ཛེ་ཏའི་ཚལ་ཉིད་ཀྱང་སྤོས་སྣ་ཚོགས་ཀྱི་ཤིང་གྲངས་མྱེད་པའི་སྤྲིན་གྱིས་ཀུན་ནས་ཡོག་ཅིང་བརྒྱན་པ་དང་། བརྗོད་དུ་མྱེད་པའི་རྒྱན་སྣ་ཚོགས་དང་ལྡན་པའི་རི་རབ་ཀྱིས་ཀུན་ནས་འཁོར་ཅིང་རྒྱན་པ་དང་། རོལ་མོ་བརྡུང་བ་དང་། དཀྲོལ་བ་བརྗོད་དུ་མྱེད་པའི་སྤྲིན་ལས་དེ་བཞིན་གཤེགས་པ་ཐམས་ཅད་ལ་བསྟོད་པའི་དབྱངས་དང་ང་རོ་སྙན་པ་འབྱུང་བས་ཀུན་ནས་བརྒྱན་པ་དང་། རིན་པོ་ཆེའི་པདྨོ་བརྗོད་དུ་མྱེད་པའི་སྤྲིན་གྱིས་ཀུན་ནས་ཡོག་ཅིང་བརྒྱན་པ་དང་། རིན་པོ་ཆེའི་སེང་གེའི་ཁྲི་བརྗོད་དུ་མྱེད་པའི་སྟེང་ལྷ་རྫས་ཀྱི་རིན་པོ་ཆེའི་སྟན་བཏིང་བ་ལ། །བྱང་ཆུབ་སེམས་དཔའ་འཁོད་ཅིང་དེ་བཞིན་གཤེགས་པ་ལ་བསྟོད་པའི་སྒྲ་དབྱངས་སྙན་པ་འབྱིན་པའི་སྤྲིན་གྱི་ཀུན་ནས་བརྒྱན་པ་དང་། ལྷའི་དབང་པོ་བརྗོད་དུ་མྱེད་པའི་གཟུགས་བརྙན་མངོན་པར་འབྱུང་བའི་ནོར་བུ་རིན་པོ་ཆེའི་འབྲུའི་སྤྲིན་གྱིས་ཀུན་ནས་བརྒྱན་པ་དང་། མུ་ཏིག་དཀར་པོའི་དྲ་བའི་སྤྲིན་བརྗོད་དུ་མྱེད་པས་ཀུན་ནས་བརྒྱན་པ་དང་། མུ་ཏིག་དཀར་པོའི་ཁང་པ་བརྩེགས་པའི་སྤྲིན་བརྗོད་དུ་མྱེད་པས་ཀུན་ནས་ཡོག་ཅིང་བརྒྱན་པ་དང་། རྡོ་རྗེ་ལྟ་བུར་སྲ་བའི་མུ་ཏིག་གི་སྤྲིན་བརྗོད་དུ་མྱེད་པའི་ཆར་མངོན་པར་འབབ་པས་རབ་ཏུ་བརྒྱན་པར་ཀུན་ནས་གནས་པར་གྱུར་ཏོ། །དེ་ཅིའི་ཕྱིར་ཞེ་ན། དེ་ནི་དེ་བཞིན་གཤེགས་པའི་དགེ་བའི་རྩ་བ་བསམ་གྱིས་མི་ཁྱབ་པའི་ཕྱིར་རོ། །དེ་བཞིན་གཤེགས་པའི་ཆོས་དཀར་པོའི་ཚོགས་བསམ་གྱིས་མི་ཁྱབ་པའི་ཕྱིར་རོ། །དེ་བཞིན་གཤེགས་པའི་ཁྱུ་མཆོག་གི་མཐུ་དང་། བྱིན་གྱི་རླབས། བསམ་གྱིས་མྱི་ཁྱབ་པའི་ཕྱིར་རོ། །དེ་བཞིན་གཤེགས་པའི་སྐུ་གཅིག་གིས་འཇིག་རྟེན་གྱི་ཁམས་ཐམས་ཅད་དུ་རྒྱས་པར་འགེངས་པ་རྣམ་པར་འཕྲུལ་པ་བསམ་གྱིས་མྱི་ཁྱབ་པའི་ཕྱིར་རོ། དེ་བཞིན་གཤེགས་པ་ཐམས་ཅད་ཀྱི་སྐུ་གཅིག་ཏུ་ཞུགས་པས། སངས་རྒྱས་ཀྱི་ཞིང་རྣམ་པར་ཕྱེ་བ་ཐམས་ཅད་ལ་ཡང་དག་པར་གཞོལ་བའི་བྱིན་གྱི་རླབས་ཡོངས་སུ་སྟོན་པ་བསམ་གྱིས་མྱི་ཁྱབ་པའི་ཕྱིར་རོ། །དེ་བཞིན་གཤེགས་པ་རྣམས་རྡུལ་ཤིན་ཏུ་ཕྲ་བ་གཅིག་ལ་ཆོས་ཀྱི་དབྱིངས་ཐམས་ཅད་ཀྱི་གཟུགས་བརྙན་རྣམ་པར་དམྱིགས་པར་ཡོངས་སུ་སྟོན་པར་མཛད་པ་བསམ་གྱིས་མྱི་ཁྱབ་པའི་ཕྱིར་རོ།