གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། མིའི་གནས་བཞི་པོ་རྣམས་ཀྱི་གླིང་བཞིའི་ཚད་ཇི་ཙམ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འཛམ་བུའི་གླིང་ནི་དཔག་ཚད་སྟོང་ཕྲག་བདུན་ཡིན་ནོ། །བ་ལང་སྤྱོད་ནི་དཔག་ཚད་སྟོང་ཕྲག་བརྒྱད་ཡིན་ནོ། །ཤར་གྱི་ལུས་འཕགས་པོ་ནི་དཔག་ཚད་སྟོང་ཕྲག་དགུ་ཡིན་ནོ། །བྱང་གི་སྒྲ་མི་སྙན་ནི་དཔག་ཚད་སྟོང་ཕྲག་བཅུ་ཡིན་ནོ། །གླིང་རྣམས་གང་དང་གང་གིས་དབྱིབས་རྣམས་ཇི་ལྟ་ཇི་ལྟར་གྱུར་པ་དེ་དང་དེ་ལ་གནས་པའི་མི་རྣམས་ཀྱི་ཁ་གདོང་གི་དབྱིབས་ཀྱང་དེ་ལྟ་དེ་ལྟར་ཡིན་ནོ། །དེ་ལ་ཤིང་རྟ་ཤ་ཀ་ཊཱ་དང་མཚུངས་པ་ནི་འཛམ་བུའི་གླིང་སྟེ། དེ་དང་འདྲ་བར་འཛམ་བུའི་གླིང་པའི་མི་རྣམས་ཀྱི་བཞིན་ནི་གྲུ་གསུམ་གྱི་རྣམ་པ་ཡིན་ནོ། །ཤར་གྱི་ལུས་འཕགས་པོའི་གླིང་ནི་ཟླ་ཁམ་པ་སྟེ་མི་རྣམས་ཀྱི་བཞིན་ཡང་དེ་དང་ཆ་འདྲ་བ་ཡིན་ནོ། །བ་ལང་སྤྱོད་ཀྱི་གླིང་ནི་ཡོངས་སུ་ཟླུམ་པ་ཡིན་ཏེ་མི་རྣམས་ཀྱི་བཞིན་ཡང་དེ་དང་འདྲ་བ་ཡིན་ནོ། །བྱང་ཕྱོགས་སྒྲ་མི་སྙན་གྱི་གླིང་ནི་གྲུ་བཞི་པ་ཡིན་ཏེ། བྱང་ཕྱོགས་སྒྲ་མི་སྙན་པའི་མི་རྣམས་ཀྱི་བཞིན་ཡང་དེ་དང་འདྲ་བ་ཡིན་ནོ། །དེ་ལྟར་རྣལ་འབྱོར་སྤྱོད་པ་དེས་མིའི་གནས་བཞི་རྣམས་ཀྱི་དབྱིབས་རྣམས་མཐོང་བར་གྱུར་ནས་ཀྱང་ཡང་དག་པ་ཇི་ལྟ་བ་བཞིན་དུ་ཕྱི་རོལ་ལ་ཀུན་དུ་ལྟ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་ལས་རིང་དུ་འདས་ནས་བྱང་ཕྱོགས་ཀྱི་ཆར་གྱུར་པ་ལ་རིའི་རིགས་སམ། ཆུ་བོའི་རིགས་སམ། ཡུལ་གྱི་རིགས་སམ་གླིང་གི་རིགས་རྣམས་ཇི་ལྟ་བུ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བྱང་གི་ཕྱོགས་ན་ཉ་ཞེས་བྱ་བའི་ཡུལ་དཔག་ཚད་བཅུ་པ་ཡིན་ནོ། །ཡུལ་གཉིས་པ་པུ་ལིན་དོ་ཞེས་བྱ་བ་དཔག་ཚད་ཉི་ཤུ་པ་ཡིན་ནོ། །ཡུལ་གསུམ་པ་དཔའ་བོའི་སྡེ་ཞེས་བྱ་བའི་དཔག་ཚད་བརྒྱ་པ་ཡིན་ནོ། །ཡུལ་བཞི་པ་སུས་ཐ་ལི་ཞེས་བྱ་བ་དཔག་ཚད་བརྒྱ་པ་ཡིན་ནོ། །ཡུལ་ལྔ་པ་དར་དོ་ཞེས་བྱ་བ་བཟང་པོར་སྤྱོད་པ་དཔག་ཚད་བརྒྱ་པ་ཡིན་ནོ། །ཡུལ་དྲུག་པ་སྒྲ་མི་སྙན་ཞེས་བྱ་བ་དཔག་ཚད་བརྒྱ་པ་རྣམས་ཡིན་ནོ། །ཡུལ་བདུན་པ་བཟང་པོ་པ་ཞེས་བྱ་བ་དཔག་ཚད་ལྔ་བཅུ་པ་ཡིན་ནོ།