།ཟླ་ཕྱེད་དང་ནི་གྲུ་གསུམ་པ། །རྡོ་རྗེའི་མཚན་མའི་མུ་རན་དང་། །དཀྱིལ་འཁོར་གྲྭར་ནི་སྤྲོ་བར་བྱ། །ཐབ་ཁུང་དབུས་སུ་གཙུག་ཏོར་དང་། །ཆུ་སྐྱེས་རྡོ་རྗེ་རིན་ཆེན་དང་། །པདྨ་གཞུག་པར་བྱ་བའོ། །སྦྱིན་སྲེག་དེ་ཉིད་ཆོག་རིམ་པས། །རྣལ་འབྱོར་ཇི་བཞིན་གནས་ནས་ནི། །པུས་མོའི་ནང་དུ་ལག་པ་ཉིད། །བླུགས་གཟར་མར་ཁུས་ཁྱབ་པས་ནི། །དེ་བཞིན་དགང་གཟར་དགང་བླུགས་ཉིད། །གཡས་སུ་སྦྱིན་སྲེག་ཡོ་བྱད་གཞག །གཡོན་དུ་ཆུ་ཡི་སྣོད་ཉིད་དེ། །མདུན་དུ་མཆོད་ཡོན་སྣོད་ཉིད་དོ། །ལས་ཀུན་བྱེད་པ་བཟླས་པས་ནི། །བསང་གཏོར་དང་ནི་འཐོར་འཐུང་བྱ། །ཐབ་ཁུང་ཀུན་དུ་ཀུ་ཤ་ཡི། །རྩེ་མོ་དྲང་པོས་ཡོངས་སུ་བསྐོར། །མེ་ནི་འབར་བར་རིག་ནས་ནི། །མེ་ལྷ་སྤྱན་ནི་དྲང་བར་བྱ། །སྔགས་འདིས་ཆོ་ག་བཞིན་དུ་གཡས་པའི་མཐེ་བོང་དང་། མེ་འཇིགས་པ་གཡོ་བས། ཨོཾ་ཨེ་ཧྱེ་ཧི་མ་ཧཱ་བྷཱུ་ཏ་དེ་པ་རྀ་ཥི་དྭི་ཛ་སཏྟ་མ་གྲྀ་ཧཱི་ཏྭཱ་ཧུ་ཏི་མ་ཧཱ་ར་མ་སྨིན་སནྣི་ཧི་ཏོ་བྷ་བ། ཨོྃ་ཨགྣེ་དཱི་པྱཱ་དཱི་པྱཱ་བི་ཤ་མ་ཧཱ་ཤྲི་ཡེ། ཧ་བྱ་ཀ་བྱ་བཱ་ཧ་ན་ཡ་སྭཱ་ཧཱ། མཆོད་པ་ལྔ་ལ་གཡོན་པའི་རྡོ་རྗེས་བསང་གཏོར་བྱ་ཞིང་། མེའི་ཕྱོགས་ནས་བཀུག་པ་ལྟོ་བ་འཕྱང་ཞིང་མིག་གསུམ་པ་དང་། ཞལ་བཞི་པ་དང་། ཕྱག་བཞི་པ་དང་། ཁ་དོག་དམར་ཞིང་རལ་པ་ཆེན་པོ་དང་། མེའི་དཀྱིལ་འཁོར་ལ་གནས་ཤིང་ལས་ཀྱི་འོད་ཟེར་གྱིས་བརྒྱན་པ་སྟེ། ལག་པ་དང་པོ་ན་མཆོག་སྦྱིན། གཉིས་པ་ན་བགྲང་ཕྲེང་། གཡོན་པ་ན་རིལ་བ་སྤྱི་བླུགས་ཉིད་དང་། གཉིས་པ་ན་དབྱིག་གུ་ཉིད། ཁ་དོག་དམར་པོས་རྣམ་པར་བརྒྱན་ཅིང་དྲང་སྲོང་གི་ཚོགས་ཀྱིས་ཡོངས་སུ་བསྐོར་བ་འདི་ལྟ་བུའི་གཟུགས་སུ་བསམས་ནས་ཐབ་ཁུང་གི་དབུས་སུ་གཞུག་པར་བྱའོ། །དེའི་སྦྱིན་སྲེག་ཐམས་ཅད་ལ་ལན་གསུམ་གྱི་བར་དུ་སྲེག་བླུགས་སྦྱིན་ཏེ། དེ་ནས་འཐོར་འཐུང་བྱས་ནས་འབར་བའི་རྣམ་པས་ཐིམ་པར་བྱའོ། །རིམ་པའི་སྦྱོར་བ་འདིས་ལྷ་རྣམས་མཁས་པས་ཚིམ་པར་བྱའོ། །ཚིམ་པར་བྱས་ནས་བཟོད་པར་གསོལ་ཏོ། །དངོས་གྲུབ་འདོད་པས་ཤེས་པར་བྱ་སྟེ།