བག་ཆགས་ཀྱི་མཚམས་སྦྱོར་བ་དང་། བག་ལ་ཉལ་བའི་མཐའ་གང་དུ་ཐུག་པ་དེའི་མཐས་ཀླས་པར་ཤོག་ཤིག །ཅེས་དེ་ལྟར་སྨོན་ལམ་བཏབ་བོ། །སྨྲས་པ། འཕགས་མ་རྣམ་པར་ཐར་པ་འདིའི་མིང་ཅི་ཞེས་བགྱི། སྨྲས་པ། རིགས་ཀྱི་བུ་རྣམ་པར་ཐར་པ་འདི་ནི་ཉོན་མོངས་པ་མེད་པ་བདེ་བའི་རྒྱལ་མཚན་ཞེས་བྱ་བ་སྟེ། རིགས་ཀྱི་བུ་ཁོ་མོས་ཀྱང་བྱང་ཆུབ་སེམས་དཔའི་རྣམ་པར་ཐར་པ་དེ་གཅིག་པུ་ཤེས་པར་ཟད་ན་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་ཡང་དག་པར་འཛིན་པའི་ཕྱིར། སེམས་རྒྱ་མཚོ་དང་ལྡན་པ་ལྷག་པའི་བསམ་པ་བརྟན་པའི་ཕྱིར་རི་རབ་དང་འདྲ་བ། སེམས་ཅན་ཐམས་ཅད་ཀྱི་ཉོན་མོངས་པའི་ནད་རབ་ཏུ་སོས་པར་བྱེད་པའི་ཕྱིར་སྨན་གྱི་རྒྱལ་པོ་མཐོང་ན་ལེགས་པ་ལྟ་བུ། སེམས་ཅན་ཐམས་ཅད་ཀྱི་མ་རིག་པའི་མུན་པ་སེལ་བའི་ཕྱིར་ཉི་མར་གྱུར་པ། སེམས་ཅན་ཐམས་ཅད་ཀྱི་བསམ་པའི་གནས་སུ་གྱུར་པས་ས་ལྟ་བུའི་སེམས་དང་ལྡན་པ། འགྲོ་བ་ཐམས་ཅད་ཀྱི་དོན་བྱེད་པའི་ཕྱིར་རླུང་དུ་གྱུར་པ། སེམས་ཅན་ཐམས་ཅད་ལ་ཡེ་ཤེས་ཀྱི་སྣང་བ་འབྱིན་པའི་ཕྱིར་མར་མེར་གྱུར་པ། ཞི་བའི་སྒྲས་སངས་རྒྱས་ཀྱི་ཆོས་ཀྱི་ཆར་ཡང་དག་པ་ཇི་ལྟ་བ་བཞིན་དུ་འབེབས་པའི་ཕྱིར་སྤྲིན་དུ་གྱུར་པ་བསོད་ནམས་ཀྱི་འོད་གཟེར་གྱི་དྲ་བ་རབ་ཏུ་འགྱེད་པའི་ཕྱིར་ཟླ་བ་ལྟ་བུ། འགྲོ་བ་ཐམས་ཅད་ཡོངས་སུ་བསྲུང་བ་ལ་ཞུགས་པའི་ཕྱིར། བརྒྱ་བྱིན་ལྟ་བུ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པའམ། བྱང་ཆུབ་སེམས་དཔའི་བསླབ་པ་བསམ་གྱིས་མི་ཁྱབ་པ་སྨོས་པའམ། བྱང་ཆུབ་སེམས་དཔའི་སྨོན་ལམ་གྱི་རྣམ་པ་མཐའ་དང་དབུས་མེད་པ་ཡོངས་སུ་བསྟན་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ཀྱི་རྒྱ་མཚོ་རྣམ་པར་རློབ་པ་འདི་ན་ཡུལ་ཆུ་བ་གཙང་མ་ཞེས་བྱ་བ་ཡོད་དེ། དེ་ན་དྲང་སྲོང་འཇིགས་མཆོག་དབྱངས་ཤེས་བྱ་བ་འདུག་གི་དེའི་གན་དུ་སོང་ལ་དྲིས་ཤིག་དང་། དེས་རིགས་ཀྱི་བུ་ཁྱོད་ལ་བྱང་ཆུབ་སེམས་དཔའི་སྤྱོད་པ་སྟོན་པར་འགྱུར་རོ།