ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་རྣམས་ཀྱང་རབ་ཏུ་སྤངས་པ་དང་། འདིར་དགེ་བ་རྣམ་པ་བཅུའི་ལས་ཀྱི་མཐའ་ལ་སྤྱད་པ་ཡིན་ནོ། །དེ་དག་རྣམས་ནི་དགེ་བ་དེའི་ལས་རྣམས་ཀྱི་རྐྱེན་གྱིས་སྐྱེས་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་པ་ལས་དང་ཆོས་དང་རྣམ་པར་སྨིན་པ་རྣམས་ལ་རྗེས་སུ་ལྟ་བར་བྱེད་དེ། ལས་གང་དག་གིས་སྐྱེས་བུ་དེ་དག་རྣམས་ཀྱི་དྲུང་དང་སྐྱེས་བུ་གཞན་དག་རྣམས་ཀྱི་དྲུང་ན་ཡང་གཟུགས་ཀྱི་ཚད་དང་། སྟོབས་དང་། བརྩོན་འགྲུས་དང་། དབྱིབས་རྣམས་ཆེས་ཁྱད་པར་དུ་འཕགས་པའི་སྐྱེས་བུ་གཞན་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སེམས་ཅན་དེ་དག་རྣམས་ནི་ཡང་དག་པའི་ལྟ་བ་མངོན་དུ་བྱས་པ། གཡོ་བ་མེད་པ་དང་། གཞན་ལ་གནོད་པར་མི་བྱེད་པ་དང་། དྲང་པོ་དྲང་པོའི་རང་བཞིན་ཅན་དང་། དེས་པར་གྱུར་པ་དང་། དེས་པའི་རང་བཞིན་ཅན་དང་། ཆོས་པ་དང་ཆོས་ཀྱི་རྗེས་སུ་འཇུག་པ་དང་། ཆོས་དང་ལྡན་པའི་སྐྱེས་བུ་རྣམས་ལྷན་ཅིག་འགྲོགས་པར་བྱེད་པ་རྣམས་ནི་རྒྱུ་དེ་དང་རྐྱེན་དེ་ལས་ལུས་ཞིག་པར་གྱུར་ནས་བདེ་འགྲོ་མཐོ་རིས་ཀྱི་འཇིག་རྟེན་པ་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། རྒྱལ་ཆེན་རིས་བཞི་དང་། སུམ་ཅུ་རྩ་གསུམ་པ་རྣམས་སུའོ། །དེ་ལས་ཤི་འཕོས་པར་གྱུར་ནས་ཀྱང་འདིར་སྐྱེ་བར་འགྱུར་རོ། །འདི་ལས་ཤི་འཕོས་པར་གྱུར་ནས་ཀྱང་དེར་སྐྱེ་བར་འགྱུར་རོ། །གཞན་ཡང་རྣལ་འབྱོར་སྤྱོད་པ་པ་ལས་ཀྱི་ཆོས་ཀྱི་རྣམ་པར་སྨིན་པ་རྣམས་ལ་ལྟ་བར་བྱེད་དེ། ལས་གང་དག་གིས་སེམས་ཅན་དེ་དག་རྣམས་ཆེས་ཁྱད་པར་དུ་འཕགས་པ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་དེ་རྣམས་ནི་ཐམས་ཅད་ཀྱིས་ཀྱང་སྔོན་མི་འཇིགས་པའི་སྦྱིན་པ་རབ་ཏུ་བྱིན་པར་གྱུར་པ་ཡིན་ཏེ། གྲོང་ཁྱེར་གྱི་ལྷོ་ཕྱོགས་ཀྱི་སྒོར་ཁྲིད་པར་གྱུར་པའི་སེམས་ཅན་ཤིན་ཏུ་སྐྲག་པ་རྣམས་ལ་སྲོག་གི་སྦྱིན་པ་བྱིན་པ་ཡིན་ལ། རྒྱབ་ཏུ་ལག་པ་དམ་པོར་བཅིངས་ཤིང་དུར་ཁྲོད་དུ་ཁ་ཕྱོགས་པར་གྱུར་ནས་གསོད་པའི་རྔ་པ་ཊ་ཧ་བརྡུངས་པར་གྱུར་ཅིང་། གཤེད་མའི་མི་གཏུམ་པོ་ཕྱི་བཞིན་རྗེས་སུ་འབྲང་བར་གྱུར་པ་རྣམས་ལ་སྲོག་གི་སྦྱིན་པ་བྱིན་པ་ཡིན་ནོ།