ཁྱིམ་གྱི་ལོངས་སྤྱོད་རླུང་གིས་བསྐྱོད་པའི་སྒྲ་འབྱུང་ཞིང་། ང་རོ་འབྱིན་པ་དང་། རྣ་ལམ་དུ་གྲགས་པའི་མཐའ་ནི་ཐུག་པར་མི་རུང་ངོ་། །དེ་ལྟར་བདག་ཅག་ཀྱང་སངས་རྒྱས་དང་། ཆོས་དང་། དགེ་འདུན་དང་། བྱང་ཆུབ་སེམས་དཔའ་རབ་ཏུ་འཇུག་པའི་སྨོན་ལམ་དང་། སྤྱོད་པ་དང་མཚན་གྱི་ཆུ་ཀླུང་གི་སྒྲས་དགའ་བ་ཆེན་པོའི་ཤུགས་དྲག་པོས་ཉམས་བདེ་བ་སྐྱེས་ཏེ། འཕགས་པ་འདིའི་དྲུང་དུ་འདོང་ངོ་། །དེ་ལྟར་བདག་ཅག་ཕྱིན་པར་གྱུར་ནས་ཀྱང་། འཕགས་པ་འདི་ནི་བདག་ཅག་ལ་ཅི་ནས་ཀྱང་། ཁོ་བོ་ཅག་གི་འཁོར་གྱི་སེམས་ཅན་དུ་མ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མྱི་ལྡོག་པར་འགྱུར་བ་དེ་ལྟ་བུར་ཆོས་སྟོན་པ་མཛད་དོ། །འདོད་པ་ལ་སྤྱོད་པའི་ལྷའི་བུ་སྟོང་ཕྲག་དཔག་ཏུ་མེད་པ་ཁ་དོག་ཤིན་ཏུ་མཛེས་པ་དག་ཀྱང་ནམ་མཁའ་ལ་འཁོད་ཅིང་ཡིད་ཀྱིས་སྤྲུལ་པའི་མཆོད་པས་མཆོད་པ་བྱས་ནས་འདི་སྐད་ཅེས་འཛེར་ཏོ། །འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། མེའི་ཕུང་པོ་འདི་དག་ལས་རྣམ་པ་འདི་ལྟ་བུའི་འོད་བྱུང་ཏེ། འོད་དེས་མར་ན་མནར་མེད་པ་ཡན་ཆད་དུ་སེམས་ཅན་དམྱལ་བ་རྣམས་སྣང་བར་བྱས་ནས། སེམས་ཅན་དམྱལ་བ་པའི་སེམས་ཅན་ཐམས་ཅད་ཀྱི་སྡུག་བསྔལ་རྩེ་ཟིལ་བར་བྱས་ཏེ། འོད་དེ་ཉིད་ཀྱིས་འཕགས་པ་འདི་བདག་ཅག་གི་མྱིག་ལམ་དུ་སྣང་བར་བསྟན་པས་དེའི་ཕྱིར་ཁོ་བོ་ཅག་ཀྱང་འཕགས་པ་འདི་ལ་སེམས་མོས་པར་གྱུར་ནས། འདོད་པ་ལ་སྤྱོད་པའི་ལྷའི་རིས་ཉམས་སུ་བདེ་བར་སྐྱེས་སོ། །དེ་ལྟར་བདག་ཅག་ཀྱང་འཕགས་པ་འདིས་མཛད་པ་ལ་དྲིན་དུ་གཟོ་ཞིང་མཐོང་བས་མི་ངོམས་པས་འདོད་པའི་དགའ་བ་ཐམས་ཅད་ཡོངས་སུ་སྤངས་ཏེ། འཕགས་པ་འདིའི་དྲུང་དུ་འདོང་ངོ་། །དེར་བདག་ཅག་ཕྱིན་ནས་ཀྱང་འཕགས་པ་འདི་ནི་ཅི་ནས་ཀྱང་། སེམས་ཅན་ཚད་མྱེད་པ་རྣམས་བྱང་ཆུབ་ཏུ་སྨོན་ལམ་འདེབས་པར་འགྱུར་བ་དེ་ལྟར་ཆོས་སྟོན་པ་མཛད་དོ།