Degé Kangyur volume 72, F.292.a

པས་ཁ་ན་བ་དང་ལྐོག་མ་ན་བ་དང་ཁ་མནམ་པ་ལ་སོགས་པར་འགྱུར་རོ། །​ལས་དེ་ཉིད་ཀྱི་རྣམ་པར་སྨིན་པས། མི་བདེན་པས་བསླུས་པར་འགྱུར་བའོ། །​ཕྲ་མ་ཟེར་བའི་མི་དགེ་བའི་ལས་ཀྱི་རྣམ་པར་སྨིན་པས། ས་ལ་གསེག་མ་དང་གྱོ་མོ་ལ་སོགས་པ་རེག་ན་མི་བདེ་བ་རྣམས་འབྱུང་ངོ་། །​ལས་དེ་ཉིད་ཀྱི་རྣམ་པར་སྨིན་པས། གཡོག་འཁོར་དབྱེར་རུང་བར་འགྱུར་རོ། །​ཚིག་རྩུབ་པོ་མི་དགེ་བའི་ལས་ཀྱི་རྣམ་པར་སྨིན་པས། ས་ལ་རྡུལ་དང་ཉལ་ཉིལ་གྱི་རླུང་ལྡང་ཞིང་ཆར་ཆེན་པོ་ལ་སོགས་པ་འབབ་བོ། །​ལས་དེ་ཉིད་ཀྱི་རྣམ་པར་སྨིན་པས། ཡིད་དུ་མི་འོང་བའི་སྒྲ་ཐོས་པ་དང་། ཡིད་དུ་མི་འོང་བ་མཐོང་བར་འགྱུར་རོ། །​ཚིག་ཀྱལ་པར་སྨྲ་བ་མི་དགེ་བའི་ལས་ཀྱི་རྣམ་པར་སྨིན་པས། ས་མཐོ་དམན་དང་། སྨན་ལྗོངས་དང་། ངམ་གྲོག་དང་གཡང་ས་ལ་སོགས་པ་འབྱུང་ངོ་། །​ལས་དེ་ཉིད་ཀྱི་རྣམ་པར་སྨིན་པས། ཚིག་མི་བཙུན་པར་འགྱུར་རོ། །​ཆགས་སེམས་མི་དགེ་བའི་ལས་ཀྱི་རྣམ་པར་སྨིན་པས། འབྲས་དང་། ནས་དང་། གྲོ་ལ་སོགས་པའི་འབྲས་བུ་ཉུང་ཞིང་གྲ་མ་དང་སྤུན་པ་ལ་སོགས་པའི་སྐྱོན་མང་བར་འགྱུར་རོ། །​ལས་དེ་ཉིད་ཀྱི་རྣམ་པར་སྨིན་པས། ལོངས་སྤྱོད་གཞན་གྱིས་ཁྱེར་བར་འགྱུར་རོ། །​གནོད་སེམས་མི་དགེ་བའི་ལས་ཀྱི་རྣམ་པར་སྨིན་པས། ལོ་ཏོག་དང་། འབྲས་བུ་དང་། ས་བོན་ཚ་བ་དང་། ཁ་བ་འབྱུང་བར་འགྱུར་རོ། །​ལས་དེ་ཉིད་ཀྱི་རྣམ་པར་སྨིན་པས། མཐོང་ན་མི་སྡུག་པར་འགྱུར་རོ། །ལོག་པར་ལྟ་བ་མི་དགེ་བའི་ལས་ཀྱི་རྣམ་པར་སྨིན་པས། འབྲས་བུ་མེད་པ་དང་། ཆུང་བ་དང་། དུག་དང་རྐུ་བ་ལ་སོགས་པ་འབྱུང་བར་འགྱུར་རོ། །​ལས་དེ་ཉིད་ཀྱི་རྣམ་པར་སྨིན་པས། མེད་པར་སྨྲ་བ་དང་ཆད་པར་ལྟ་ཞིང་འཇིག་རྟེན་རྒྱང་པན་པའི་གཙུག་ལག་ལ་སོགས་པ་ལ་དད་པར་འགྱུར་རོ། །​མི་དགེ་བའི་ལས་ཀྱི་ལམ་འདི་བཅུ་ཇི་ལྟ་ཇི་ལྟར་བསྒོམས་པ་དེ་ལྟ་དེ་ལྟར་རབ་ཏུ་འཕེལ་བར་འགྱུར་ཏེ། དེའི་ཕྱིར་རྣམ་པར་འཇིག་པའི་ཚེ། ཏིལ་ཡོད་ཀྱང་ཏིལ་མར་མི་འབྱུང་བུ་རམ་ཤིང་ཡོད་ཀྱང་བུ་རམ་མི་འབྱུང་། བུ་རམ་ཡོད་ཀྱང་ཧྭགས་དང་ཁ་ར་



The English translation of this folio by 84000 Translating the words of the Buddha can be found at:
https://read.84000.co/translation/toh338.html?part=UT22084-072-038-1013#UT22084-072-038-1013