རྒྱལ་སྲིད་འཛིན་མི་ནུས་ན་འདིས་ན་བདག་ཤི་བའི་འོག་ཏུ། བདག་གི་བློན་པོའི་ནང་ན་གང་ཞིག་གིས་བདག་གི་བུ་དང་རྒྱལ་སྲིད་སྲུང་ནུས་ཞིག་གུ་སྙམ་མོ། །དེ་ནས་དེས་བལྟས་ན་བློན་པོ་ལྔ་བརྒྱ་པོ་ཐམས་ཅད་ནི་རྒྱགས་ཤིང་བག་མེད་པར་གནས་ན། གཞན་སུ་ཡོད་སྙམ་སྟེ། བརྟགས་ན་བློན་པོའི་མཆོག་མཛོད་ཅེས་བྱ་བ་མཁས་ཤིང་གསལ་ལ་ཡིད་གཞུངས་པ་གཞུང་ལུགས་ཅན་དུལ་བ་དང་ལྡན་པ་བག་ཡོད་པ་དེས་ནི་བདག་འདས་པའི་འོག་ཏུ་བུ་དང་རྒྱལ་སྲིད་སྲུང་ནུས་སོ་སྙམ་མོ། །དེ་ནས་དེས་བསམས་པ། བདག་གིས་ཅི་ནས་དེ་ཡུལ་ན་གནས་པའི་སྐྱེ་བོ་མང་པོ་ཐམས་ཅད་ཀྱིས་བཀུར་བར་འགྱུར་བ་དེ་ལྟ་བུར་བཀུར་སྟི་བྱའོ་སྙམ་ནས་རྒྱལ་པོ་དེས་དེ་ལ་ཕོ་ཉ་བཏང་སྟེ། ང་ཁྱོད་དང་ཕྲད་པར་འདོད་ཀྱིས་ཤོག་ཅིག་ཅེས་སྤྲིང་ངོ་། །དེ་ནས་བློན་པོའི་མཆོག་མཛོད་ཅེས་བྱ་བས་དེ་ཐོས་མ་ཐག་ཏུ་བཱ་རཱ་ཎ་སཱིར་ཆས་སོ། །རྒྱལ་པོ་དེས་ཀྱང་དེ་ལ་བཀུར་སྟི་བྱ་བའི་ཕྱིར། ལམ་དང་གྲོང་ཁྱེར་མཛེས་པར་བྱེད་དུ་བཅུག་ནས་རྒྱལ་པོ་དེས་དཔུང་གི་ཚོགས་ཡན་ལག་བཞི་གོ་བསྐོན་ནས། རང་ཉིད་ཀྱིས་བློན་པོའི་མཆོག་མཛོད་ཅེས་བྱ་བ་བསུ་ནས། རྒྱལ་པོ་ཚངས་པས་བྱིན་གྱིས་བར་སྐབས་གང་དུ་དེ་དང་ཕྲད་པའི་བར་སྐབས་དེར། གླང་པོ་ཆེ་ལས་བབས་ནས་ཡང་དག་པར་དགའ་བར་བྱས་ཏེ། མགུལ་ནས་འཇུས་ནས་བཞོན་པ་གཅིག་ལ་ཞོན་ཏེ། འབྱོར་པ་ཆེན་པོ་དང་ལྡན་པས་གྲོང་ཁྱེར་བཱ་རཱ་ཎ་སཱིར་སོང་ནས་སྟན་གཅིག་ལ་འདུག་ཏུ་བཅུག་སྟེ་ཁ་ཟས་གཅིག་ཏུ་གཡོས་པ་དང་སྡེར་གཅིག་ཏུ་ཟན་ཟོས་ནས་ནོར་གྱི་ཕུང་པོ་ཆེན་པོ་བྱིན་ནོ། །བྱིན་ནས་ཀྱང་རྒྱལ་པོ་དེས་དེ་ལ་སྨྲས་པ། མཛོད་ད་ནི་ང་རྒས་ཏེ། རིང་པོར་མི་ཐོགས་པར་འཆི་བར་འགྱུར་ལ། བློན་པོ་ལྔ་བརྒྱ་པོ་འདི་རྣམས་ཀྱིས་ང་ཤི་བའི་འོག་ཏུ་རྒྱལ་པོ་བྱིས་པ་ཡིན་སྙམ་སྟེ། གཞོན་ནུ་ལ་བརྙས་པར་འགྱུར་དུ་འོང་ལ། ང་ཤི་བའི་འོག་ཏུ་ཁྱོད་ཀྱིས་བུ་དང་། རྒྱལ་སྲིད་སྲུང་ནུས་པས་ན་ངས་ཁྱོད་ལ་བུ་དང་རྒྱལ་སྲིད་གཏད་ཀྱིས། ང་ཤི་བའི་འོག་ཏུ་འདི་གཉིས་བསྲུང་བར་གྱིས་ཤིག་ཅེས་བྱས་སོ།