བདག་དང་བཅས་པ་མ་ཡིན་ལ་བྱེད་པ་པོས་བྱིན་གྱིས་བརླབས་པ་ཡང་མ་ཡིན་ནོ། །རྒྱུ་མེད་པ་མ་ཡིན་ཞིང་འདོད་རྒྱལ་བ་ཡང་མ་ཡིན་ཏེ། བྱེད་པ་པོ་གཅིག་གིས་བྱས་པ་མ་ཡིན། གཉིས་ཀྱིས་མ་ཡིན། གསུམ་གྱིས་མ་ཡིན། བཞིས་མ་ཡིན། ལྔས་མ་ཡིན། ལམ་ལོག་པ་སྟོན་པར་བྱེད་པའི་གཞན་མུ་སྟེགས་ཅན་རྣམས་ཀྱི་རྒྱུ་དྲུག་པས་ཀྱང་མ་ཡིན་ནོ། །དེ་ལྟར་ཕྱི་རོལ་གྱི་དབང་དུ་བྱས་ནས་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །གཞན་ཡང་རྣལ་འབྱོར་སྤྱོད་པ་དེས་དེ་ལྟར་བཟང་ལྡན་གྱི་དུས་ནས་འཇིག་པའི་དུས་ཀྱི་བར་དུ་ཐམས་ཅད་ལ་རྒྱས་པར་སྔར་བཞིན་དུ་རིག་པར་གྱུར་ནས་ཡང་དག་པ་ཇི་ལྟ་བ་བཞིན་དུ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་སོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ཇི་ལྟར་མིའི་གནས་བཞི་པོ་རྣམས་ཐམས་ཅད་ན་རི་དང་། ཆུ་བོ་དང་། ཐང་དང་། རྒྱ་མཚོ་རྣམས་དང་། རིའི་རྒྱལ་པོ་རི་རབ་ལྷུན་པོའི་བར་དུ་ཡང་རེ་རེ་ཞིང་ཆེར་འཕེལ་བར་འགྱུར་བ་དང་། ཆུང་དུ་འགྲིབ་པ་རྣམས་ཀྱང་གང་དག་ཞེ་ན། སྐྱེས་བུའི་གནས་བཞི་པོ་རྣམས་འདི་ལྟ་སྟེ། འཛམ་བུའི་གླིང་དང་། ནུབ་ཀྱི་བ་ལང་སྤྱོད་དང་བྱང་གི་སྒྲ་མི་སྙན་དང་། ཤར་གྱི་ལུས་འཕགས་པོ་དང་བཅས་པ་རྣམས་སོ། །དམྱལ་བ་ཡང་ཆེན་པོ་བརྒྱད་དོ། །ཡི་དགས་རྣམས་དང་། དུད་འགྲོ་རྣམས་དང་། འདོད་པ་ན་སྤྱོད་པའི་ལྷའི་རིས་དྲུག་གོ། །དེ་ལྟར་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་སོ། །གཞན་ཡང་རྣལ་འབྱོར་སྤྱོད་པ་པ་འཛམ་བུའི་གླིང་གི་ཤར་ཕྱོགས་ཀྱི་ཆ་དེའི་རི་དང་། ཆུ་བོ་དང་། ཡུལ་དང་། མཚམས་ལ་ཀུན་དུ་ལྟ་བར་བྱེད་དོ། །དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འཛམ་བུའི་གླིང་གི་ཤར་ཕྱོགས་ན་ཡང་མིང་ཨ་ནཱུ་ན་ཞེས་བྱ་བའི་རི་ཡོད་དོ། །རི་ཨ་ནཱུ་ན་དེ་ནི་དཔག་ཚད་བཅུ་པ་ཡིན་ནོ། །གཞན་ཕ་རོལ་པོ་ཨ་ནཱུ་ནའི་རི་ནི་དཔག་ཚད་སུམ་ཅུ་པ་ཡིན་ནོ། །རི་དེ་དག་གཉིས་ཀྱི་བར་གྱི་ས་ལ་ཆུ་བོ་མཐོ་རིས་དགའ་བ་བྱ་བ་འབབ་པའོ། །ཆུ་ཀླུང་ཀཽ་ཤི་ཀ་དང་། ཆུ་ཀླུང་གཞན་ཀོ་ཤ་ལཱ་དང་།