ཇི་ལྟར་སྐྱེ་བའི་སྡུག་བསྔལ་ནི་དང་པོ་ཉིད་དུ་ཕ་མ་གཉིས་ཀྱི་ཁུ་ཆུ་དང་ཁྲག་དེ་དག་གཉིས་ཀྱིས་མི་སྟོང་པར་གྱུར་པའི་གཅིན་གྱི་ནང་དུ་གསུས་པའི་སྨད་ཀྱི་རུས་པའི་རང་བཞིན་གྱི་རྣམ་པ་ཞིང་གི་གདུབ་ཀོར་ལྟ་བུའི་མངལ་དུ་རྣམ་པར་ཤེས་པའི་ས་བོན་སྐྱེའོ། །དེ་ཡང་ལས་ཀྱི་རླུང་གིས་བུ་སྣོད་བསྐོར་བར་གྱུར་པས་ཉི་མ་བདུན་པ་ལ་མེར་མེར་པོར་འགྱུར་རོ། །སྲོག་གཅོད་པ་སྤངས་པས་མེར་མེར་པོར་གྱུར་པ་དེ་ལ་གནས་པ་ན་ཡང་རྣམ་པར་ཤེས་པ་མི་འཕོའོ། །ཉི་མ་བདུན་པ་གཞན་ལ་ནི་གོར་གོར་པོར་འགྱུར་རོ། །རྣམ་པར་ཤེས་པ་ཡང་ལས་དང་ཉོན་མོངས་པ་དང་བཅས་པའི་དབང་གིས་དེ་ཉིད་ལ་རྨོངས་ནས་གནས་སོ། །དེ་ལ་གནས་པ་ཉིད་ཀྱང་ཉི་མ་བདུན་པ་ཡིན་ཏེ། ཉི་མ་བདུན་ན་ཤའི་གོང་བུར་འགྱུར་རོ། །གཅིན་དང་རྟུག་པའི་ཚོགས་རྣམས་ཀྱང་མའི་གསུས་པའི་སྨད་དུ་ཡིན་ཞིང་། གང་དང་གང་དག་མའི་བྱ་བར་གྱུར་པའི་ལུས་རྣམ་པར་བསྐྱོད་པ་དང་ཟས་ཀྱིས་བྱས་པ་རྣམས་ཀྱང་རུང་སྟེ། དེ་དང་དེ་དག་རྣམས་ཉིད་ཀྱིས་འདི་གཟིར་བར་འགྱུར། ཇི་ལྟར་གཏུན་ཤིང་གིས་བུ་རམ་གྱི་ཤིང་འཚིར་བར་བྱེད་པ་དེ་ལྟར་མངལ་ན་གནས་པ་འཚིར་བར་བྱེད་དོ། །གཞན་ཡང་ལས་ཀྱི་རླུང་གིས་ཤའི་གོང་བུ་དྲངས་པར་གྱུར་པས་སྦོམ་པོར་འགྱུར་རོ། །དེ་ལས་ནི་རྡོག་རྡོག་ལྔ་འབྱུང་བར་འགྱུར་ཏེ། རྐང་པ་གཉིས་ཀྱི་དང་། ལག་པ་གཉིས་ཀྱི་དང་། མགོའིའོ། །གཞན་ཡང་ལས་ཀྱི་རླུང་གིས་བསྐོར་བར་གྱུར་པས་མངལ་ན་སྐྱེ་བ་ནི་མའི་གསུས་པར་འབྱུང་བར་འགྱུར་ལ། དེ་ལས་ཀྱང་ལྟེ་བའི་སྦུ་གུ་འབྱུང་བར་འགྱུར་རོ། །སྦུ་གུ་དེ་ནི་མའི་མཁལ་མའི་ནང་ནས་འབྱུང་བར་འགྱུར་རོ། །གང་ཡང་གྲང་བ་དང་། དྲོ་བ་དང་། རོ་བཟང་བ་དང་། རོ་ངན་པ་རྣམས་ཀྱང་རུང་སྟེ། མས་ཟས་ཟོས་པའི་རོ་དེ་ཡང་དེ་ལ་སྦུ་གུ་དེ་ནས་འཇུག་གོ། །ལྟེ་བ་ནས་ཟས་ཀྱི་རོ་གང་ཡིན་པ་དེས་མངལ་ན་གནས་པ་འདི་ཀུན་ཏུ་འཚོ་བར་བྱེད་དོ། །དེ་ལྟར་མངལ་གྱིས་བྱས་པའི་ཤིན་ཏུ་སྡུག་བསྔལ་བ་དང་། ཁྱད་པར་དུ་བཙོག་པ་རྣམས་ཉམས་སུ་མྱོང་བར་འགྱུར་རོ། །དེ་གལ་ཏེ་མངལ་ན་གནས་པ་ན་དུས་བྱེད་པར་མ་གྱུར་ན་ནི་དེ་གཅིན་དང་ཁྲག་གི་གནས་སྐབས་ན་གནས་པའི་དེ་ལ་ཐམས་ཅད་རྫོགས་པར་གྱུར་ནས་ཟླ་བ་བཅུ་ན་ཟུར་མ་མིག་གི་ནང་ནས་འདྲེན་པས་བུར་ཤིང་ལྟར་ཡན་ལག་དང་ཉིང་ལག་ཐམས་ཅད་འཚིར་བར་གྱུར་པས་མའི་སྐྱེ་གནས་ནས་འབྱུང་བ་ཡིན་ནོ།