ཆུ་དེར་ནི་རྩྭའི་རིགས་སུ་གྱུར་པ་འམ། ཤིང་གི་རིགས་སུ་གྱུར་པའམ། སེམས་ཅན་གྱི་རིགས་སུ་གྱུར་པའམ། རི་དགས་དང་བྱའི་རིགས་སུ་གྱུར་པ་རྣམས་ཀྱང་རུང་སྟེ། གང་ཅུང་ཟད་ལྷུང་བར་གྱུར་པ་དེ་དག་རྣམས་ཐམས་ཅད་ཀྱང་རྡོ་རྗེའི་རང་བཞིན་དུ་འགྱུར་རོ། །ཆུ་བོ་དེའི་ངོས་གཉིས་དག་ན་ཀཱེ་ཙ་ཀཱ་ཞེས་བྱ་བའི་འོད་མ་དེ་དག་རྣམས་རླུང་གིས་བཏབ་པར་གྱུར་ནས་ཕན་ཚུན་དྲུད་པ་ལས་མེ་སྐྱེད་པར་བྱེད་དོ། །མེ་དེས་སེམས་ཅན་བརྒྱ་སྟོང་ཕྲག་དུ་མ་ཆུ་བོ་དེར་མཆོང་བར་འགྱུར་རོ། །གཞན་ཡང་རྣལ་འབྱོར་སྤྱོད་པའི་དགེ་སློང་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་ལས་རིང་དུ་འདས་པར་གྱུར་ནས་རིའི་རིགས་སམ། ཆུ་ཀླུང་གི་རིགས་གཞན་དག་ཅི་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ་སཱི་ཏཱ་ཞེས་བྱ་བའི་ཆུ་བོ་ཡོད་པ་ནི་རྒྱར་ནི་དཔག་ཚད་བཅུ་ཡིན་ལ་རིང་བར་གྱུར་པའི་དངོས་པོར་ནི་དཔག་ཚད་སུམ་བརྒྱ་པ་ཡིན་ནོ། །དེ་ལ་སེམས་ཅན་གྱི་རིགས་གང་དག་ལྷུང་བར་གྱུར་པ་རྣམས་ནི་རྩུབ་པར་གྱུར་པའི་ཆུ་ཡིན་པས་དེ་དག་རྣམས་ཐམས་ཅད་ཀྱང་གྲང་བའི་དངོས་པོས་རྣམ་པར་ཉིགས་པར་འགྱུར་རོ། །དེ་ལ་ནི་འགའ་ཞིག་ཀྱང་བྱ་བར་མི་ནུས་སོ། །ཆུ་ཀླུང་དེ་ལས་འདས་པར་གྱུར་ནས་འཛམ་བུའི་གླིང་གི་ཕྲེང་བ་ཞེས་བྱ་བའི་གླིང་ཡོད་དེ། དེ་ལ་རྟག་ཏུ་རྒྱགས་པ་ཞེས་བྱ་བའི་དྲི་ཟ་རབ་ཏུ་གནས་པ་ཡིན་ཏེ། སྦྱིན་པ་དང་ཚུལ་ཁྲིམས་ཀྱིས་བསྒྲུབས་པར་གྱུར་པ་ཚུལ་ཁྲིམས་དང་ཡང་དག་པར་ལྡན་པས་རྟག་ཏུ་དགའ་བ་མྱུར་དུ་སོང་བ་འདོད་པའི་འབྲས་བུ་རྣམས་ཐམས་ཅད་ཕུན་སུམ་ཚོགས་པ་ཡིན་ནོ། །གླིང་ཐམས་ཅད་ཀྱང་ལྗོན་ཤིང་ཐམས་ཅད་ཀྱིས་ཉེ་བར་མཛེས་པར་བྱས་པ་སྟེ། གསེར་གྱི་རང་བཞིན་གྱི་ལྗོན་ཤིང་རྣམས་སོ། །པད་མ་རྣམས་ཀྱང་བཻ་ཌཱུརྱའི་སྡོང་བུ་ཅན་གྱི་པད་མའི་རྫིང་བུ་རྣམས་ཀྱིས་ཉེ་བར་མཛེས་པར་བྱས་པའོ། །གླིང་འདི་ནས་ནི་རི་རབ་ལྷུན་པོ་ཡང་ཧ་ཅང་རིང་བ་མ་ཡིན་ནོ། །དེའི་དབང་གིས་རི་དང་བྱ་དང་ཆུའི་ཚོགས་པ་རྣམས་ཐམས་ཅད་ཉིད་ཀྱང་གསེར་དུ་མཐོང་བར་འགྱུར་རོ། །ཨུད་པ་ལ་དང་ཀུ་མུ་ད་རྣམས་ཀྱང་ཕུན་སུམ་ཚོགས་པ་ཡིན་ནོ།