།དེ་ལ་ལྷ་མ་ཡིན་དང་པོ་ཉིད་ནས་རབ་ཏུ་གནས་པ་ཡིན་ཞིང་རྟའི་གདོང་པ་དང་འདྲ་བར་གྱུར་པའི་བུད་མེད་རྣམས་ཀྱང་གནས་པ་ཡིན་ཏེ། རྟག་ཏུ་གླུ་དབྱངས་ཀྱིས་མངོན་པར་དགའ་བ་ཉིད་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་ལས་རིང་དུ་འདས་ནས་རིའི་རིགས་སུ་གྱུར་པའམ། ཆུ་བོའི་རིགས་སུ་གྱུར་པ་གཞན་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། དཔག་ཚད་སྟོང་ཕྲག་བཅུའི་རྒྱ་མཚོ་རྣམས་ཀླུ་དང་། ཉ་ཆེན་པོ་དང་། ན་ཀྲ་དང་། ཆུ་སྲིན་དང་། དུང་རྣམས་ཀྱིས་ཆུའི་ནང་ཀུན་དུ་གང་བ་ཡིན་ནོ། །དེ་ལས་རིང་དུ་འདས་ནས་མཆོག་ཏུ་བཟང་པོའི་བློ་གྲོས་བཟང་པོ་ཞེས་བྱ་བའི་རི་ཡོད་དོ། །རི་དེ་ལ་ནི་མར་སར་གྱི་གོང་བུ་ཞེས་བྱ་བའི་མཚོ་ཤིན་ཏུ་ཉམས་དགའ་བར་གྱུར་པ་དང་། ཀཱ་རཎྜ་བ་དང་། བྱ་ཀཱ་ལིང་ཀ་རྣམས་ཀྱིས་ཡོངས་སུ་གང་བ་ཡིན་ནོ། །དེ་ལ་རི་བློ་གྲོས་བཟང་པོ་ནི་དཔག་ཚད་ལྔ་བཅུ་ཡིན་ནོ། །མཚོ་དེ་ནི་དཔག་ཚད་གཅིག་ཡིན་ནོ། །ཆུ་ཀླུང་ཡང་ཀཽ་ཤི་ཀ་མ་ཞེས་བྱ་བ་འབབ་པའོ། །རི་དེ་ནི་ཤིན་ཏུ་དགའ་བར་གྱུར་པའི་ཆུ་ལ་རྒྱུ་བ་རྣམས་ཐམས་ཅད་ཀྱིས་ཀྱང་ཡོངས་སུ་གང་བ་ཡིན་ནོ། །རི་དེ་ལས་རིང་དུ་འདས་པར་གྱུར་ནས་དཔག་ཚད་སྟོང་ཕྲག་ཉི་ཤུའི་རྒྱ་མཚོ་རྣམས་མཆོག་ཏུ་འཇིགས་པར་གྱུར་པའི་ཏུག་ཅོམ་བྱེད་པའི་ཀླུའི་སྒྲ་རྣམས་ཀྱིས་སྤྲིན་རྣམས་འདུ་བར་བྱེད་དོ། །དེ་ཉིད་དུ་ཞེ་སྡང་གིས་གཟིར་བར་གྱུར་པའི་ཀླུ་རྣམས་ཕན་ཚུན་ཐབ་མོ་བྱས་ནས་ཆར་འབབ་པར་བྱེད་དོ། །འབབ་པར་བྱེད་ཅིང་གློག་འཁྱུགས་པས་ལྷ་མ་ཡིན་ལ་ཅོ་འདྲི་བར་བྱེད་དོ། །དུག་ཀུན་ནས་སྤྲོ་བར་བྱེད་དེ། ཁྲོ་བས་འཁྲུགས་པར་གྱུར་པས་ཕན་ཚུན་དུ་སྲོག་གཅོད་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་ལས་རིང་དུ་འདས་པ་གཞན་ན་རིའི་རིགས་སམ། ཆུ་ཀླུང་གི་རིགས་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ། ཀླུ་རྣམས་ཀྱིས་ཀུན་ནས་གང་བར་གྱུར་པའི་རྒྱ་མཚོའི་ཉེ་འཁོར་དེ་ལས་རིང་དུ་འདས་ནས་ཟངས་ཅན་ཞེས་བྱ་བའི་གླིང་དཔག་ཚད་བརྒྱ་པ་ཡོད་དོ།