Degé Kangyur volume 68, F.122.b

པ་མ་ཡིན་ཞིང་ཐེར་ཟུག་ཏུ་གནས་པ་མ་ཡིན་ལ་སྤྲུལ་པ་ལྟ་བུ་ཡིན་ནོ་སྙམ་མོ། །​དེ་ཇི་ལྟ་ཇི་ལྟར་དེ་ཉིད་ཚོལ་བའི་དགེ་སློང་དེ་ནི་དེ་ལྟ་དེ་ལྟར་དེའི་ཆོས་དཀར་པོ་འབྱུང་བར་འགྱུར་ཏེ། དཔེར་ན་བུ་རམ་ཤིང་སྣོད་ཀྱི་ནང་དུ་བཅུག་ནས་མེས་བསྐོལ་བ་དེས་དེ་དང་པོ་ཞུ་ཞིང་དྲི་མར་འགྱུར་བ་ནི་བུ་རམ་དྲི་མ་ཅན་ཞེས་བྱའོ། །​ལན་གཉིས་སུ་བསྐོལ་བ་དང་། དཀར་བར་འགྱུར་ཞིང་བུ་རམ་དུ་ཤེས་སོ། །​ལན་གསུམ་པ་ལ་ཤིན་ཏུ་དཀར་བར་འགྱུར་ཏེ། དེ་ཇི་ལྟ་ཇི་ལྟར་བུ་རམ་ཤིང་བསྐོལ་བ་དེ་ལྟ་དེ་ལྟར་ཤིན་ཏུ་དྲི་མ་དང་བྲལ་བར་འགྱུར་བ་དེ་བཞིན་དུ་དགེ་སློང་དམིགས་པའི་སྣོད་དུ་ཡེ་ཤེས་མེ་ལྟ་བུས་སེམས་ཀྱི་རྒྱུན་བུ་རམ་ཤིང་ལྟ་བུ་ཡོངས་སུ་སྐོལ་བར་བྱེད་དོ། །​དེའི་དབུ་བ་ལྟ་བུ་བསམ་གཏན་དང་པོ་ཐོབ་པར་འགྱུར་ཞིང་དེའི་དཀར་བ་ལྟ་བུ་བསམ་གཏན་གཉིས་པ་ཐོབ་པར་འགྱུར་ཏེ། དེ་བཞིན་དུ་ཇི་ལྟ་ཇི་ལྟར་དགེ་སློང་གི་སེམས་ཀྱི་རྒྱུན་ཡེ་ཤེས་ཀྱི་མེས་སྐོལ་བར་བྱེད་པ་དེ་ལྟ་དེ་ལྟར་ཟག་པ་མེད་པའི་ཆོས་ཤིན་ཏུ་དཀར་ཞིང་ཤིན་ཏུ་དྲི་མ་མེད་ལ་ཤིན་ཏུ་སྐྱོན་མེད་པར་འགྱུར་ཏེ། ལས་ཕྱིར་ཕྱོགས་པ་དྲི་མ་དང་བྲལ་ཞིང་དཀར་ལ་དག་པ་སྐྱེ་བར་འགྱུར་རོ། །​གཞན་ཡང་དགེ་སློང་དེ་ཚོར་བ་དེ་དག་ལ་ཤིན་ཏུ་རྣམ་པ་ཕྲ་བ་གཞན་གྱིས་རྟོག་པར་བྱེད་དེ། སེམས་ཅན་ཆེ་གེ་མོ་ཞིག་གི་ཚོར་བ་མིག་གི་འདུས་ཏེ་རེག་པ་ལས་བྱུང་བ་ཕྲ་བའམ་རགས་པ་དྲི་མ་ཅན་གཏི་མུག་དང་ལྡན་པ་སྐྱེས་པ་དེ། ཚོར་བ་རགས་པ་ཆེ་གེ་མོ་ཞིག་གིས་བསལ་ཅིང་སྤངས་ཏེ། ལྷག་མ་དང་བཅས་པར་བྱས་སོ། །རྣ་བའི་ཚོར་བ་དང་། སྣའི་ཚོར་བ་དང་། ལྕེའི་ཚོར་བ་དང་། ལུས་ཀྱི་ཚོར་བ་ཡང་དེ་བཞིན་ནོ། །​དགེ་སློང་དེ་དེ་ལྟར་བརྩོན་ཞིང་སྤྲོ་ལ་བདུད་ཀྱི་སྡེ་འཇོམས་པ་ན། ས་བླའི་གནོད་སྦྱིན་དང་། བར་སྣང་ལ་སྤྱོད་པའི་གནོད་སྦྱིན་དེ་དག་གིས་ཀྱང་རྒྱལ་པོ་ཆེན་པོ་བཞི་ལ་མངོན་པར་བསྙད་དོ། །​ས་བླའི་གནོད་སྦྱིན་དང་། བར་སྣང་ལ་སྤྱོད་པའི་གནོད་སྦྱིན་དེ་དག་དང་། རྒྱལ་པོ་ཆེན་པོ་བཞི་པོ་དེ་དག་གིས་ཀྱང་རྒྱལ་ཆེན་བཞིའི་ལྷ་རྣམས་ལ་མངོན་པར་བསྙད་དོ། །​ས་བླའི་གནོད་སྦྱིན་དེ་དག་དང་། བར་སྣང་ལ་སྤྱོད་པའི་གནོད་སྦྱིན་དེ་དག་དང་། རྒྱལ་



The English translation of this folio by 84000 Translating the words of the Buddha can be found at:
https://read.84000.co/translation/toh287.html?part=UT22084-068-021-100108#UT22084-068-021-100108