རིའི་རིགས་གཞན་དག་ཀྱང་ཡོད་པ་ཡིན་ཏེ། གཅིག་པུ་པ་ཞེས་བྱ་བའི་རིའི་རིང་དུ་ནི་དཔག་ཚད་བརྒྱར་གྱུར་པ་འཕང་དུ་ནི་དཔག་ཚད་ལྔ་བརྒྱ་པ་ཡིན་ནོ། །རི་དེ་ལས་དམར་པོ་ཞེས་བྱ་བའི་ཆུ་བོ་འབབ་པ་ཡིན་ཏེ། གཟི་བརྗིད་ཆེ་བ་དང་ལྡན་པར་གྱུར་པ། རྒྱར་ནི་དཔག་ཚད་ཕྱེད་ཡིན་ཞིང་རིང་དུ་ནི་དཔག་ཚད་ལྔ་བརྒྱ་ཡིན་ཏེ། ཇི་སྲིད་དུ་རྒྱ་མཚོར་འཇུག་གོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རྣམ་པ་དེ་ལྟ་བུའི་ཆུ་ཀླུང་གི་རིགས་གཞན་འཛམ་བུའི་གླིང་ན་ཡོད་པ་ཡིན་ནམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འཛམ་བུའི་གླིང་ན་རབ་ཏུ་འབབ་པར་གྱུར་པའི་ཆུ་བོ་ཆེན་པོ་ཀཱ་བེ་རཱི་ཞེས་བྱ་བ་མེ་ཏོག་ཆེན་པོ་རྣམས་ཀྱིས་ཉེ་བར་མཛེས་པར་བྱས་པ་རྣམས་ལ་འདི་ལྟ་སྟེ། ཀེ་ཏ་ཀ་དང་། ཙམ་པ་ཀ་དང་། ཨརྫུ་ནཱ་དང་། ཀ་དམྦ་དང་། མཱ་ལི་ཀ་གསར་པ་དང་། ཨ་ཏི་མུཀྟ་ཀ་དང་རྣམས་ཀྱིས་ཉེ་བར་མཛེས་པར་བྱས་པའོ། །གཉིས་པ་ཡང་བ་ལང་ཅན་ཞེས་བྱ་བ་བ་ལང་གི་གཞི་རྣམས་ཀུན་དུ་གང་བ་ཡིན་ནོ། །ཆུ་བོ་དེ་དག་གཉིས་ཀ་ཡང་ཞེང་དུ་ནི་དཔག་ཚད་ཕྱེད་ཡིན་ལ་རིང་དུ་ནི་དཔག་ཚད་སུམ་བརྒྱ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་ན་རིའི་རིགས་སུ་གྱུར་པའམ་ཆུ་ཀླུང་གི་རིགས་སུ་གྱུར་པ་གཞན་དག་ཀྱང་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འཛམ་བུའི་གླིང་ན་རིའི་རིགས་དང་ཆུ་བོའི་རིགས་གཞན་དག་ཀྱང་ཡོད་དོ། །དེ་དག་ཀྱང་འདི་ལྟ་སྟེ། ཊ་ཀ་ཤོ་བྷོ་ཆེན་པོ་ཞེས་བྱ་བའི་རི་ཡོད་པ་ནི་མི་ཐམས་ཅད་ཀྱིས་བགྲོད་དུ་རུང་བ་རྒྱ་མཚོས་བསྐོར་བ་ཡིན་ནོ། །རི་དེའི་ཚད་ནི་དཔག་ཚད་སུམ་ཅུ་ཡིན་ནོ། །འདི་ལ་མི་རྣམས་གནས་པ་ཡང་ཅུང་ཟད་ཀིནྐི་ཀི་རཱ་ཏཱ་ཞེས་བྱ་བའི་མི་བརྩེ་བ་མེད་པ་དང་། ཀླ་ཀློ་དང་། རྣ་བ་གོན་པ་དང་རྣམས་སོ། །གཞན་རྣམས་ཀྱང་རབ་ཏུ་གནས་པར་གྱུར་པ་ནི་ལོ་མ་གྱོན་པ་རྣམས་ཏེ། དེ་དག་ཀྱང་རྒྱ་མཚོའི་ཆུའི་ནང་གི་གླང་པོ་ཆེའི་ཤ་རྣམས་ཟ་བར་བྱེད་དོ། །གོམས་པར་གྱུར་པའི་དབང་གིས་ཟས་རྣམས་ཟ་བ་ཡིན་པས་མིའི་ཤ་རྣམས་ཀྱང་ཟ་བར་བྱེད་དོ།