།གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་ན་རིའི་རིགས་སམ། ཆུ་ཀླུང་གི་རིགས་སམ། ལྗོན་ཤིང་གི་རིགས་སུ་གྱུར་པ་དགའ་བ་དང་། ཤིན་ཏུ་དགའ་བ་དང་། མཆོག་ཏུ་དགའ་བར་གྱུར་པ་གཞན་ཅི་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བྱང་གི་སྒྲ་མི་སྙན་ན་རི་གཞན་ཀུན་དགའ་བ་འཛིན་པ་ཞེས་བྱ་བ་དཔག་ཚད་སྟོང་པ་ཡོད་དོ། །རི་ཀུན་དགའ་བ་འཛིན་པའི་ཉེ་འཁོར་ན་ནི་རྒྱུ་འཐུན་པ་ཞེས་བྱ་བའི་ནགས་དཔག་ཚད་ལྔ་བརྒྱ་པ་ཡོད་དོ། །ནགས་དེ་ན་ནི་འབྱུང་ཁུངས་རྣམས་ཐམས་ཅད་དང་ལྡན་ནོ། །དེ་ལ་འབྱུང་ཁུངས་འདི་དག་རྣམས་ཡོད་དེ། འདི་ལྟ་སྟེ། གསེར་གྱི་འབྱུང་ཁུངས་དང་། དངུལ་གྱི་འབྱུང་ཁུངས་དང་། ཟངས་ཀྱི་འབྱུང་ཁུངས་དང་། ཆང་གི་འབྱུང་ཁུངས་དང་། སྦྲང་རྩིའི་འབྱུང་ཁུངས་དང་། རོ་དྲུག་གི་འབྱུང་ཁུངས་རྣམས་ཏེ། འབྱུང་ཁུངས་དེ་དག་དང་གཞན་དག་རྣམས་ཀྱང་དེ་དག་ལ་ཡོད་པ་ཡིན་ནོ། །རྒྱུ་འཐུན་པའི་ཉེ་འཁོར་རྣམས་ནི་དགའ་བར་གྱུར་པ་ཡིན་ཏེ། གང་ལ་བཻ་ཌཱུརྱ་དང་མཚུངས་པར་གྱུར་པའི་ལྗོན་ཤིང་རྣམས་ལ་ནི་མེ་ཏོག་གི་འཁྲི་ཤིང་རྣམས་ཀྱིས་ཡོངས་སུ་བསྐོར་བ་དང་། གསེར་གྱི་འདབ་མའི་པད་མའི་རྫིང་བུ་རྣམས་ཀྱི་ནི་དངུལ་གྱི་ཡུ་བ་ཅན་ཡིན་ནོ། །དངུལ་གྱི་འདབ་མ་ལ་ནི་གསེར་གྱི་ཡུ་བ་ཅན་ཡིན་ནོ། །གསེར་དང་དངུལ་གྱི་འདབ་མ་རྣམས་ལ་ནི་བཻ་ཌཱུརྱའི་ཡུ་བ་ཅན་རྣམས་ཏེ། ཉི་མ་ཤར་མ་ཐག་ཐོག་ལྟར་དམར་བའི་པད་མ་རྣམས་ཀྱིས་ཁྱབ་པར་གྱུར་པའི་པད་མའི་རྫིང་བུ་དེ་དག་རྣམས་ལ་བྱ་སྣ་ཚོགས་པ་རྣམས་ཀྱིས་ཉེ་བར་མཛེས་པའོ། །འདི་ལྟ་སྟེ། ངང་པ་དང་། ཁྲུང་ཁྲུང་དང་། བེ་ཀཻཿདང་། མཚོའི་ཁྲུང་ཁྲུང་དང་། ཀ་དམྦ་དང་། རི་དགས་ཀྱི་མགྲིན་པ་པ་དང་། ཆུ་བྱ་དང་། མ་ཏ་བྷ་བ་དང་། པླ་བཱཿདང་། ཙཀྲ་བཱ་དང་། བཱ་ལུ་ཀཱ་དང་། ཨཱདྱཱཿདང་། སཱ་ར་སཱི་དང་། བི་ལཱ་ལཱཿདང་། དུས་སུ་རྗོད་པར་བྱེད་པ་དང་། ཨུཥྞ་བཱི་ར་བཿདང་། མཚན་མོ་རྒྱུ་བ་དང་། པད་མའི་རྡུལ་ལ་དགའ་བ་དང་། སིནྡྷུའི་རླབས་དང་། རླབས་ལས་སྐྱེས་པ་དང་སྟེ། བྱའི་རིགས་ཉི་ཤུ་པོ་དེ་དག་རྣམས་པད་མའི་རྫིང་བུ་དེ་ན་ཡོད་དོ།