བྱང་ཕྱོགས་སྒྲ་མི་སྙན་པའི་སྐྱེས་བུ་འདི་དག་རྣམས་ཀྱིས་ཅིའི་ཕྱིར་ན་མ་གོ །མྱ་ངན་དང་བྲལ་བར་འགྱུར་བ་དང་། དུས་ཀྱི་མཐའ་ལ་ནི་ཐམས་ཅད་ཀྱང་ཐལ་བར་འགྱུར་རོ། །བྱང་ཕྱོགས་སྒྲ་མི་སྙན་གྱི་གླིང་འདི་ཡང་སྟོངས་པར་འགྱུར་རོ། །སྐྱེས་བུ་འདི་དག་རྣམས་ཐམས་ཅད་ཀྱང་དུས་བྱས་པར་གྱུར་ནས་ལྷའི་འཇིག་རྟེན་དུ་མངོན་པར་འབྱུང་བར་འགྱུར་ལ། དེ་ནས་ནི་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་བར་འགྱུར་ཏེ། རང་གི་ལས་ཀྱི་བགོ་སྐལ་ལ་སྤྱོད་པ་ཡིན་པའི་ཕྱིར་རོ། །དེ་ལྟར་རྣལ་འབྱོར་སྤྱོད་པ་པ་དེས་ལས་ཀྱི་འབྲས་བུ་རྣམ་པར་སྨིན་པ་རྣམས་རྗེས་སུ་མཐོང་བར་གྱུར་པ་ན་སྐྱ་བོར་སྣང་བའི་སྐྱེས་བུ་རྣམས་ལ་རྗེས་སུ་བརྩེ་བ་སྐྱེ་བར་འགྱུར་རོ། །འཁོར་བའི་བདག་ཉིད་ནི་ངན་པ་ཡིན་པར་མཐོང་ངོ་། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། གཞན་བྱང་ཕྱོགས་སྒྲ་མི་སྙན་ན་དགའ་བའམ་ཆེས་དགའ་བར་གྱུར་པ་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་པད་མ་ཀུ་ཤེ་ཤ་ཡ་དང་ལྡན་པ་ཞེས་བྱ་བའི་རིའོ། །པད་མ་ཀུ་ཤེ་ཤ་ཡ་དང་ལྡན་པ་ཞེས་བྱ་བའི་རི་དཔག་ཚད་སྟོང་དུ་གྱུར་པ་ལ། ཆུ་བསིལ་བ་དང་ལྡན་པ་ཞེས་བྱ་བའི་པད་མའི་རྫིང་བུ་དཔག་ཚད་ལྔ་བརྒྱ་པ་ཡོད་དེ། གསེར་གྱི་ཁ་དོག་དང་ལྡན་པའི་པད་མས་ཁྱབ་པར་གྱུར་པ་འདམ་མེད་པ་བུང་བ་དང་། ངང་པ་དང་། ཀཱ་རཎྜ་བ་དང་། ཙཀྲ་བཱ་ཀཱཿརྣམས་ཀྱིས་ཉེ་བར་མཛེས་པར་བྱས་པ་ཡིན་ནོ། །པད་མའི་རྫིང་བུ་དེ་ན་ཡང་ལྷའི་མེ་ཏོག་པད་མ་ཀུ་ཤེ་ཤ་ཡ་དང་། ལྷའི་མན་དཱ་ར་བ་དང་། ཀུ་སུ་མ་དང་། ལྗོན་ཤིང་དང་། མེ་ཏོག་དང་། འབྲས་བུ་དང་། ཆུ་ཀླུང་དང་། རི་ཁྲོད་དང་། བྱ་དང་། ནགས་དང་། ཉེ་བའི་ནགས་དང་། རྫིང་བུ་དགའ་བར་གྱུར་པ་རྣམས་དང་། བསིལ་བའི་ཆུ་རྣམས་ནི་སྔར་གྱི་བཞིན་ནོ། །པད་མ་ཀུ་ཤེ་ཤ་ཡ་དང་ལྡན་པའི་རིའི་ཕྱེད་དུ་གྱུར་པ་དཔག་ཚད་ལྔ་བརྒྱ་ལ་མཆོག་ཏུ་དགའ་བར་གྱུར་པའི་གཞལ་ཡས་ཁང་སྟོང་ཕྲག་བརྒྱད་ཅུ་རྩ་བཞི་ཡོད་དོ། །འདི་ལྟ་སྟེ། གསེར་དང་དངུལ་གྱི་རང་བཞིན་རྣམས་ལ་ནི་གསེར་གྱི་སྟེགས་བུ་དང་ལྡན་ནོ། །ཤེལ་གྱི་རང་བཞིན་རྣམས་ལ་ནི་བཻ་ཌཱུརྱའི་སྟེགས་བུ་དང་ལྡན་ནོ། །