ཆུ་དང་། ཆོམ་རྐུན་པའི་འཇིགས་པ་དང་རྣམ་པར་བྲལ་བའི་ནི་ཁྱད་པར་དུ་འཕགས་པ་ཡིན་ནོ། །རྩྭ་རྡུམ་དང་ཆུ་བལ་གྱིས་ཉམས་པར་བྱས་པ་དང་། ཆུའི་སྐྱོན་དང་། འཇིགས་པ་དང་། ཆོམ་རྐུན་གྱི་འཇིགས་པ་དང་ལྡན་པར་བརྗོད་པ་རྣམས་ནི་ཆུང་ངུ་ཡིན་ཏེ། ཞིང་ལས་པ་རྣམས་ཀྱིས་ཡོངས་སུ་སྦྱང་བ་བྱས་པའི་ལས་རྣམས་ནི་མ་གཏོགས་སོ། །དེ་ལ་ནང་གི་བདག་ཉིད་དང་ཕྱི་རོལ་གྱི་དངོས་པོ་དེ་དག་རྣམས་ཀྱང་ལས་ཀྱི་བགོ་སྐལ་ལ་སྤྱོད་པ་དང་། ལས་བརྟན་པར་བྱས་པ་དང་། ལས་ཀྱི་སྐྱེ་གནས་པ་ཡིན་ཏེ། གཞན་གྱི་སྟོབས་དང་བཅས་པ་ཡིན་ཞིང་ཕན་ཚུན་གྱི་རྐྱེན་ཅན་དུ་གྱུར་པ་དང་། ཕན་ཚུན་དུ་སྐྱེད་པར་བྱེད་པ་ཡིན་ནོ། །དེ་ལ་ནུབ་ཀྱི་བ་ལང་སྤྱོད་པའི་སྐྱེས་བུ་དེ་དག་རྣམས་ནི་རྙོག་པ་དང་བཅས་པའི་ལས་ཀྱི་འབྲས་བུ་རྣམས་ལ་སྤྱོད་པ་ཡིན་ཏེ། རྙོག་པ་དང་བཅས་པའི་ལས་རྣམས་ཀྱིས་འདིར་སྐྱེས་པ་ཡིན་ནོ། །གཞན་ཡང་ཤི་འཕོས་པར་གྱུར་ནས་རང་གི་ལས་ཀྱི་རླུང་གིས་འཁོར་བར་ཡོངས་སུ་འཁོར་བར་འགྱུར་རོ། །རྣལ་འབྱོར་སྤྱོད་པ་པ་དེས་ཕྱི་རོལ་གྱི་ལས་དང་ཆོས་རྣམས་ཡང་དག་པ་ཇི་ལྟ་བ་བཞིན་དུ་མངོན་པར་རྟོགས་ནས། གཞན་ཡང་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ནུབ་ཀྱི་བ་ལང་སྤྱོད་ཀྱི་གླིང་ལས་འདས་པར་གྱུར་ནས་རིའི་རིགས་སམ། ཆུ་བོའི་རིགས་སམ། རྒྱ་མཚོའི་རིགས་སུ་གྱུར་པ་གཞན་ཅི་ཡོད་པ་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ནུབ་ཀྱི་བ་ལང་སྤྱོད་དང་། ཤར་གྱི་ལུས་འཕགས་པོ་གཉིས་ཀྱི་གླིང་དག་གི་བར་ན་ཡོད་དེ། ནུབ་ཀྱི་བ་ལང་སྤྱོད་ཀྱི་གླིང་ལས་ནི་འདས་པར་གྱུར་ནས་སྐྱོ་མ་བ་ཞེས་བྱ་བའི་རྒྱ་མཚོ་དཔག་ཚད་སྟོང་ཕྲག་བཅུ་གཉིས་པའོ། །སྐྱོ་མ་དང་འདྲ་བའི་ཆུ་གང་ཡིན་པས་གང་བར་གྱུར་པ་སྟེ། དུང་དང་། ཉ་དང་། ཉ་ཆེན་པོ་དང་། ཆུ་སྲིན་ན་ཀྲ་དང་། ཆུ་སྲིན་མ་ཀ་ར་དང་། རུས་སྦལ་དང་། ཆུ་སྲིན་བྱིས་པ་གསོད་ཀྱི་ཡང་ཕུང་པོར་གྱུར་པ་ཡིན་ནོ། །སྐྱོ་མའི་ཆུའི་རྒྱ་མཚོ་དེ་ལས་འདས་པར་གྱུར་ནས་བི་དྲུ་མ་འདྲ་བ་ཞེས་བྱ་བའི་རིའི་ཉེ་འཁོར་དུ་དཔག་ཚད་ལྔ་བརྒྱ་པ་ཡོད་དོ། །དེ་ལ་དུག་ཆེན་པོའི་སྦྲུལ་རྣམས་རབ་ཏུ་གནས་སོ།