དེའི་ཆུང་མས་ཆུ་བཅུ་བའི་ཕྱིར་བུམ་པ་ཐག་པས་བཏགས་ནས་དེའི་ནང་དུ་བཏང་སྟེ་ཆུ་ཡར་དབྱུང་སྙམ་པ་དང་། རེ་ཞིག་ན་ཡར་དབྱུང་བར་མ་ནུས་ནས་དེས་རྒྱལ་བ་པོ་ལ། ཇོ་བོ་བུམ་པ་འདི་ཡར་དབྱུང་བར་མི་ནུས་ན་ཚུར་སྤྱོན་ཏེ་གཟིགས་ཞེས་བོས་སོ། །དེ་ནས་དེས་ཀྱང་ཡར་དབྱུང་བར་བརྩམས་སོ། །རེ་ཞིག་ན་དེས་ཀྱང་ཡར་དབྱུང་མ་ནུས་ནས་དེ་གཉིས་ཀྱིས་བུ་ལ་བོས་སོ། །དེ་ནས་དེ་གསུམ་ཆར་གྱིས་ཤ་དང་པགས་པ་རལ་ཏེ། འབད་པ་ཆེན་པོས་དེའུ་མ་ཕྱིན་ཏེ་ཕྱིན་ཏོ། །རེ་ཞིག་ན་བལྟས་ན་བུམ་པ་དེའི་འོག་ན་ཟངས་ཟུང་ལྔ་གསེར་དངུལ་གྱིས་ཡོངས་སུ་གང་བ་ཐོགས་ཤིང་འདུག་པ་མཐོང་སྟེ། དེ་ནས་རྒྱན་པོ་པ་རྒྱལ་བ་པོས་ཚེ་འདིའི་སྦྱིན་པའི་འབྲས་བུ་ཤིན་ཏུ་རྨད་དུ་བྱུང་བ་དེ་མཐོང་ནས་ཡ་མཚན་གྱིས་མིག་རྒྱས་ཏེ། སྙིང་རབ་ཏུ་དགའ་ནས་ཚིགས་སུ་བཅད་དེ་སྨྲས་པ། ཀྱེ་མ་ཉེས་པ་ཀུན་སྤངས་པ། །ཡོན་ཏན་ངོ་བོ་ཉིད་ཀྱི་ཞིང་། །ད་ལྟ་བདག་གིས་ས་བོན་བཏབ། །ད་ལྟར་ཉིད་དུ་འབྲས་བུར་སྨིན། །ཅེས་སྨྲས་སོ། །དེ་ནས་དེའི་ཆུང་མ་དེ་ཡང་ཡ་མཚན་གྱིས་མིག་རྒྱས་ཏེ་སྨྲས་པ། ཇོ་བོ་འདི་ཅི་ཞིག་ལ་དགོངས་ཏེ་གསུངས། དེས་སྐབས་འདི་རྒྱས་པར་བསྙད་དོ། །དེ་ནས་དེས་ཚེ་འདི་ཉིད་ལ་བསོད་ནམས་དག་གིས་འབྲས་བུ་མཆོག་ཏུ་ཡིད་དུ་འོང་བ་སྨིན་པའི་རྨད་དུ་བྱུང་བ་དེ་མཐོང་ནས་ཡ་མཚན་དུ་གྱུར་ཏོ། །གཏམ་དེ་ཡང་གཅིག་ནས་གཅིག་ཏུ་ཐོས་པས་རྒྱལ་པོའི་ཕོ་བྲང་འཁོར་དེ་དག་ཀུན་དུ་གྲགས་སོ། །དེ་ཐོས་པས་སྐྱེ་བོ་ཕལ་པོ་ཆེ་ངོ་མཚར་དུ་གྱུར་ཅིང་རྨད་དུ་གྱུར་ནས་ཕན་ཚུན་དུ་ཀྱེ་མ་ངོ་མཚར་ཏོ། །ཀྱེ་མ་བསོད་ནམས་དག་གི་ཆེ་བ་ཉིད་ཅེས་འཛིན་ཏོ། །དེ་ནས་གློ་བུར་དུ་ཕྱུག་ཅིང་ནོར་མང་ལ་ལོངས་སྤྱོད་ཆེ་བར་གྱུར་ཏེ་བསོད་ནམས་ཀྱི་འབྲས་བུ་མངོན་སུམ་དུ་མཐོང་ནས། དེས་སངས་རྒྱས་དང་ཆོས་དང་དགེ་འདུན་རྣམས་ལ་དད་པ་དྲག་པོས་ཤས་ཆེར་བཀུར་སྟི་བྱས་སོ། །དེ་ནས་དེ་ཉིན་གཅིག་བཞིན་དུ་དེ་བཞིན་གཤེགས་པའི་མཆོད་རྟེན་ལ་མཆོད་པ་རྒྱ་ཆེར་བྱེད་དོ། །ཆོས་ཀྱང་ཉན་ཏོ། །དགེ་འདུན་གྱིས་བསྐོས་པའི་དགེ་སློང་དག་ཀྱང་ཉིན་གཅིག་བཞིན་དུ་ཁ་ཟས་བཟང་པོས་ཡང་དག་པར་ཚིམ་པར་བྱེད་དོ། །དགེ་སྦྱོང་དང་། བྲམ་ཟེ་དང་། བཀྲེན་པ་དང་། ནད་པ་དང་། སློང་བ་གཞན་དག་ཀྱང་ནོར་གྱིས་ཅི་འདོད་པར་ཡང་དག་པར་འཚེངས་པར་བྱེད་དོ། །