།ལྟོ་འཕྱེ་ཆེན་པོའི་དབང་པོ་རྣམས་ཀྱིས་ནམ་མཁའ་དེ་ལ་གོས་ཤིན་ཏུ་ཕྲ་ཞིང་མདོག་བཟང་བའི་སྤྲིན་བསམ་གྱིས་མི་ཁྱབ་པ་དག་ཡིད་དགའ་བས་བཀྱེ་སྟེ། དགེ་སློང་ཤིན་ཏུ་བརྟན་པ་ལ་དད་ཅིང་མོས་པའི་གཟུགས་སུ་ཕྱུང་བ་མཐོང་ངོ་། །ལྷ་མ་ཡིན་གྱི་དབང་པོ་རྣམས་ཀྱིས་ཀྱང་ནམ་མཁའ་དེ་ལ་ནོར་བུ་རིན་པོ་ཆེའི་སྤྲིན་བསམ་གྱིས་མི་ཁྱབ་པ་བྱིན་གྱིས་བརླབས་ཏེ། ཡོན་ཏན་བསམ་གྱིས་མི་ཁྱབ་པའི་རྒྱན་སྣང་བ་དང་ལྡན་པར་བྱས་པ་མཐོང་ངོ་། །ནམ་མཁའ་ལྡིང་གི་དབང་པོ་མང་པོ་ཡང་མྱིའི་གཟུགས་དང་ཁ་དོག་དང་དབྱིབས་སུ་འཁོད་ཅིང་ནམ་མཁའ་ལྡིང་གི་དབང་པོའི་བུ་མོས་ཀུན་ནས་བསྐོར་ཏེ། གསོད་པ་མེད་པ་ལ་དགའ་ཞིང་ཐལ་མོ་སྦྱར་ཏེ་གནས་པ་བསམ་གྱིས་མི་ཁྱབ་པ་མཐོང་ངོ་། །གནོད་སྦྱིན་གྱི་དབང་པོ་བརྒྱ་སྟོང་འཁོར་དང་བཅས་པ་བསམ་གྱིས་མི་ཁྱབ་པ་དག་ཀྱང་ནམ་མཁའ་དེ་ལ་ཤིན་ཏུ་མི་སྡུག་པའི་གཟུགས་སུ་དགེ་སློང་ཤིན་ཏུ་བརྟན་པ་ལ་བྱམས་པའི་མཐུ་དང་ལྡན་པར་འཁོད་པ་མཐོང་ངོ་། །སྲིན་པོའི་དབང་པོ་བརྒྱ་སྟོང་འཁོར་དང་བཅས་པ་བསམ་གྱིས་མི་ཁྱབ་པ་དག་ཀྱང་ནམ་མཁའ་དེ་ལ་དགེ་སློང་ཤིན་ཏུ་བརྟན་པ་ཡོངས་སུ་བསྲུང་བ་བྱེད་ཅིང་ཀུན་ཏུ་རྒྱུ་བ་མཐོང་ངོ་། །ཚངས་པའི་དབང་པོ་བརྒྱ་སྟོང་བསམ་གྱིས་མི་ཁྱབ་པ་དག་ཀྱང་ནམ་མཁའ་དེ་ལ་ཐལ་མོ་སྦྱར་ཅིང་དགའ་བ་དང་ཡིད་དུ་འོང་བའི་ཚིག་གི་རྒྱུད་ཀྱི་བསྟོད་པ་རབ་ཏུ་བརྗོད་པ་མཐོང་ངོ་། །གནས་གཙང་མའི་ལྷ་བརྒྱ་སྟོང་བསམ་གྱིས་མི་ཁྱབ་པ་དག་ཀྱང་ནམ་མཁའ་དེ་ལ་དགེ་སློང་ཤིན་ཏུ་བརྟན་པ་ལ་མཆོད་པའི་ལས་སུ་བྱ་བའི་ཕྱིར་ཐལ་མོ་སྦྱར་ཅིང་གཞལ་མེད་ཁང་ན་གནས་པ་མཐོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དགེ་སློང་ཤིན་ཏུ་བརྟན་པ་དེ་ལྟར་ནམ་མཁའི་དབྱིངས་ལ་འཆག་ཅིང་འདུག་པ་མཐོང་ནས་དགའ་རངས་ཏེ་མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། དགེ་སློང་ཤིན་ཏུ་བརྟན་པ་ལ་ཐལ་མོ་སྦྱར་ཏེ་ཕྱག་འཚལ་ནས་འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། ཇི་ལྟར་བྱང་ཆུབ་སེམས་དཔའི་སངས་རྒྱས་ཀྱི་ཆོས་བཙལ་བར་བགྱི་བ་དང་། ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཆོས་ཡོངས་སུ་བསྒྲུབ་པར་བགྱི་བ་དང་།