བྲམ་ཟེ་གང་གིས་དབྱར་ཟླ་བ་བཞིའི་བར་དུ་བྱམས་པ་དང་ལྡན་པའི་སེམས་ཀྱིས་གནས་པ་དེ་ལ། མི་མཇེད་ཀྱི་བདག་པོ་ཚངས་པ་བལྟར་འོང་ངོ་ཞེས་ཟེར་གྱིས་མ་ལ་བདག་གིས་ཐམས་ཅད་སྤངས་ཏེ། ཁང་བཟངས་ཀྱི་སྟེང་དུ་སོང་ལ། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་ལྡན་པའི་སེམས་ཀྱིས་གནས་པར་བྱ་གོར་མ་ཆག་སྙམ་ནས། རྒྱལ་པོ་ལ་གསོལ་པ། ལྷ་མཁྱེན་པར་མཛད་དུ་གསོལ། བདག་ནི་དབྱར་ཟླ་བ་བཞི་ཚངས་པའི་གནས་ཀྱིས་གནས་པར་འཚལ་ཏེ། དེ་བས་ན་ལྷས་ལྷ་ཉིད་ཀྱི་རྒྱལ་པོའི་ཕྲིན་ལས་སུ་བགྱི་བ་གང་ལགས་པ་ཐམས་ཅད་བགྱིད་པའི་མདུན་ན་འདོན་གཞན་ཞིག་བསྒོ་བར་གསོལ་ཞེས་སྨྲས་སོ། །དེ་ནས་རྒྱལ་པོ་རྡུལ་གྱིས་སྨྲས་པ། ཁྱོད་ཅི་ལྟར་དགའ་བ་དེ་བཞིན་དུ་བྱའོ། །དེ་ནས་དེ་ཐོས་མ་ཐག་ཏུ་བྲམ་ཟེ་ཁྱབ་འཇུག་ཆེན་པོས་ལས་སུ་བྱ་བ་ཐམས་ཅད་སྤངས་ནས། ཁང་བཟངས་ཀྱི་སྟེང་དུ་སོང་སྟེ། ཁང་བཟངས་ཀྱི་སྟེང་ན་འདུག་ཅིང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་ལྡན་པའི་སེམས་ཀྱིས་གནས་སོ། །དེ་ནས་ཕྱི་ཞིག་ན་དེ་ལ་མི་མཇེད་ཀྱི་བདག་པོ་ཚངས་པ་བལྟར་འོངས་ནས། མི་མཇེད་ཀྱི་བདག་པོ་ཚངས་པའི་ཁ་དོག་གི་མཐུས། ཁང་བཟངས་དེ་དག་ཐམས་ཅད་སྣང་བ་ཆེན་པོས་ཁྱབ་པར་གྱུར་ཏོ། །དེ་ནས་དེ་མཐོང་ནས་ཚིགས་སུ་བཅད་དེ་སྨྲས་པ། བདག་གིས་ཁ་དོག་འདི་འདྲ་བ། །སྔོན་ཅད་མ་ཐོས་མ་མཐོང་སྟེ། །ཁ་དོག་བཟང་ཞིང་གཟུགས་བཟང་བ། །གྲོགས་པོ་ཁྱོད་ནི་སུ་ཞིག་ལགས། །མི་མཇེད་ཀྱི་བདག་པོ་ཚངས་པས་སྨྲས་པ། གཞོན་ནུ་བརྒྱ་བྱིན་ལ་སོགས་དང་། །དེ་བཞིན་ལུས་ཅན་གཞན་དག་ཀྱང་། །བདག་ནི་ཚངས་པའི་ལུས་སུ་ཤེས། །ཁྱབ་འཇུག་དེ་ལྟར་ཤེས་པར་གྱིས། །བྲམ་ཟེ་ཆེ་ཞིང་མ་ཐོབ་ཁྱབ་འཇུག་གིས་སྨྲས་པ། ཚངས་པ་ཁྱོད་ལ་འདུད་པར་བགྱི། །ཚངས་པ་ཁྱོད་ལ་མཆོད་པར་འཚལ། །བདག་གི་ཚིག་ནི་གསན་ནས་ཀྱང་། །ལན་ནི་མྱུར་དུ་བཀའ་སྩོལ་ཅིག །མི་མཇེད་ཀྱི་བདག་པོ་ཚངས་པས་སྨྲས་པས། ཁྱབ་འཇུག་ཁྱོད་ཀྱིས་སྨྲས་པ་ཡི། །ཚིག་ནི་བདག་གིས་གཟུང་བར་བྱ། །འདྲི་བ་ཡིད་ལ་ཅི་འདོད་པ། །བྲམ་ཟེས་ང་ལ་དྲི་བར་གྱིས།