སེམས་ཅན་གྱི་དབང་པོ་རྒྱ་མཚོ་མ་ལུས་པ་ཐམས་ཅད་ཁོང་དུ་ཆུད་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སྤྲོ་བ་སྐྱེ་བ་ཡིན། འཇིག་རྟེན་གྱི་ཁམས་མ་ལུས་པ་ཐམས་ཅད་ཀྱི་བསྐལ་པ་གཅིག་ནས་གཅིག་ཏུ་བརྒྱུད་པ་ལ་འཇུག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་མོས་པ་སྐྱེ་བ་ཡིན། སེམས་ཅན་མ་ལུས་པ་ཐམས་ཅད་ཀྱི་ཉོན་མོངས་པའི་བག་ཆགས་ཀྱི་མཚམས་སྦྱོར་བ་ཡོངས་སུ་གཅད་པའི་ཕྱིར། བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཡོངས་སུ་སྐྱེ་བ་ཡིན། སེམས་ཅན་མ་ལུས་པ་ཐམས་ཅད་ཀྱི་ལས་དང་ཉོན་མོངས་པའི་རྒྱ་མཚོ་བསྐམ་པའི་ཕྱིར། བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཆེན་པོའི་ཉི་མ་འཆར་བ་ཡིན། སེམས་ཅན་མ་ལུས་པ་ཐམས་ཅད་ཀྱི་སྤྱོད་པ་ཡོངས་སུ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་སྣང་བ་འབྱུང་བ་ཡིན། སེམས་ཅན་མ་ལུས་པ་ཐམས་ཅད་ཀྱི་སྡུག་བསྔལ་གྱི་མེའི་ཕུང་པོ་རབ་ཏུ་ཞི་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སྙིང་རྗེའི་སྤྲིན་ཆེན་པོ་ཀུན་ནས་འདུ་བ་ཡིན། རིགས་ཀྱི་བུ་མདོར་ན་དེ་དག་ལ་སྩོགས་པ་བྱང་ཆུབ་སེམས་དཔའི་སྤྱོད་པའི་ཚུལ་དང་། སྒོ་གྲངས་མེད་པ་བརྒྱ་སྟོང་ཕྲག་བཅུ་དག་བྱང་ཆུབ་སེམས་དཔའ་རྣམས་ཀྱིས་ཡོངས་སུ་བསྒྲུབ་པར་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ། བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི་ཡེ་ཤེས་ཁོང་དུ་ཆུད་པར་བྱ་བའི་ཕྱིར། ཆོས་ཐམས་ཅད་ལ་ཡང་དག་པར་གཞོལ་བའོ། །བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི་ཡོངས་སུ་དག་པར་བྱ་བའི་ཕྱིར་ཞིང་ཐམས་ཅད་ལ་ཡང་དག་པར་གཞོལ་བའོ། །རིགས་ཀྱི་བུ་དེ་ལྟ་བས་ན། ཁོ་མོས་ནི་བདག་གི་སྨོན་ལམ་ནམ་མཁའི་དབྱིངས་རྣམ་པར་དག་པའི་མཐའ་གང་དུ་ཐུག་པ་དེའི་མཐས་ཀླས་པར་ཤོག་ཤིག །བདག་གི་སྨོན་ལམ་འཇིག་རྟེན་གྱི་ཁམས་རྣམ་པར་དག་པའི་མཐའ་གང་དུ་ཐུག་པ་དེའི་མཐས་ཀླས་པར་ཤོག་ཤིག །བདག་གི་སྨོན་ལམ་སེམས་ཅན་ཐམས་ཅད་ཀྱི་ཉོན་མོངས་པ་དང་། བག་ཆགས་ཀྱི་མཚམས་སྦྱོར་བ་དང་།