ཁ་ཟས་བྲོ་བའི་མཆོག་དང་ལྡན་པ་སྣ་ཚོགས་ཀྱིས་ཡོངས་སུ་ཚིམ་པར་བྱས་ཏེ། ནོར་དཔག་ཏུ་མེད་པས་ཀྱང་ཕུན་སུམ་ཚོགས་པར་བྱེད་དོ། །དེའི་འོག་ཏུ་ཡང་དེ་དག་ལ་མི་གཙང་བ་བསྟན་ཅིང་། །འདོད་ཆགས་སྤང་བའི་ཕྱིར་ཆོས་སྟོན་ཏོ། བྱམས་པ་ཆེན་པོ་ཡོངས་སུ་བསྔགས་ཤིང་ཞེ་སྡང་སྤང་བའི་ཕྱིར་ཆོས་སྟོན་ཏོ། །ཆོས་རྣམ་པར་དབྱེ་བའི་བྱེ་བྲག་བསྟན་ཅིང་གཏི་མུག་སྤང་བའི་ཕྱིར་ཆོས་སྟོན་ཏོ། ཁྱད་པར་ཁོང་དུ་ཆུད་པའི་ཚུལ་གྱི་སྒོ་ཡང་དག་པར་བསྟན་ཅིང་ཆ་མཉམ་པའི་སྤྱོད་པ་དང་། ཉོན་མོངས་པ་སྤང་བའི་ཕྱིར་ཆོས་སྟོན་ཏོ། །སངས་རྒྱས་ཀྱི་ཡོན་ཏན་གྱི་ཆོས་དང་ལྡན་པའི་གཏམ་ཐམས་ཅད་ཡོངས་སུ་བརྗོད་ཅིང་བྱང་ཆུབ་ཀྱི་སེམས་འབྱུང་བའི་རྒྱུ་ཡོངས་སུ་སྟོན་ཏོ། །འཁོར་བའི་སྡུག་བསྔལ་ཚད་གཟུང་དུ་མྱེད་པ་ཡོངས་སུ་བསྟན་ཅིང་། སྙིང་རྗེ་ཆེན་པོ་འབྱུང་བའི་རྒྱུ་ཡོངས་སུ་སྟོན་ཏོ། །བསོད་ནམས་དང་ཡེ་ཤེས་ཀྱི་ཚོགས་རྒྱ་ཆེན་པོ་བསྩགས་པ་ཡང་དག་པར་བསྔགས་ཤིང་ཡོན་ཏན་ཚད་མེད་པ་འཐོབ་པ་དང་། འབྱུང་བའི་རྒྱུ་ཡོངས་སུ་སྟོན་ཏོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་བྱ་བ་ཡོངས་སུ་བསྟན་ཅིང་ཐེག་པ་ཆེན་པོའི་སྨོན་ལམ་འབྱུང་བའི་རྒྱུ་ཡོངས་སུ་སྟོན་ཏོ། །སངས་རྒྱས་ཀྱི་ཞིང་ཐམས་ཅད་དང་། བསྐལ་པ་ཐམས་ཅད་དུ་གནས་པར་བྱ་བའི་སྤྱོད་པའི་དྲ་བ་ཤིན་ཏུ་རྒྱས་པར་བཤད་ཅིང་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་འཐོབ་པ་དང་། འབྱུང་བའི་རྒྱུ་ཡོངས་སུ་སྟོན་ཏོ། །སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་བསྔགས་ཤིང་མཚན་དང་དཔེ་བྱད་བཟང་པོས་བརྒྱན་པའི་སངས་རྒྱས་ཀྱི་སྐུ་འཐོབ་པ་དང་འབྱུང་བའི་རྒྱུ་ཡོངས་སུ་སྟོན་ཏོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་བརྗོད་ཅིང་དེ་བཞིན་གཤེགས་པའི་སྐུ་ཡོངས་སུ་དག་པ་ཐམས་ཅད་དུ་འགྲོ་བ་འཐོབ་པ་དང་འབྱུང་བའི་རྒྱུ་ཡོངས་སུ་སྟོན་ཏོ། །བཟོད་པའི་ཕ་རོལ་ཏུ་ཕྱིན་པ་ཡོངས་སུ་བརྗོད་ཅིང་དེ་བཞིན་གཤེགས་པའི་སྐུ་གཟུགས་དང་། སྐུ་མདོག་རྣམ་པར་དག་པ་བསམ་གྱིས་མི་ཁྱབ་པའི་རྒྱུ་ཡོངས་སུ་སྟོན་ཏོ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་བརྗོད་ཅིང་དེ་བཞིན་གཤེགས་པའི་སྐུ་ཐུབ་པར་དཀའ་བ་ཡོངས་སུ་སྟོན་ཏོ།