Degé Kangyur volume 73, F.140.a

ངའི་བུ་སོང་ནས་ལོ་དུ་མ་ལོན་ན་དེས་འདི་ཇི་ལྟར་བྱས། དེ་ནས་བུ་མོ་དེས་དེ་གཉིས་ལ་གཏམ་དེ་རྒྱས་པར་བསྙད་པ་དང་དེ་གཉིས་ན་རེ་ཁྱོད་ཇི་སྐད་ཟེར་བ་དེ་ལྟ་ནི་མ་ཡིན་ནོ། །​དེ་ནས་འཁང་བཞིན་དུ་ཉེས་པ་བྱས་སོ་སྙམ་སྟེ་ཁྱིམ་ནས་བསྐྲད་དོ། །​དེ་ནས་དེ་བཱ་རཱ་ཎ་སཱི་ནས་བྱུང་སྟེ་ཕའི་ཁྱིམ་ལོགས་སུ་ཆས་ཏེ་དེ་སོང་སོང་བ་ལས་རི་ཁྲོད་ཀྱི་གྲོང་ཞིག་ཏུ་ཕྱིན་ནས། དེ་དེར་སོང་སྟེ་ལམ་པོ་ཆེར་བཞག་པ་དང་། དེའི་ནུབ་མོ་བུ་བྱུང་ནས་དེ་ན་ཚ་མི་བཟོད་དེ་མྱོས་ཤིང་འདུག་པ་ལས་ཐག་ཉེ་བ་ཞིག་ན་ཁྱིམ་བདག་ཅིག་གནས་ཏེ། དེའི་ཁྱིམ་ན་ཁྱིའི་མིང་འབྱུང་པོ་ཞེས་བྱ་བ་ཞིག་ཡོད་དེ། ཁྱི་དེ་ལམ་པོ་ཆེར་སོང་ནས་ཁྱེའུ་དེ་མཐོང་སྟེ་དེས་བུད་མེད་དེ་མྱོས་ཤིང་འདུག་པའི་བར་དུ་ཁྱེའུ་དེ་སོས་བཟུང་ནས་རང་གི་ཁྱིམ་དུ་སོང་བ་དང་། ཁྱིམ་བདག་དེས་ཀྱང་ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་དེ་མཐོང་ནས་མཐོང་མ་ཐག་ཏུ་བསམས་པ། བུ་མ་རུངས་པ་བས་ནི་གཞན་གྱི་བུ་ཡང་བུར་བྱར་རུང་ལ། བདག་ལ་བུ་ཡང་མེད་བུ་མོ་ཡང་མེད་པས་ན་ཁྱེའུ་འདི་ཁོ་ན་བླངས་ཏེ། གསོས་དང་འདི་བདག་གི་བུར་འགྱུར་རོ་སྙམ་དུ་བསམས་ནས་ཆུང་མ་ལ་སྨྲས་པ། བཟང་མོ་ཤེས་པར་གྱིས་ཤིག །​བུ་མ་རུངས་པ་བས་ནི་གཞན་གྱི་བུ་ཡང་བུར་བྱར་རུང་ལ། བདག་ཅག་གཉིས་ལ་བུ་ཡང་མེད་བུ་མོ་ཡང་མེད་པས་ཁྱེའུ་འདི་བདག་ཅག་གིས་གསོས་དང་འདི་བདག་ཅག་གི་བུར་འགྱུར་གྱིས་ཁྱོད་ནི་པང་དུ་ཞུགས་ཤིག །​ངས་ནི་བཙས་སྟོན་བྱའོ་ཞེས་བྱས་ནས་བུད་མེད་དེའི་པང་དུ་ཞུགས་ཏེ་འདུག་གོ། །​ཁྱིམ་བདག་དེས་ནི་རྔ་བརྡུངས་ནས་ཁྱེའུ་དེའི་བཙས་སྟོན་བྱེད་པ་ལ་ཞུགས་སོ། །​དེ་ནས་བུད་མེད་སྔ་མ་དེ་གང་གི་ཚེ་ན་ཚ་ཞི་བར་གྱུར་པ་དེའི་ཚེ་ལངས་ཏེ། བུ་བླང་ཞེས་བྱས་ན་བུ་མི་སྣང་ནས་དེས་ནང་པར་སྐྱེ་བོ་མང་པོ་ཉེ་འཁོར་ན་གནས་པ་རྣམས་ལ་ཁྱེད་ཀྱིས་བྱིས་པ་ལྟ་ཅི་མཐོང་ཞེས་དྲིས་པ་དང་། དེར་སུས་མཐོང་བ་དེ་དག་གིས་དེ་ལ་སྨྲས་པ། ཁྱིམ་བདག་ཆེ་གེ་མོ་ཞིག་གི་ཁྱི་འབྱུང་པོ་ཞེས་བྱ་བ་དེས་ཁྱེའུ་ཞིག་ཁྱེར་ཏེ་ཁྱིམ་དེར་སོང་ངོ་ཞེས་བྱས་སོ། །​དེ་ནས་བུད་མེད་དེས་བུད་མེད་གཞན་ཞིག་ལ་བརྩད་དེ་ཁྱིམ་དེར་བཏང་ནས་ཁྱོད་སོང་ལ་ཁྱེའུ་དེ་ཤིའམ་མ་ཤི་ལྟོས་ཤིག་ཅེས་བྱས་སོ།



The English translation of this folio by 84000 - Translating the words of the Buddha can be found at:
https://read.84000.co/translation/toh340.html?part=UT22084-073-001-6345#UT22084-073-001-6345