གོས་ཐམས་ཅད་ཀྱི་ཤིང་གི་སྤྲིན་གྱི་མཛོད་ནས་གོས་ཁ་དོག་སྣ་ཚོགས་སུ་མཛེས་པའི་ཆར་རབ་ཏུ་འབབ་པས་བརྒྱན་པ་དང་། ཕྲེང་བ་དང་ལྡ་ལྡི་དང་སེ་མོ་དོའི་རྒྱན་ཐམས་ཅད་ཀྱི་སྤྲིན་གྱི་ཆར་རྒྱུན་མི་ཆད་པར་མངོན་པར་འབབ་པས་བརྒྱན་པ་དང་། སྤོས་སྣ་ཚོགས་ཀྱི་བདུག་སྤོས་ཕྱོགས་ཀུན་ནས་འཐུལ་བའི་སྤྲིན་དང་ན་བུན་གྱི་ཆར་ཐམས་ཅད་ཀྱི་ལུས་ཀྱི་དབྱིབས་ལྟར་མངོན་པར་འབབ་པས་བརྒྱན་པ་དང་། རིན་པོ་ཆེ་ཐམས་ཅད་ཀྱི་མེ་ཏོག་གི་དྲ་བའི་སྤྲིན་ལས་རིན་པོ་ཆེའི་རྒྱལ་པོའི་ཕྱེ་མ་ཞིབ་བུའི་ཆར་རྒྱུན་མྱི་འཆད་པར་རབ་ཏུ་འབབ་པ་དང་། རིན་པོ་ཆེ་ཐམས་ཅད་ཀྱི་རྒྱལ་མཚན་དང་བ་དན་གྱི་སྤྲིན་ལྷའི་བུ་མོའི་ལག་ན་ཁྱེར་བ་ནམ་མཁའི་དབྱིངས་ཀུན་ཏུ་རྒྱུ་ཞིང་འཁོར་བས་བརྒྱན་པ་དང་། རིན་པོ་ཆེ་ཐམས་ཅད་ཀྱི་པདྨོ་རིན་པོ་ཆེ་སྣ་ཚོགས་ཀྱི་འདབ་མའི་དཀྱིལ་འཁོར་ཅན་ཆུ་བ་མཐོན་པོ་དང་ལྡན་པའི་ཟེ་བ་ལ་རོལ་མོ་བཀོད་པ་ཀུན་ནས་སྒྲ་འབྱིན་ཅིང་དབྱངས་སྙན་པར་སྒྲོག་པས་བརྒྱན་པ་དང་། རིན་པོ་ཆེའི་འབྲུ་སྣ་ཚོགས་ཀྱི་དྲ་བ་དང་། རིན་པོ་ཆེ་སེང་གེའི་དྲ་བ་སྣ་ཚོགས་རྣམ་པ་ཐ་དད་པའི་ཕྲེང་བ་དང་། སེ་མོ་དོས་བརྒྱན་པར་ཀུན་ནས་གནས་ཤིང་སྣང་བར་གྱུར་ཏོ། །དེ་ལྟར་བཅོམ་ལྡན་འདས་དེ་བཞིན་གཤེགས་པའི་ཏིང་ངེ་འཛིན་ཆེན་པོ་སེང་གེ་རྣམ་པར་བསྒྱིངས་པ་དེ་ལ་ཉམས་པར་བཞག་མ་ཐག་ཏུ། །དེའི་ཚེ་ཤར་ཕྱོགས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་གསེར་གྱི་སྤྲིན་སྒྲོན་མའི་རྒྱལ་མཚན་ཞེས་བྱ་བ་དེ་བཞིན་གཤེགས་པ་རྣམ་པར་སྣང་མཛད་དཔལ་གྱི་གཟི་བརྗིད་རྒྱལ་པོའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་རྣམ་པར་སྣང་བའི་སྨོན་ལམ་གྱི་གཙུག་གི་འོད་ཟེར་སྣང་བ་ཞེས་བྱ་བ་བྱང་ཆུབ་སེམས་དཔའ་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བསྙེད་དང་ལྷན་ཅིག་ཏུ་བཅོམ་ལྡན་འདས་དེས་གནང་ནས་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། ནམ་མཁའི་དབྱིངས་རྒྱན་སྣ་ཚོགས་ཀྱི་སྤྲིན་གྱིས་བརྒྱན་པ་དང་། ལྷ་རྫས་ཀྱི་མེ་ཏོག་གི་སྤྲིན་གྱི་ཆར་མངོན་པར་དབབ་པ་དང་།