི་སྐུ་ཐུབ་པར་དཀའ་བ་ཡོངས་སུ་སྟོན་ཏོ། །བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་བརྗོད་ཅིང་དེ་བཞིན་གཤེགས་པའི་སྐུ་ཟིལ་གྱིས་གནོན་ལ། ཟིལ་གྱིས་གནོན་པ་རྣམ་པར་དག་པ་ཡོངས་སུ་སྟོན་ཏོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བརྗོད་ཅིང་ཆོས་ཀྱི་སྐུ་ཡོངས་སུ་དག་པ་ཡོངས་སུ་སྟོན་ཏོ། །ཐབས་མཁས་པའི་ཕ་རོལ་ཏུ་ཕྱིན་པ་ཡོངས་སུ་བརྗོད་ཅིང་འགྲོ་བ་ཐམས་ཅད་ལ་མངོན་དུ་གྱུར་པའི་སྐུ་གཙང་ཞིང་རྣམ་པར་དག་པ་ཡོངས་སུ་སྟོན་ཏོ། །སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་བརྗོད་ཅིང་བསྐལ་པ་ཐམས་ཅད་ཀྱི་དུས་སུ་འགྲོ་བ་ཐམས་ཅད་ཀྱི་སེམས་དང་འགྲོགས་པའི་སྐུ་རྣམ་པར་དག་པ་ཡོངས་སུ་སྟོན་ཏོ། །སྟོབས་ཀྱི་ཕ་རོལ་ཏུ་ཕྱིན་པ་ཡོངས་སུ་བརྗོད་ཅིང་སངས་རྒྱས་ཀྱི་ཞིང་ཐམས་ཅད་དུ་མངོན་པར་འབྱུང་བའི་སྐུ་རྣམ་པར་དག་པ་ཡོངས་སུ་སྟོན་ཏོ། །ཡེ་ཤེས་ཀྱི་ཕ་རོལ་ཏུ་ཕྱིན་པ་ཡོངས་སུ་བརྗོད་ཅིང་འགྲོ་བ་ཐམས་ཅད་བསམ་པ་ཇི་ལྟ་བ་བཞིན་དུ་ཚིམ་པར་མཛད་པའི་སྐུ་རྣམ་པར་དག་པ་ཡོངས་སུ་སྟོན་ཏོ། །མྱི་དགེ་བའི་ཆོས་ཐམས་ཅད་ལས་རྣམ་པར་ལྡོག་པ་ཡོངས་སུ་བརྗོད་ཅིང་བལྟ་ན་ཕུལ་དུ་བཟང་བའི་སྐུ་རྣམ་པར་དག་པ་ཡོངས་སུ་སྟོན་ཏོ། །དེ་ལྟར་དེ་དག་ཆོས་ཀྱི་སྦྱིན་པས་ཡོངས་སུ་བསྡུས་ཏེ། ནོར་དང་རིན་པོ་ཆེ་མཐའ་ཡས་པའི་ཚོགས་ཀྱིས་ཉེ་བར་བརྟན་པ་བྱས་ཤིང་སོ་སོར་འགྱེད་དོ། །ཡང་རིགས་ཀྱི་བུ་ཁོ་བོ་ནི་སྤོས་དང་། བདུག་སྤོས་དང་། བསྒོ་བ་དང་། བསྐུ་བ་སྦྱོར་ཤེས་ཏེ། འདི་ལྟར་སྤོས་ཀྱི་རྒྱལ་པོ་གཞལ་དུ་མེད་པ་ལ་སྩོགས་པ་དང་། སྤོས་ཀྱི་རྒྱལ་པོ་སིནྡུ་བ་ར་ལ་སྩོགས་པ་དང་། སྤོས་ཀྱི་རྒྱལ་པོ་མི་ཕམ་པ་ལ་སྩོགས་པ་དང་། སྤོས་ཀྱི་རྒྱལ་པོ་རྣམ་པར་གསལ་བྱེད་ལ་སྩོགས་པ་དང་། སྤོས་ཀྱི་རྒྱལ་པོ་ཉི་མ་ཡོད་པ་ལ་སྩོགས་པ་དང་། སྤོས་ཀྱི་རྒྱལ་པོ་དུས་དང་འཐུན་པ་ལ་སྩོགས་པ་དང་། སྤོས་ཀྱི་རྒྱལ་པོ་སྦྲུལ་གྱི་སྙིང་པོའི་ཙན་དན་ལ་སྩོགས་པ་དང་། སྤོས་ཀྱི་རྒྱལ་པོ་སྤྲིན་གྱི་ཨ་ག་རུ་ལ་སྩོགས་པ་དང་། སྤོས་ཀྱི་རྒྱལ་པོ་དབང་པོ་མི་འཁྲུག་པ་ལ་སྩོགས་པ། སྤོས་སྦྱར་བ་ཐམས་ཅད་ཀྱང་རབ་ཏུ་ཤེས་སོ།