ལོ་འདབ་མང་བ་དང་། བྷཱི་དཱུ་རཾ་དང་། སྨིན་པའི་སྣོད་དང་། མདོར་བསྡུས་པ་དང་། བིཥྐ་ཊཱ་དང་། གནོད་པའི་ནགས་དང་། ཕན་པར་འཇུག་པའི་མིག་དང་། བཱ་དཱུ་ཏཾ་དང་། ཟེའུ་འབྲུའི་ལུས་ཀྱི་ཤིང་དང་། དུས་ཀྱི་ཆུ་དང་རྣམས་ཏེ། དེ་ལྟ་བུ་ལ་སོགས་པའི་གྲོང་རྣམས་ཡིན་ནོ། །གླིང་གི་ཉེ་འཁོར་ཡོངས་སུ་ཟླུམ་པ་ཇི་ལྟ་བ་ཁོ་ནར་མི་རྣམས་ཀྱི་བཞིན་གྱི་ཉེ་འཁོར་ཡང་ཡོངས་སུ་ཟླུམ་པ་ཡིན་ནོ། །དེ་ལ་འཛམ་བུའི་གླིང་པ་རྣམས་ནི་རྣ་བ་དང་། སྐྲ་ལ་རྒྱན་འདོགས་སོ། །བྱང་ཕྱོགས་སྒྲ་མི་སྙན་པ་རྣམས་ནི་མིག་དང་། དཔུང་པ་ལ་རྒྱན་འདོགས་སོ། །བ་ལང་སྤྱོད་པ་རྣམས་ནི་གསུས་པ་དང་། མགྲིན་པ་ལ་རྒྱན་འདོགས་སོ། །ཤར་ཕྱོགས་ལུས་འཕགས་པོ་རྣམས་ནི་བརླ་དང་། ཕྲག་པ་ལ་རྒྱན་འདོགས་སོ། །དེ་ལ་དེ་དག་རྣམས་ཀྱང་སྐྱེས་བུའི་གནས་བཞི་པོ་རྣམས་ཀྱི་རང་རང་གི་ལུས་ལ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལས་ཀྱི་ཆོས་ཀྱི་རྣམ་པར་སྨིན་པ་རྣམས་ལ་རྗེས་སུ་ལྟ་སྟེ། ལས་གང་གིས་ངེས་པར་སེམས་ཅན་དེ་དག་རྣམས་འདིར་སྐྱེས་པ་ཡིན་ཞིང་ཁྱད་པར་དུ་འཕགས་པ་དང་། བར་མ་དང་། ཐ་མ་རྣམས་ཀྱང་ཁྱད་པར་དུ་འཕགས་པ་དང་། བར་མ་དང་། ཐ་མའི་ལས་རྣམས་ཀྱིས་བྱས་པ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སྔོན་སེམས་ཅན་འདི་དག་རྣམས་ལས་དང་ཆོས་དང་རྣམ་པར་སྨིན་པ་རྣམས་མངོན་པར་མི་ཤེས་པར་གྱུར་ཏོ། །དེ་མི་ཤེས་པར་གྱུར་པའི་ཕྱིར་ན་ཞིང་ངན་པ་ལ་སྦྱིན་པ་ངན་པ་བྱིན་པ་ཡིན་ཏེ། དཔེར་ན་ཕན་འདོགས་པའི་ངོར་རམ། སེམས་གཞན་དུ་གྱུར་པས་སམ། ཞབས་འབྲིང་གི་ཕྱིར་ཡང་སྟེ་སྔར་བཞིན་ནོ། །ལས་དེས་སེམས་ཅན་ཐ་མ་རྣམས་འདིར་སྐྱེས་པར་གྱུར་ཏོ། །བར་མ་རྣམས་ཀྱང་ཚུལ་ཁྲིམས་དམན་པ་རྣམས་ཡིན་ནོ། །འདི་ལྟ་སྟེ། རྒྱལ་པོའི་ཞབས་འབྲིང་དུ་སྲོག་གཅོད་པ་སྤོང་བར་བྱེད་པ་སྤངས་པར་གྱུར་ཀྱང་རབ་ཏུ་དང་བའི་སེམས་ཀྱིས་ནི་མ་ཡིན་ནོ། །གང་དེ་དག་རྣམས་ནི་རྒྱུ་དེ་དང་རྐྱེན་དེས་ལུས་ཞིག་པར་གྱུར་ནས་བདེ་འགྲོ་མཐོ་རིས་ཀྱི་ལྷ་རྣམས་སུ་སྐྱེ་བར་འགྱུར་བ་ནི་བར་མ་ཡིན་ནོ།