འཕང་དུ་ནི་དཔག་ཚད་བརྒྱ་པ་ཡིན་ཏེ། རི་འདི་ལ་དངུལ་གྱི་རང་བཞིན་གྱི་རྭ་ཡང་བཅོ་ལྔ་ཡོད་དོ། །དེ་ལ་ནི་ལྷའི་བུ་མོ་རྣམས་རྩེ་དགའ་བར་བྱེད་དོ། །ལྷའི་བུ་མོ་དེ་དག་རྣམས་ཐམས་ཅད་ལྷ་མ་ཡིན་གྱིས་ཀུན་དུ་མཐོ་འཚམ་པར་བྱེད་དོ། །གཞི་དེ་ལས་དང་པོ་ལྷ་དང་ལྷ་མ་ཡིན་གྱི་འཁྲུག་པར་འགྱུར་རོ། །ལྷ་དང་མི་རྣམས་སོ་སོའི་སྐྱེ་བོ་རྣམས་ཐམས་ཅད་ཀྱང་བུད་མེད་ཀྱི་དབང་དུ་འགྱུར་བ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ཏཱ་ལའི་ཕྲེང་བའི་རི་དེ་ལས་འདས་པར་གྱུར་ནས་རི་དང་རྒྱ་མཚོའི་རིགས་སམ། གླིང་གི་རིགས་རྣམས་གཞན་གང་དག་ཅེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། དེ་ལས་རིང་དུ་འདས་ནས་དཔག་ཚད་ལྔ་སྟོང་དུ་རྒྱ་མཚོ་ཡིན་ནོ། །དེ་ལ་དཔག་ཚད་སྟོང་དུ་ཉ་རྣམས་ཡོད་དེ་དཔག་ཚད་ལྔའི་ཚད་དུ་གྱུར་པ་ཡིན་ཞིང་གླང་པོ་ཆེ་དང་། མ་ཧེ་ཥ་དང་། ཕག་པ་དང་། རྔ་མོ་དང་། སེང་གེ་དང་། སྟག་དང་། སྤྱང་ཀི་དང་། གུང་དང་། སྤྲེའུ་དང་། མིའི་གདོང་ཅན་རྣམས་དང་། སེམས་ཅན་རྣམས་ཐམས་ཅད་ཀྱི་བཞིན་གྱི་རྗེས་འདྲ་བར་གྱུར་པ་རྣམ་པ་དུ་མ་ཅན་རྣམས་ཡིན་ནོ། །རྒྱ་མཚོ་དེ་ལས་འདས་པར་གྱུར་ནས་ཉི་མ་ལྡན་ཞེས་བྱ་བའི་རི་ཡོད་དོ། །དེ་ལ་ནི་འདོད་པ་རྣམས་ཐམས་ཅད་དང་། ལྷ་རྫས་ཀྱི་པད་མ་དང་། ཞག་བདུན་དུ་རྒྱགས་པ་སྐྱེད་པར་བྱེད་པའི་འབྲས་བུ་རྣམས་ཀྱང་ཕུན་སུམ་ཚོགས་པ་ཡིན་ནོ། །དེ་ལ་ཡང་མི་འམ་ཅི་དག་རབ་ཏུ་གནས་པ་ཡིན་ཏེ། གླུ་དང་གར་གྱིས་རྟག་ཏུ་གནས་པར་བྱེད་པ། རྟག་ཏུ་ཡིད་དགའ་བར་གྱུར་པ་རྣམས་རང་གི་ལས་ཀྱི་འབྲས་བུའི་བགོ་སྐལ་ལ་སྤྱོད་པར་བྱེད་པས་དམན་པ་དང་། བར་མ་དང་། མཆོག་ཏུ་གྱུར་པ་རྣམས་ཕན་ཚུན་དུ་གྲོགས་སུ་གྱུར་པས་རྩེ་དགའ་བར་བྱེད་དོ། །ཉི་མ་ལྡན་གྱི་རི་དེ་ལས་ཤིན་ཏུ་འདས་པར་གྱུར་ནས་དཔག་ཚད་ཉིས་སྟོང་གི་རྒྱ་མཚོ་ཡིན་ནོ། །དེ་ལས་ཤིན་ཏུ་འདས་པ་ན་ནི་ཀུཉྫ་རོ་ཞེས་བྱ་བའི་རི་ཐམས་ཅད་དུ་ཡང་དངུལ་གྱི་རང་བཞིན་དང་། ལྷ་རྫས་ཀྱི་བཻ་ཌཱུརྱའི་རྡོ་བ་དང་། དངུལ་གྱི་གླེགས་བུ་དང་། རྡོ་བ་ཡིད་དུ་འོང་བ་རྣམས་ཀྱིས་ཡིད་ཉེ་བར་མཛེས་པར་བྱས་པའོ། །དེ་ལ་བུ་མོའི་ཤིང་ལྗོན་པ་ཞེས་བྱ་བའི་ལྗོན་ཤིང་རི་དེའི་ཉེ་འཁོར་ན་ཡོད་དོ།