འབྲུ་ཐམས་ཅད་ཀྱང་མ་རྨོས་མ་བཏབ་པར་མཐུ་དང་ལྡན་པར་ནི་སྨིན་ཏོ། །སེང་གེའི་ཁྲི་དེའི་འོག་ནས་ཀྱང་གཏེར་ཆེན་པོ་ལྔ་རིན་པོ་ཆེ་སྣ་ཚོགས་ཀྱིས་ལེགས་པར་ཡོངས་སུ་གང་བ་རྣམས་ཀྱིས་ཁ་བསྟན་ཏེ་གོད་པར་བྱས་ཀྱང་ཡོངས་སུ་ཟད་པར་མི་འགྱུར་རོ། །སེམས་ཅན་ཕན་ཚུན་འཁོད་པ་རྣམས་ཀྱང་དེའི་ཡུད་ཙམ་ལ་བྱམས་པའི་སེམས་སུ་གྱུར་ཏོ། །གཞོན་ནུ་རྫུ་འཕྲུལ་ཆེ་ཞིང་མཐུ་ཆེ་བ་དེ་བཙས་མ་ཐག་ཏུ་ཚེ་རབས་དྲན་ཏེ། ཕྱོགས་བཞིར་བལྟས་ནས་ཚིགས་སུ་བཅད་དེ་སྨྲས་པ། བསོད་ནམས་བསགས་ན་བདེ་བར་འགྱུར། །དེ་ཕྱིར་མི་ཡིས་བསོད་ནམས་བྱ། །དེ་ཡང་ཡང་དང་ཡང་དུ་བྱ། །དེ་ཉིད་ལ་ནི་འདུན་པར་བྱ། །ཞེས་སྨྲས་སོ། །དེ་ནས་ནམ་མཁའ་ལ་གནས་པའི་ལྷ་རྫུ་འཕྲུལ་ཆེ་ཞིང་མཐུ་ཆེ་བ་ཞིག་གིས་བསོད་ནམས་དག་གི་ཤིན་ཏུ་རྨད་དུ་བྱུང་བ་ཤིན་ཏུ་ཡིད་དུ་འོང་བ་རྣམ་པར་གཡོ་བ་དེ་མཐོང་ནས་སེམས་ཡང་དག་པར་དགའ་བར་གྱུར་ཏེ། བསོད་ནམས་དག་གི་ཆེ་བ་ཉིད་བསྟན་པའི་ཕྱིར་དེའི་ཚེ་ཚིགས་སུ་བཅད་དེ་སྨྲས་པ། བསོད་ནམས་དག་གི་གཡོ་བ་ལྟོས། །རྒྱལ་པོ་ཆེན་པོ་བཞི་རྣམས་དང་། །སུམ་ཅུ་རྩ་གསུམ་དབང་པོར་བཅས། །བསོད་ནམས་ཀྱིས་ནི་དེའི་དབང་བྱས། །ཞེས་སྨྲས་སོ། །དེ་ནས་རྒྱལ་པོ་དེ་བཙུན་མོའི་འཁོར་དང་། སྲས་དང་། བློན་པོ་དང་། ཕོ་བྲང་འཁོར་གྱི་མི་དང་། ཡུལ་གྱི་མི་དང་བཅས་པས་ཕུན་སུམ་ཚོགས་པ་དེ་དག་མཐོང་ནས་ཡ་མཚན་གྱིས་མིག་རྒྱས་པར་གྱུར་ཏེ། མཆོག་ཏུ་ཡ་མཚན་དུ་གྱུར་ནས། ཀྱེ་མ་གཞོན་ནུའི་བསོད་ནམས་ཀྱི་སྟོབས། ཀྱེ་མ་གཞོན་ནུའི་བསོད་ནམས་ཀྱིས་ཆེར་གྲགས་པ་འདི་ལྟར་འདི་མིར་གྱུར་དུ་ཟིན་ཀྱང་འདི་ལྟ་བུར་ལྷའི་འབྱོར་པ་རྒྱས་པ་བྱུང་བར་གྱུར་པ་འདི་ནི་ཡ་མཚན་ཆེའོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་རྒྱལ་པོ་སེམས་རབ་ཏུ་དགའ་ཞིང་བུ་སྙིང་དུ་སྡུག་ནས་དཀོར་པ་རྣམས་ལ་བསྒོ་སྟེ། བཀའ་སྙན་གསོལ་པ་རྣམས་ཀྱི་ཕྱིར་རྒྱལ་པོའི་ར་བར་གསེར་དངུལ་གྱི་ཕུང་པོ་སྤུངས་ནས་སྦྱིན་པ་དག་བྱིན་ཏེ་བསོད་ནམས་དག་བྱས་སོ། །ནོར་མེད་པ་དུ་མ་ནི་ནོར་དང་ལྡན་པ་ལ་བཀོད་དོ། །དེ་ནས་རེ་ཞིག་ན་འབྱོར་པ་ཆེན་པོ་རྒྱས་པས་དེ་བཙས་པའི་བཙས་སྟོན་ཆེན་པོ་བྱས་ནས་མིང་འདོགས་པར་བྱེད་དེ།