ཆོས་ཀྱི་ཚིག་དང་ཡི་གེའི་སྤྲིན་དེ་དག་ཀྱང་ཡོངས་སུ་གཟུང་བ་དང་། ཆོས་ཀྱི་སྒོ་རྒྱ་མཚོའི་ཚུལ་དེ་དག་ལའང་འཇུག་པར་བྱ་བ་དང་ཆོས་ཀྱི་ཚུལ་དེའང་རྣམ་པར་བལྟ་བ་དང་། ཆོས་ཀྱི་ལེའུ་དང་གློང་གི་ཚུལ་དེ་དག་ལ་འཇུག་པར་བྱ་བ་དང་། ཆོས་ཀྱི་ནམ་མཁའ་དེ་ལ་ཡང་དག་པར་གཞོལ་བར་བྱ་བ་དང་། ཆོས་ཀྱི་དཀྱིལ་འཁོར་དེ་ཡང་རྗེས་སུ་སྦྱང་བར་བྱ་བ་དང་། ཆོས་རིན་པོ་ཆེའི་གླིང་དེ་ཡང་རྗེས་སུ་སེམས་ཤིང་མཐར་གྱིས་ལང་ཀའི་གནས་རྒྱ་མཚོའི་ངོགས་ཤེས་བྱ་བ་གདན་པ་དེར་ཕྱིན་ནས། དགེ་སློང་ཤིན་ཏུ་བརྟན་པ་མཐོང་བར་དགའ་ཞིང་ཤར་ཕྱོགས་སུ་བལྟས་སོ། །དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། བླ་དང་འོག་ཏུ་དགེ་སློང་ཤིན་ཏུ་བརྟན་པ་མཐོང་བར་དགའ་སྟེ། ཀུན་ཏུ་བལྟས་པ་དང་། དེས་དགེ་སློང་ཤིན་ཏུ་བརྟན་པ་ནམ་མཁའི་དབྱིངས་ལ་ལྷ་བརྒྱ་སྟོང་གྲངས་མེད་པས་ཡོངས་སུ་བསྐོར་ཅིང་ཕན་ཚུན་དུ་འཆག་པ་མཐོང་ངོ་། །ནམ་མཁའི་དབྱིངས་དེ་ཡང་ལྷའི་དབང་པོ་རྣམས་ཀྱིས་དགེ་སློང་ཤིན་ཏུ་བརྟན་པ་ལ་མཆོད་པའི་ལས་སུ་བྱ་བའི་ཕྱིར། ལྷ་རྫས་ཀྱི་མེ་ཏོག་སིལ་མའི་སྤྲིན་གྱིས་ཡོག་པ་དང་། ལྷ་རྫས་ཀྱི་རོལ་མོའི་སྤྲིན་གྱི་སྒྲ་དང་། དར་གྱི་བ་དན་གྲངས་མེད་པའི་རྒྱན་གྱིས་བརྒྱན་པར་མཐོང་ངོ་། །ཀླུའི་དབང་པོ་རྣམས་ཀྱིས་ནམ་མཁའ་དེ་ལ་ཨ་ག་རུ་ནག་པོའི་སྤོས་མངོན་པར་འཐུལ་བའི་སྤྲིན་ཤིན་ཏུ་མཐོ་བ་ལས་འབྲུག་སྒྲ་བསམ་གྱིས་མི་ཁྱབ་པ་འབྱུང་བར་བྱས་པ་མཐོང་ངོ་། །མི་འམ་ཅིའི་དབང་པོ་རྣམས་ཀྱིས་ནམ་མཁའ་དེ་ལ་ལྷ་རྫས་ཀྱི་ངག་སྙན་པའི་རྒྱུད་ཀྱི་བསྟོད་པའི་རོལ་མོ་བརྡུང་བ་དང་། དཀྲོལ་བ་དང་གླུར་བླང་བའི་དབྱངས་ཐམས་ཅད་སྦྱར་ཅིང་བླངས་པ་ཐོས་པར་གྱུར་ཏོ། །ལྟོ་འཕྱེ་ཆེན་པོའི་དབང་པོ་རྣམས་ཀྱིས་ནམ་མཁའ་དེ་ལ་གོས་ཤིན་ཏུ་ཕྲ་ཞིང་མདོག་བཟང་བའི་སྤྲིན་བསམ་གྱིས་མི་ཁྱབ་པ་དག་ཡིད་དགའ་བས་བཀྱེ་སྟེ།