མྱི་ཟད་པའི་བསོད་ནམས་དང་ལྡན་པ་བསོད་ནམས་ཀྱི་ཚོགས་རྒྱ་ཆེན་པོ་ཤིན་ཏུ་བསྩགས་པས། ནམ་མཁའ་ལྟ་བུར་གྱུར་པ། འགྲོ་བ་ཐམས་ཅད་ཀྱི་སྨོན་ལམ་ཡོངས་སུ་རྫོགས་པར་བྱེད་པས། ནོར་བུ་རིན་པོ་ཆེ་ཡིད་བཞིན་གྱི་རྒྱལ་པོ་ལྟ་བུ། འགྲོ་བ་ཐམས་ཅད་ཀྱི་དགེ་བའི་རྩ་བ་ཡོངས་སུ་བསྲུང་བས། བསོད་ནམས་ཆེན་པོའི་འཁོར་ཡུག་དང་ལྡན་པ། འགྲོ་བ་ཐམས་ཅད་དུ་རིན་པོ་ཆེ་སྙིམ་པ་ནས་ཆར་ལྟར་འཐོར་བས་བསོད་ནམས་ཆེན་པོའི་སྤྲིན་དུ་གྱུར་བ། ཆོས་ཀྱི་གྲོང་ཁྱེར་གྱི་སྒོ་འབྱེད་པས། བསོད་ནམས་ཆེན་པོའི་མཛོད་ལ་མངོན་སུམ་དུ་ལྟ་བ། འགྲོ་བ་ཐམས་ཅད་ཀྱི་ཕོངས་པའི་མུན་པ་སེལ་བས་བསོད་ནམས་ཆེན་པོའི་སྒྲོན་མར་གྱུར་པ། དེ་དག་གི་སྤྱོད་པ་ཤེས་པའམ། །ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་གྲོང་ཁྱེར་འབྱུང་བ་ཆེན་པོ་ཞེས་བྱ་བ་ཡོད་དེ། དེ་ན་ཁྱིམ་བདག་མཁས་པ་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་དགེ་བསྙེན་མ་ཕུལ་དུ་བྱུང་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་བསྙེན་མ་ཕུལ་དུ་བྱུང་བ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། དགེ་བསྙེན་མ་ཕུལ་དུ་བྱུང་བའི་དྲུང་ནས་བལྟ་བས་མི་ངོམས་བཞིན་དུ་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་བསོད་ནམས་ཀྱི་མཛོད་མྱི་ཟད་པའི་རྒྱན་གྱི་རྣམ་པར་ཐར་པའི་སྣང་བ་རབ་ཏུ་ཐོབ་པ་དེ། བསོད་ནམས་རྒྱ་མཚོ་དེ་ལ་ནི་རྗེས་སུ་སེམས། བསོད་ནམས་ནམ་མཁའ་དེ་ལ་ནི་ཀུན་ཏུ་བལྟ། བསོད་ནམས་ཀྱི་ཕུང་པོ་དེ་ནི་ཡོངས་སུ་འཛིན། བསོད་ནམས་ཀྱི་རི་བོ་དེ་ལ་ནི་མངོན་པར་འཛེག །བསོད་ནམས་ཀྱི་ཚོགས་དེ་ནི་ཡང་དག་པར་སྡུད། བསོད་ནམས་ཀྱི་ཆུ་བོ་དེ་ལ་ནི་ཡོངས་སུ་འབོག །བསོད་ནམས་ཀྱི་མུ་སྟེགས་དེ་ལས་ནི་རབ་ཏུ་འབབ།